RUU (Ubah) 2018 ngemetulka pengelemi undang-undang tanah PM enggau PG, ku Uggah - Berita Iban Online

Header Ads

  • Baru Nyadi

    RUU (Ubah) 2018 ngemetulka pengelemi undang-undang tanah PM enggau PG, ku Uggah

    Datuk Amar Douglas Uggah Embas

    KUCHING: Tuju Rang Undang-Undang (RUU) Kanun Tanah (Ubah), 2018 dikena ngemetulka pengelemi tauka pengurang undang-undang tanah betulis ke udah bisi ba Sarawak ti bekaul enggau Pemakai Menua (PM) enggau Pulau Galau (PG).

    Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madah, undang-undang tanah betulis nengeri enda terang bendar pasal PM enggau PG ti senipak enggau raban bansa bukai.

    Nya alai ku iya, pekara nya udah ngeruga  pengawa ngaku PM enggau PG nyadi tanah adat bansa asal (NCR).

    Pengurang dalam undang-undang kitai baka ti diayanka ba Kort Federal pengawa ngakim kes Direktor Kampung, Sarawak enggau Perintah Nengeri Sarawak enti dibandingka enggau Tr Sandah Tabau sereta 7 Ors, ke dikenataika kena 20 Disember 2016.

    Kes nya ku iya, lebuh ke mantaika RUU Kanun Tanah (Ubah), 2018 Kort Federal ngemutuska PM enggau PG, ti dikemeranka orang Iban, nadai dalam undang-undang Sarawak.

    “Ubah tu patut ketegal kes Tr Sandah ti nuntut 5,000 hektar, tang mahkamah nemu urung nyauka 2,800 ngagai 3,000 hektar nya temuda. Tang besepiak enggau temuda bisi kampung bungas, nya pan dituntut iya mega nunda adat PM enggau PG.

    “Tang mahkamah enda ngelapas laban nya enda dalam kategori tanah temuda lalu adat PM enggau PG nadai kuasa undang-undang.

    “Nya kebuah undang-undang tu diubah ngambika kitai ulih ngelala(mengiktraf) adat PM enggau PG dalam undang-undang,” ku iya.

    Uggah mansutka pekara nya dalam aum pengarang berita ba Bilik Media, Kunsil nengeri ditu kemari, lebuh ditanya bekaul enggau mayuh orang enda setuju enggau pemesai nya ke ditatak ngagai 500 hektar pemesai.

    RUU Kanun Tanah (Ubah) 2018 deka dibacha Uggah ba ketiga kali sereta dipejurai sereta diputuska sehari tu ba Aum Kunsil Nengeri Ke-18 ba Hari Keempat.

    Lebuh mantaika pasal perambu ubah undang-undang nya Uggah madahka asil ke pemadu beguna ari perambu undang-undang tu ngambika surat pala tanah NCR mendam sereta dikelala nyadi Kandang Menua Bansa Asal (NTD).

    Tebal agi perintah ke alai raban bansa  asal bisi meri hak ‘unufuktur’ ngagai peranak sida ke diau asal ba endur diuan sida, tang ba Sarawak, ba baruh Gabungan Parti Sarawak (GPS),  kandang menua diberi kuasa undang-undang enggau diaku nengah undang-undang nyadi engkeman ke betul, ku iya.

    “Dokumen surat pala tanah deka diberi ngagai raban bansa ke bekaul dikena ngelindung kandang menua sida,” ku iya seraya madahka nya nyakal penemu sekeda orang ke dikangau champion hak asasi, keybord enggau  mantah sereta perintah PH.

    Uggah madahka orang ti enda setujuka RUU ketegal agenda politik diri empu.

    Kelimpah ari nya, muak ke lemai kemari Spekaer Kunsil Nengeri Datuk Amar Mohamad Asfia Awang Nassar madahka bisi 35 iku ADUN ngambi bagi ba pengawa bejuraika RUU Kanun Tanah (Ubah) 2018, ke lalu deka diputuska pengudah bacha kali ketiga, sehari tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads