Header Ads

  • Berita Tebaru

    Siku indu tuai dipungpung enggau ditunu pala

    Raban polis benung bejalaika pengawa mansik di palan indu tuai (warga emas) ke ditunu begulai enggau sebuah motosikal.

    SARATOK: Pala dipungpung, ditunu enggau sepur pala (tengkorak) meachir-achir sebedau bangkai mansa indu tuai (warga emas) ditemu parai mejal ba rumah panjai di Roban, Saratok lemai kemari.

    Mansa dikelala enggau nama Gelingi Anak Ngaing, 75 taun, ditemu bebalut darah benung ningkap nadai pala ba bilik besai (ruang tamu) rumah panjai nya.

    Ketuai Polis Pampang Saratok, Deputi Superintendan Polis Mordani Tanin maya ke ditanya pengarang berita madahka siku suspek lelaki beumur 57 taun, siku ari genturung pendiau menua nya mega, ditan kena mantu pengawa mansik.

    "Polis berumban ngesah ke palan penusah ke nyadi sepengudah nerima penerang pasal kes bunuh nya urung jam 3 lemai kemari.

    "Asil pansik di palan penusah ke nyadi bisi tetemuka dua iti duku, siti kapak enggau siti batu pengasah ba endur bebasu ba mua jalai masuk ke rumah panjai nya, dipechayaka dikena suspek netak mansa," ku iya.

    Maya nya mega, polis bisi tetemuka sepur pala (tengkorak) mansa urung tiga meter ari pala, perengka tauka senjata tajam ke ditemu raban polis.

    “Pansik pengudahnya bisi nemu sepur pala (tengkorak) ke ditunu begulai enggau sebuah motosikal ba simpang masuk ke rumah panjai nya," ku iya.

    Mordani nandu, nitihka penerang ari menantu mansa, maya penusah ke nyadi urung jam kurang 2.30 lemai nya, entua indu iya (indai) benung belelak di bilik besai (ruang tamu) sebedau suspek datai ngayunka duku ke dipegai iya. 

    Ku iya, menantu mansa selamat laban ulih nyelamatka diri ari pintu dapur rumah nya.

    “Suspek dipechayaka  menawa ulah (kurang siuman) nya udah mujur ditangkap semak palan penusah ke nyadi. Ari asil pansik tu, iya ngaku netak enggau nunu pala mansa nya begulai enggau sebuah motosikal ke diempu anak mansa.

    “Lelaki nya madahka diri ngereja pengawa nya pengudah ninga munyi kanggau antu (seruan hantu) lalu munuh mansa,” ku iya.

    Kes ditasat nitihka "Seksyen 302 Kanun Keseksaan atas Kesalahan membunuh" ti tau mai tinggang ukum mati mandatori, enti ngaku ngereja penyalah.

    Bangkai mansa dibai ke Hospital Sibu kena bejalaika pengawa bedah siasat. #BeritaIbanOnline

    No comments

    Post Top Ad