Ubah OMO 2018 udah dikemendar Kunsil Negeri - Berita Iban Online

Header Ads

  • Baru Nyadi

    Ubah OMO 2018 udah dikemendar Kunsil Negeri

    GAMBAR PENGIAS: Logo Petronas enggau Sarawak.

    KUCHING: Rang Undang-Undang Ngelumbung Minyak (Ubah) 2018, dikemendarka Kunsil Nengeri  pengudah bacha ketiga  kali kemari.

    Rang undang-undang nya dikemendarka nengah undi enggau sukung majoriti Kaban Kunsil Nengeri.

    Pemutus nya dibantaika Speaker Kunsil Nengeri, Datuk Amar Mohamad Asfia Awang Nassar maya baum muak ke lemai kemari.

    Rang Undang-undang nya dibantaika Menteri Kedua Pemansang Mengeri enggau Pengeraja Asal, Datuk Amar Awang Tengah Ali Hasan, ti madahka enggau ubah tu perintah  nengeri ulih ngering tauka ngenegapka agi pengawa nyaga sereta ngatur ba pengawa nyerungkai  enggau ngiga petroleum ( ti nunda definisyen nyengkaum “gis asli”).

    Sereta nyengkaum pengawa ngelumbung ba darat  menua tu, sekalika ba darat tauka tasik dalam Pelantar Menua ti ngambi kira definisyen “Tanah Perintah” dalam Seksyen 2 Undang- Undang  Tanah nyengkaum tebing pantai  enggau dalam  tasik ba garis menua Sarawak udah dikemesaika Sarawak (Ubah ba entara ) baka Perintah Dalam Kaunsil 1954.

    “Ubah tu dikena ngemaruka sekeda pekara (ke diungkup) dalam Ordinan Ngelumbung Minyak (OMO) lalu nyemelaka ordinan nya enggau operasyen sereta pekara ke dikemeranka diatu dalam sektor pemun dalam industri minyak enggau gis,” ku iya.

    Nambahka nya Awang Tengah madah, PETRONAS ke nyadi sebuah Kompeni minyak menua lebuh beoperasyen di Sarawak enda tau enda nitihka undang-undang nengeri tu, kelebih agi OMO enggau Undang- Undang Tanah.

    Rayat Sarawak ku iya, dekaka PETRONAS bebasaka undang-undang nengeri kitai.

    “Perintah Sarawak deka nentuku juluk rayat Sarawak nyadi nyata sereta deka terus bebendar ngetanka hak nengeri ba minyak enggau gis ke diulih ari tanah kitai  sekalika ba darat enggau luar pantai.

    “Ubah ngagai OMO deka numbuhka langkar kereja nyaga enggau ngatur ti engekeman agi ungkup sektor pemun enggau nangkanka nya nengah penerit atur Ordinan Nyadung Gis, 2016.

    “Tu manifestasi tegap perintah nengeri ti deka nyaga enggau ngetanka hak nengeri enggau pemegai guna minyak enggau gis ngagai nengeri,” ku iya.

    Kelimpah ari nya, lebuh ti nyimpul jurai pengudah rang undang-undang nya dikemendarka, Awang Tengah madahka bekaul enggau isu penerit atur ngagai pengemeran industri ke udah bisi, perintah deka meri timpuh ngagai pengemeran ke bedau nitihka atur OMO.

    Isu penerit atur dibantaika Kaban Kunsil Nengeri (ADUN) Lingga, sadong Jaya, Daro , Padungan enggau sida ke bukai maya bejuraika rang undang-undang nya.

    “Perintah udah ngaga pemutus meri timpuh nangguh nyentuk ujung taun 2019 (ngagai pengemeran industri) alai sida nitihka atur sereta ngemaruka operasyen sida.

    “Ke pemadu beguna perintah diatu bejalaika chara dikena nentuka semua piak bejalaika nama ke patut dikena nyemakaka operasyen nitihka undang-undang nengeri,” ku iya.

    Bejaku baru iya madahka perintah nengeri mega udah berandau enggau semua pesereta industri kenyau 16 Mei ke alai semua penerang enggau perintah udah diberi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads