Header Ads

  • Berita Tebaru

    11 August 2018 - Hari Enam ba Minggu Ke Lapan Belas Musim Selama (Memorial of Saint Clare, virgin)

    Jesus lalu ngerara antu nya, lalu antu nya pansut ari nembiak nya, lalu nembiak nya gerai tekala nya. -Matthew 17: 14 - 20

    Bacha Ke Satu:

    Habakuk 1: 12 - 2: 4

    TUHAN, kenyau ari pun, Nuan endang Allah Taala. Nuan Allah Taala aku. Nuan kudus sereta meruan belama iya. TUHAN Allah Taala enggau Penyaga aku, Nuan udah milih orang Babilon, lalu ngasuh sida kering ngambika sida ulih ngukum kami.

    Tang baka ni ku Nuan tan meda orang ke aum-juak, ti jai tu? Mata Nuan kelalu kudus merening ngagai penyai, lalu Nuan enda tan meda orang ngereja penyalah.

    Nya alai, nama kebuah Nuan enda bemunyi lebuh sida ngerusak orang ke lurus agi ari sida?

    Baka ni ku Nuan ngaga mensia baka ke enggau ikan, tauka enggau bala indu utai ti nadai raja?

    Orang Babilon nangkap orang ngena ginti baka ke nangkap ikan. Sida ngirit orang ngena jala, lalu manjung gaga ati ke orang ke ditangkap sida!

    Indah pukat sida deh abis disembah sida, lalu sida ngenjuk piring ngagai pukat sida, laban pukat sida nya meri sida utai ti pemadu manah.

    Kati sida deka ngena pedang sida belama iya, lalu majak ngerusak semua bansa bukai enggau nadai pengasih?

    Aku deka niki menara ti alai aku jaga, lalu nganti TUHAN madahka ngagai aku utai ti deka diasuh Iya sebut aku, enggau saut ari Iya pasal serebana aku.
    Ku TUHAN nyaut aku: 
    Tuliska enggau terang ba batu-tulis utai ti dipadahka Aku ngagai nuan, ngambika utai nya nyamai dibacha.

    Tuliska utai nya, laban utai nya apin dikamatka diatu. Tang maya deka datai enda lama da agi, alai utai ti dipadahka Aku ngagai nuan, deka dikamatka. Utai nya baka ke lubah nyadi, tang anti aja utai nya. Iya tetap deka nyadi, lalu iya enda masau jam.

    Tu pesan nya: ‘Orang ke jai enda ulih idup, tang orang ke lurus deka idup ngena pengarap sida.’

    Masmur Entara:

    Masmur 9: 7 - 8, 9 - 10, 11 - 12

    Saut (peda 10b): Nuan enda ninggalka orang ke datai ngagai Nuan, O TUHAN.

    Ke Satu
    Tang TUHAN endang Raja belama iya. 
    Iya udah nudukka kerusi diraja Iya ba endur alai Iya ke ngakim.
    Iya merintah dunya ngena pengelurus. 
    Iya ngakim semua bansa enggau lurus.

    Saut: Nuan enda ninggalka orang ke datai ngagai Nuan, O TUHAN.

    Ke Dua
    TUHAN nyadi kuta alai orang ngenduh lebuh sida kena perinsa, nyadi kuta alai sida diau lebuh maya tusah.
    Orang ke nemu Nuan, TUHAN, deka manggaika pengarap sida ba Nuan. 
    Nuan enda ninggalka orang ke datai ngagai Nuan.

    Saut: Nuan enda ninggalka orang ke datai ngagai Nuan, O TUHAN.

    Ke Tiga
    Belagu pantun puji ke TUHAN ti diau di Sion! 
    Tusui ngagai semua bansa utai ti udah dikereja Iya!
    Allah Taala ingatka orang ke merinsa. 
    Iya nadai kala enda ingatka sabak sida, 
    lalu Iya ngukum orang ke udah ngereja utai ti salah ngagai sida.

    Saut: Nuan enda ninggalka orang ke datai ngagai Nuan, O TUHAN.

    Alleluia (peda 2 Timoti 1: 10)

    Alleluia, alleluia
    Juruselamat kitai, Jesus Kristus, ke udah ngerusak pemati, lalu udah mandangka pengidup ti meruan belama iya ulih Berita Manah.
    Alleluia.

    Bacha Injil:

    Matthew 17: 14 - 20

    Lebuh sida datai ba bala mayuh, siku orang datai ngagai Jesus, besugang di mua Iya, lalu bejaku, “Tuhan, kasihka anak aku, laban iya sakit gila-babi, lalu balat amat merinsa. Iya suah udah rebah ngagai api, tauka ngagai ai.

    Aku udah mai iya ngagai sida murid Nuan, tang sida enda ulih ngeraika iya.”

    Jesus lalu nyaut, “Kita tu orang ke enda tetap ati sereta jai! Ni pengelama Aku enda tau enda begulai enggau kita? Ni pengelama Aku enda tau enda sabar enggau kita? Bai iya kitu ngagai Aku!”

    Jesus lalu ngerara antu nya, lalu antu nya pansut ari nembiak nya, lalu nembiak nya gerai tekala nya.

    Udah nya sida murid datai kediri ngagai Jesus, lalu bejaku, “Nama kebuah kami enda ulih muru antu nya?”

    Disaut Iya, “Laban kita mit pengarap. Laban, enggau bendar Aku madah ngagai kita, enti kita bisi pengarap ngemesai igi ensabi, kita ulih bejaku ngagai bukit tu, ‘Mindah ari tu ngagai nyin!’ lalu bukit nya deka mindah. Nadai utai enda ulih dikereja kita!”

    No comments

    Post Top Ad