Sarawak deka nyali RM1 bilion dikena ngemanah sekula - Berita Iban Online

Header Ads

  • Baru Nyadi

    Sarawak deka nyali RM1 bilion dikena ngemanah sekula

    Kepala Menteri Datuk Patinggi Abang Johari Tun Openg

    BETONG: Kepala Menteri Datuk Patinggi Abang Johari Tun Openg deka meri duit jali RM1 bilion ngagai Perintah Besai dikena ngaga baru sekula ti udah tuai sereta buruk di serata Sarawak enti sema Opis Menteri Pelajar napi penanggul suntuk belanja.

    “Aku enggaika Sarawak deka dikelaung ari pemansang ti dipejalai di serata dunya diatu. Aku udah meri langgur penemu ngagai sida nama kebuah enda ngena belanja kitai dulu tang kita meseti mayar pulai. Aku nyediaka RM1 bilion, tang perintah besai ke sebedau tu madahka sida bisi belanja. Aku ngarapka perintah baru deka nampung pengawa dikemendar ngemanah sekula kitai udah tuai sereta buruk.

    “Kitai enda ulih nganti kelalu lama lalu enti sida enda tetangkupka nya, aku ulih meri sida jali RM1 bilion dikena ngemansangka sekula ke udah tuai sereta buruk  tu.

    “Tu ukai politik, tu pasal peminta bala anak kitai,” ku iya madah nyemetak.

    Abang Johari bejaku bejadika pengawa ngintu Hari Pengajar Renggat Nengeri ti diatur di Dewan Tan Sri Datuk Amar Kalong Ningkan di Betong kena Hari Tiga tu tadi.

    Kepala Menteri mega enda ulih meretika nama kebuah Opis Menteri Pelajar enda bejalaika pengawa proaktif dikena nyambung sekula ngagai kuasa grid ke bisi diatu lalu milih ngena injin api diesel.

    “Aku bisi ngabas sebuah sekula di Bintulu ti kena penusah ampuh bah apin lama ke udah lalu tetemuka sekula tu semak amat enggau transformer kuasa tang sida milih ngena injin api diesel, enda ulih diterima akal. Pekara ti chukup enda betul,” ku iya.

    Ku iya nambah, baka deka nyadi pekat ke meri penguntung ngagai pemekal minyak tang ngenusahka bala nembiak ti seranta ti ngasaika pengurang penyikap perengkaguna pelajar moden kemaya hari.

    “Enti sema menteri pelajar ari perintah besai setuju, kami deka nyambung sekula tu enggau grid kuasa nengeri. Enti sida begunaka RM50 juta, aku deka ngemendarka RM50 juta ngambika pengawa tu ulih dipejalai ungkup nembiak di menua pesisir,” ku iya nandu.

    Abang Johari enda ulih meretika nama kebuah Perintah Besai enda bejalaika sebarang pengawa ke serius pasal penu sah tu seraya ngasaika bisi pekara chukup enda betul.

    “Nama kebuah bisi kabel karan dia, pemansut kuasa chukup semak tang sida enda disambung. Pekara chukup beli, minta ampun aku laban mansutka jaku beli tang aku enda meretika pengawa beli ngena minyak diesel lebuh bisi bekal kuasa  ke bukai,” ku iya asa.

    Rega minyak diatu ba gaya ke niki lalu tu tentu deka ngasuh perintah ngeluarka belanja mayuh agi lebuh Sarawak chukup kaya enggau kuasa hidro elekterik.

    “Tambah mega, kitai tu mansutka kuasa lalu kitai bisi Bakun, Murum, Batang Ai, Balleh sereta bisi mayuh amat kuasa, aku enda meretika kebuah sekula menua pesisir nadai kuasa karan, aku enda nemu bejaku agi. Aku enda ringat tang aku semina enda meretika pekara nya,” ku iya.

    Lebuh ngenang pasal isu bekal ai ditapi sekula menua pesisir, Abang Johari ngaku  Sarawak napi penanggul berat ba bekal ai diatu.

    “(Aku meseti ngaku nya) Kitai napi penanggul bekal kuasa ai di serata Sarawak. Aku udah ngasuh opis bekal ai ngambi bejalaika grid ai baru tang pekara tu begunaka timpuh ke chukup panjai.”

    “Ai mata deka datai ari tekat ai kitai baka Batang Ai, Bakun, Murum enggau ke bukai disambung nengah batang paip besai tang tu deka begunaka timpuh. Ba kandang menua baruh kesuh ai, perintah nengeri udah ngemendarka belanja RM2 biliun dikena ngerumban pengawa nyambung bekal ai ngagai kandang menua pesisir,” ku iya.

    Senentang peminta ari Menteri Pelajar, Sains enggau Pansik Teknologi Sarawak, Datuk Seri Michael Manyin Jawong ungkup belanja ngenyit sepenyampau RM9 juta dikena nyambung sekula menua pesisir ngagai grid ai ke bisi diatu, ku Johari, perintah nengeri udah ngaga pemutus enda nganti belanja ari perintah besai.

    “Kitai enda ulih nganti belanja ari perintah besai lalu perintah Sarawak udah ngemendarka peminta nyambung sekula menua pesisir ti udah dikelala ngagai grid ai nengeri,” ku Johari.

    Berebak enggau nya, Dr Chong Pek Lin udah diberi gelar ‘Tokoh Guru Sarawak 2018’. Ex-Pengelicha Kanan ti udah ngajar 17 taun enggau 10 bulan ba Palan Pematih Pengajar Kampus Batu Lintang, iya pinchin dalam taun 2015.

    Iya nyadi Pengelicha Kanan Muzik (Pensyarah Cemerlang Muzik kenyau ari taun2011), Ketuai Opis Pelajar Rama (2005-2008), Direktor Koir, Pansik ba tanda enggau muzik etnik, ngatur projek mansik ungkup Institut Pemansang Sarawak ti dipelanja United States Ambassadors fund ungkup pengawa ngintu budaya ari rumah panjai di ulu sungai nagagi kelas moden 2004-2006.

    Antara pemujur beprestij iya nya menang ISME - Gibson International Award ba pengajar muzik pemadu nyulut 2006 enggau nguluka projek “Introducing folk songs and instruments of East Malaysia to Schoolchildren” (2007-2009).

    Dr Chong bisi ngarang tiga bup - “Folk Songs from Sarawak” 1998, “Songs from the Baram” 2006 enggau “Introduction to Selected ensembles and Folk songs of East Malaysia” 2011.

    Berebak enggau nya, Datu Abdillah Adam diberi gelar ‘Tokoh Kepimpinan Pendidikan Negeri Sarawak’.

    Abdillah ada di pelilih Simunjan kena 17 Ogos 1954. Iya nerima pelajar tumu di SK Kampung Iboi/Pelandok, Simunjan.

    Iya nampung pelajar sekondari di SMK Green Road enggau SMB St Joseph sebedau ngambi pelajar degree keterubah di Universiti Malaya. Iya teulihka Master degree ari Bristol University, United Kingdom dalam taun 1988. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads