Header Ads

  • Berita Tebaru

    Pemansang ungkup rayat deka nyadi fokus perintah

    KENANG: Ketua Menteri nyuaka tepa ngagai Baru, seraya dikemata bala bukai rambau iya nerima pejalai nemuai meri basa ari Menteri Kereja Raya nya di DUN kemari.

    KUCHING: Perintah Besai enggau Perintah Nengeri Sarawak patut ngiarka bida politik tang meri fokus ngagai pemansang rayat di nengeri tu.

    Menteri Kereja Raya, Baru Bian madahka Perintah Besai kelebih agi opis menteri iya (Opis Menteri Kereja tauka KKRM) sedia bekerejasama enggau Perintah Nengeri dikena nentuka pejalai projek infrastruktur baka jalai, sekula enggau sepital ulih dipejalai di nengeri tu.

    “Kepala Menteri (Datuk Patinggi Abang Johari Tun Openg) meri jamin Perintah Nengeri Sarawak deka bekerejasama enggau Perintah Besai lalu ba pekara tu Opis Menteri Kereja Raya (KKR).

    “Iya (Abang Johari) sedia nerima pekara tu lalu tu siti semengat ti chukup manah, iya nya kitai patut nejuka politik kelebih agi ba pengawa ngemansangka rayat.

    “Kitai meseti meri pemerat ngagai pengawa ngemansangka Sarawak enggau Malaysia pulaika pemaik rayat. Tu chukup manah,” ku iya madah ngagai pengarang berita pengudah ngatur pejalai nemuai meri basa ngagai Abang Johari di Opis Kepala Menteri di Aum Kunsil Nengeri (DUN), ditu, kemari.

    Baru ke mega ADUN Ba’Kelalan enggau Chairman Parti Keadilan Rakyat (PKR) Sarawak madah iya chukup temegah sereta lantang ati laban Abang Johari sedia nerima penemuai sereta meri timbal ti manah.

    Kaban Parlimen (MP) Selangau nya madahka mayuh pekara ti bisi di baruh bidang kuasa KKR meri pangka ngagai projek di Sarawak kelebih agi infrastruktur, sekula enggau sepital.

    Kenu ku iya, pemansang infrastruktur, sekula enggau sepital nyadi pekara chukup dikemerat sereta semak ba ati rayat nengeri tu.

    “Aku madah ngagai Kepala Menteri pekara tu terima perati rayat Sarawak lalu semua nemu aku enggau bala bakih Pakatan Harapan (PH) ke bukai suah mantaika pekara tu.

    “Kerejasama tu patut dikena nentuka projek infrastruktur tu ulih dipejalai ungkup pengelantang rayat,” ku iya.

    Penemuai meri basa ngagai Kepala Menteri tu keterubah iya ngagai Baru pengudah iya ngangkat sumpah nyadi Menteri Kereja Raya kena 2 Julai tu tadi.

    Sama bisi datai Sapit Kepala Menteri ke lalu nyadi Menteri Pemansang Infrastruktur enggau Perengka Pengangkut, Tan Sri Datuk Amar James Jemut Masing, Ketuai Sekretari KKR, Dato’ Sri Zohari Akob sereta beberapa pengari PH Sarawak antara iya ADUN Tanjong Batu Chiew Chiu Sing, ADUN Batu Lintang See Chee How enggau Chairman Parti Amanah Negara (AMANAH) Sarawak Mohamad Fidzuan Zaidi. #UtusanBorneo

    No comments

    Post Top Ad