Header Ads

  • Berita Tebaru

    Majang ngarapka mayuh agi RMM digaga di Samalaju

    GAMBAR PENGIAS: ‘Rumah Mampu Milik’ (RMM)

    KUCHING: Kaban Kunsil Nengeri (ADUN) Samalaju, Majang Renggi meri perambu sereta ngarapka perintah ulih ngaga mayuh agi ‘Rumah Mampu Milik’ (RMM) ba sitak nya.

    Iya madahka rayat bisi pengirau deka ngembuan rumah ke diri empu berindik ari penatai pemisi ti nambah sereta proses urbanisasi ti majak ngerembai.

    Ku iya kandang sitak DUN Samalaju mega betapi pekara ti sama, ketegal pemayuh genturung pendiau ti jampat nambah asil ari pemansang mayuh bengkah industri.

    “Nya alai alu merambu ngagai opis menteri nya ngambika ngaga RMM lebih agi ba kandang endur Sungai Pelan, jalai tanjung Kidurong enggau Taman Perindustrian Samalaju dikena nyendiaka endur ti lantang lebih agi sida ke udah bisi ruang bilik.

    “Aku meda peminta guna ba Program Perumahan Rakyat (PPR) ba kandang endur tu dikena meri peluang ngagai sida ke bepenatai pemisi RM3,000 tauka ke baruh ngambika ngembuan rumah ke diri empu,” ku iya ti mantaika isu dalam sitak ke diarika.

    Iya mansutka pekara nya lebuh ti bejuraika 'Usul Penghargaan Atas Ucapan TYT Yang di-Pertua Negeri Sarawak' maya Baum Kunsil Nengeri (DUN) Ke-18 Hari Ke-l5 ti diatur ba Kompleks DUN ditu, kemari.

    Berebak enggau tu, Majang mega minta sektor peribit ti bejalaika tanggunpengawa ngemansangka proejk SPEKTRA (Skim Perumahan Khas Rakyat) ti nagit peranak ke tengan pemesai penatai pemisi,ngambi berundingka projek nya di Bintulu.

    Nambahka nya lebuh ke ngenang pasal pemansang modal mensai, iya madahka industri ba DUN Samalaju begunaka pengereja pengawa bepengelandik lalu institusi pelajar endang chara nempa pengereja pengawa bepelandik.

    Nitihku iya, ke diatu semina bisi tiag buah institusi iya nya Institut Kemahiran Mara (IKM), Pusat Latihan Teknologi Tinggi (ADTEC) enggau kolej Vokasional Bintulu ke ulih nyendiaka pengereja pengawa bepengelandik enggau setengan pengelandik nampung peminta guna industri.

    “Meri perambu ngambika pengawa ngelakuka Pendidikan dan Latihan Vokasional Teknikal (TVET) amat beguna dikena meri penyedar ngagai rayat pasal pemesai guna pengelandik enggau teknikal.

    “Kitai deka ke mayuh agi sida ke baru tembu Sijil Pelajaran Malaysia (SPM) enggau Sijil Tinggi Pelajaran Malaysia (STPM) nyambung pelajar dalam bidang teknikal enggau vokasional.

    “Berindik ari pekara tu, diperambu ngambika penyampau nembiak ke diambi masuk belajar ba IKM Bintulu, Pusat Teknologi Tinggi ADTech Bintulu enggau Kolej Vokasional Bintulu patut ditambah ninting maya,” ku iya seraya madahka diri nyukung usul TYT. #UtusanBorneo

    No comments

    Post Top Ad