Header Ads

  • Berita Tebaru

    PKR sedia mantah RUU (Ubah) Kanun Tanah 2018

    AUM PEMBERITA: Chairman Parti Keadilan Rakyat (PKR) Sarawak ke mega ADUN Ba’Kelalan (duduk dua kiba) disempulang raban ketuai PKR ke bukai ba aum pengarang berita di Kuching kemari.

    KUCHING: Kaban Kunsil Nengeri (ADUN) ari Parti Keadilan Rakyat (PKR) Sarawak sedia mantah Rang undang-undang(Ubah) Kanun Tanah 2018 ti deka dibantai ba aum Dewan Undangan Nengeri enti draf nya enda seraris enggau pemutus kort.

    Chairman Parti Keadilan Rakyat (PKR) Sarawak ke mega ADUN Ba’Kelalan Baru Bian madah pekara nya pia ketegal draf nya diasaika enda konsisten enggau pemutus kort kelebih agi bekaul enggau Pemakai Menua enggau Pulau Galau.

    “Aku enda ulih nerangka sentang pekara ke ba dalam draf nya  diatu tang aku ngarap maya dibantaika ba DUN, draf nya seraris enggau pemutus kort.

    “Enti enda, kami deka bejuraika pekara nya ba DUN nyadika bantah,”ku iya ke mega Menteri Kereja Raya enggau Kaban Parlimen(MP) Selangau.

    Iya mansutka jaku nya ba aum pengarang berita diseiti hotel ditu, kemari.

    Berindik enggau nya ku iya, enti amat enda seraris Perintah Nengeri patut matak pulai draf nya ketegal ti udah nerima mayuh bantah ari sekeda gerempung ke ukai dikuasa perintah(NGO).

    “Kitai nganti, enti sida majakka pekara nya kitai deka bejuraika enggau nenak sentang ubah nya rambau DUN tu,’ku iya nandu.

    Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah deka mantaika RUU(Ubah) Kanun Tanah 2018 ba aum DUN ti berengkah 9 nyentuk ngagai 18 Julai tu.

    Bela ngulu aum pengarang berita mandal Chairman PKR Sarawak ke mega ADUN Batu Lintang See Chee How, MP Puncak Borneo Willie Mongin enggau MP Lubok Antu Jugah Muyang. #UtusanBorneo

    No comments

    Post Top Ad