PRU14 tau disema ‘Tanah Berenyang politik’, ku Faisal - Berita Iban Online

Header Ads

  • Baru Nyadi

    PRU14 tau disema ‘Tanah Berenyang politik’, ku Faisal

    Faisal S.Hazis

    KUCHING: Pekara ke nyadi maya Pengawa Bepilih Besai Menua ke-14 (PRU14) disema baka ‘tanah berenyang politik’ lalu ukai semina ‘tsunami politik’, ku raban akademik Faisal S.Hazis.

    Sarjana ari Universiti Kebangsaan Malaysia (UKM) nya madahka semua trend sejarah enda ulih dikena dalam meri pemutus PRU14 lalu iya ngelalau rayat Malaysia anang sesekali ngenyamaka ubah Perintah nya enggau ubah tusun menua tu.

    Iya madah, ambika chunto, 84 peratus penuduk beratika bemacham gaya empas, enti nitih muakka penyandang perintah tang ke sekali tu, pekara nya enda nyadi dalam PRU14.

    Iya mega ngaku mayuh raban akademik enggau pemerati politik ke enda meda ubah Perintah nya deka nyadi maya pengawa bepilih besai kena 9 Mei tu tadi, tang pekara nya nyadi.

    Nitihka data ke digumpul naka kediatu, Faisal madah mayuh orang Melayu di menua tu enda ngundi Barisan Nasional (BN).

    Taja pia ku iya, enda mayuh undi Melayu diberi ngagai Pakatan Harapan (PH) mega.
    “Nitih ku penerang ke bisi ba kami, BN nerima undi popular urung 33.8 peratus dalam PRU14 dibanding enggau 47 peratus dalam taun 2013, lalu PH ngerikod undi popular urung 45 peratus dibanding enggau 36 peratus dalam taun 2013.

    “Enti undi tu disengkaum enggau undi popular PAS, iya nya 16.9 peratus enggau pemujur ke di ulih PH, sida teulihka 63 ngagai 64 peratus undi popular. Tu mandangka dua pertiga pengundi ngenggaika BN,” ku iya madah ba atur pengawa forum politik ‘Malaysia Baru: Adakah Rakyat Boss?’ di sebuah hotel butik ditu, kemari.

    Faisal madah mayuh ke enda nyangka PAS deka majak megai kuasa di Kelantan lalu menang di Terengganu kelimpah nyapai pemujur di Kedah lalu semina 39 peratus aja komuniti Melayu milih BN dibanding enggau 52 peratus dalam taun 2013.

    Iya mega madahka PH udah nyapu beresi ke semua penuduk majoriti China alai 90 peratus pengundi China nyukung PH dalam PRU14.

    Ari penyampau nya, iya nyimpul PH enda tau enda bebendar agi gawa matak mayuh agi undi Melayu dalam pengawa bepilih besai nangkan tu ila.

    “PRU14 tu mega beratika taja pan BN majak bekuasa di Perlis enggau Pahang, undi popular sitak menua tu baruh 50 peratus.

    Lalu di Sarawak, lebih 50 peratus pengundi milih BN, sebuah tu aja menua di Malaysia tu ke agi mengkang milih BN.

    “Seraya BN suba bempu sitak menua deposit tetap di Sabah enggau Sarawak, PH mega bisi sitak menua ke nyadi deposit tetap, iya nya Pulau Pinang enggau Selangor,” ku iya.

    Faisal madah Parti Keadilan Rakyat (PKR) Sarawak bedau ulih masuk ngagai sitak Melayu di menua tu.

    Ku iya, PKR Menua enda tau enda bebendar agi matak ati pengundi Melayu maya pengawa bepilih besai nengeri ti dipelabaka deka digaga dalam timpuh tiga taun tu ila. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads