Perintah diansak betatika tikas umur minimum tikas baruh umur - Berita Iban Online

Header Ads

  • Baru Nyadi

    Perintah diansak betatika tikas umur minimum tikas baruh umur

    Gambar pengias.

    KUALA LUMPUR: Perintah sereta sida ke megai kuasa enda tau enda betatika tikas umur minimum ke tikah baruh umur digaga serata ngambika ulih dititih sida ke bejalaika undang-undang lebuh napi penanggul bekait enggau tikah anak kit baruh umur.

    Felo Tukang Pansik Undang-undang enggau Atur Undang-undang Universiti Teknologi Malaysia (UTM) Dr Muhammad Fathi Yusof madah atur ke silik nya enda tau enda dipasukka ke dalam enakmen tauka genteran tusun ukum ke udah bisi baka kediatu (bekait enggau tikah baruh umur).

    “Pekara tu berat nyadi penemu ke tetap ke semua nyengkaum mensia mayuh. Pekara ke silik bukai ke patut digaga, iya nya pemisi penambah prosedur ke bisi bekait enggau pengulih, penuduk pemisi, kaul enggau opis pengerai sereta pakar kaunseling ke sida ke udah nikah ba umur ke biak,” ku iya.

    Iya madah munyi nya lebuh nimbal pekara bekait enggau tikah anak mit baruh umur ke dikejakuka mensia mayuh diatu, lebuh seiku lelaki ari menua tu jadi enggau seiku anak mit baruh umur, 11 taun di Narathiwat, Thailand. Bisi diripot madahka, Kort Syariah Gua Musang (di Kelantan) ngukum lelaki nya nya RM1,800 udah iya ngaku penyalah iya jadi enggau anak mit baruh umur ke enda dikemendar ulih kort sereta ‘berpoligami’ ke enda dikemendarka ulih bini dulu lelaki nya.

    Nitih ku Akta Undang-undang Keluarga Islam nengah Seksyen 8 netapka umur minimu ke tikah lalu enti lelaki nya berumur kurang ari 18 taun tauka indu nya berumur kurang 16 taun, sida iya enda dikemendarka jadi melaki bini, semadi meh teulihka pemendar ari Hakim Syarie nengah chara betulis lalu pekara nya bepanggai ba pemerat sida iya deka jadi ba umur biak bansa nya.

    Bekait enggau sadang ngaga tikah baruh umur siti penyalah, Muhammad  Fathi madah kediatu, undang-undang ruang bilik Islam sereta tikah ba baruh kuasa nengeri lalu tikah ukai Islam ba baruh kuasa Perintah Besai.

    “Nya alai Perintah Besai nadai bidang kuasa undang-undang ba tikah orang Islam. Sadang nya semina deka nanchang orang ukai Islam,” ku iya lalu nandu baru madahka tikah anak mit baruh umur semina ulih digaga nengah perintah kort sivil sereta syariah, lalu enti nikah enda dikemendarka, iya dikira siti penyalah.

    Ba pekara nya mega, ex-pensyarah Fakulti Undang-Undang Universiti Teknologi Mara (UiTM) Shah Alam, Habibah Kapawi madah undang-undang Islam bekait enggau tikah baruh umur enda tau enda digaga sama rata di semua nengeri kena ngaga tikah baruh umur nya siti penyalah.

    Ba penemu seiku luyar, Fatien Eleena Jabridin bepenemu, tikah anak mit baruh umur semina deka ngerusakka pemansang modal mensia sereta seiku-seiku orang nya enggau menua.

    Sepenemu enggau Fatien Eleena, tutor anak mit, Puteri Farhana Datuk Megat Ahmad Shahrani madahka tikah anak mit baruh umur siti pengawa ke nyukung pengawa ‘pedofilia’, lalu ketegal nya, iya patut diketuka lalu digaga nyadi siti penyalah undang-undang.

    “Semua tikah baruh umur patut diketuka tekala tu. Iya bepanggai ba penalti. Penalti patut besai agi ari ukum mata duit. Nembiak nya nyangka napi penanggul mental sereta takut dalam kandang umur iya ke agi biak diatu. Nedau agi kitai nyebut pasal nyema nembiak nya dijamah ulih laki iya,” ku iya.

    Iya nandu baru madahka kimpin meri penemu patut dipajakka, sereta bebendar agi ngambika Perintah, sida ke betanggungjawab, mensia mayuh kelimpah ari sekula nemu pasal pekara tu dikemeratka.

    “Giga lalu gaga kimpin tu ‘viral’. Iya ulih manti meri penemu dalam kaul ke besai agi lalu padah ngagai mensia mayuh, NGO sigi betatika pekara tu. Awakka mensia mayuh semua nemu,” ku Exco Pergerakan Puteri Umno Malaysia enggau Ketuai Puteri Umno Kuala Kangsar nya. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads