Header Ads

  • Berita Tebaru

    12 August 2018 - Hari Minggu Ke Sembilan Belas Musim Selama

    Aku tu roti ti idup, ke nurun ari serega. Barang sapa makai roti tu deka idup belama iya, lalu roti ti deka diberi Aku kena ngidupka dunya nya tubuh Aku Empu. - John 6 : 41 -51

    Bacha Ke Satu:

    1 Raja 19: 4 - 8

    Elijah bejalai sehari nya ngagai menua puang. Iya ngetu lalu duduk belindung di baruh sepun kayu, ngajihka diri mati.

    “Utai tu kelalu balat, TUHAN,” ku iya besampi. “Ambi nyawa aku. Manah agi aku mati!”

    Iya gali di baruh kayu nya, lalu tinduk. Tekala nya siku melikat lalu negu iya, lalu ku melikat nya bejaku, “Dani, lalu makai.”

    Elijah malik lalu tepedaka siti tuku roti enggau sigi kebuk ai semak pala iya. Iya makai, ngirup, lalu gali baru.

    Melikat TUHAN datai baru, lalu ngerak iya kedua kali. Ku melikat nya bejaku, “Angkat lalu makai, enggai ke nuan enda ulih bejalai.”

    Elijah angkat, makai, ngirup, lalu pemakai nya chukup ngasuh iya kering bejalai empat puluh hari ngagai Sinai, bukit ti kudus.

    Masmur Entara:

    Masmur 34: 1 - 2, 3 - 4, 5 - 6, 7 - 8

    Saut (peda 8a): Asaika meh, lalu peda pemadas TUHAN.

    Ke Satu
    Aku deka seruran meri terima kasih ngagai TUHAN. Aku enggai badu muji Iya. Aku deka muji Iya ketegal utai ti udah dikereja Iya. Awakka semua orang ke kena tekan, mending lalu gaga ati!

    Saut: Asaika meh, lalu peda pemadas TUHAN.

    Ke Dua
    Aram kitai nusui pemesai kuasa TUHAN. 
    Aram kitai sama sereta muji nama Iya!
    Aku besampi ngagai TUHAN, lalu Iya nyaut aku. Iya ngelepaska aku ari semua penakut aku.

    Saut: Asaika meh, lalu peda pemadas TUHAN.

    Ke Tiga
    Orang ke kena tekan engkadah ngagai Iya, lalu gaga ati. Sida enda asa ngapa. Orang ke seranta ngangauka Iya, lalu Iya nyaut. Iya ngelepaska sida ari semua penusah sida.

    Saut: Asaika meh, lalu peda pemadas TUHAN.

    Ke Empat
    Melikat TUHAN nyaga orang ke ngemesaika TUHAN lalu ngelepaska sida ari utai ti tau nganu sida. Awakka kita empu ngasaika pemadas TUHAN. Beberekat meh orang ke nemu pengelikun lebuh sida begulai enggau Iya.

    Saut: Asaika meh, lalu peda pemadas TUHAN.

    Bacha Ke Dua:

    Epesus 4: 30 - 5: 2

    Menyadi:
    Anang ngenusahka ati Roh Kudus Allah Taala, ke udah dikena ngechop kita ke Hari Penebus.

    Buai semua dengki, tebiat ngeransi, pengeringat, jaku laya, tebiat bejakuka orang, enggau semua ati ti begedi, lalu nelap enggau pangan diri, siru enggau pangan diri, ngampun pangan diri, baka Allah Taala, dalam Kristus, ke udah ngampun kita.

    Nya alai tunda teladan Allah Taala, laban kita tu anak ke dikesayauka Iya. 

    Lalu idup dalam pengerindu, baka Kristus ke udah rinduka kitai, lalu udah nyerahka Diri ketegal kitai, nyadika genselan enggau piring ti bebau rengut, ti diberi ngagai Allah Taala.

    Alleluia (peda John 6: 51)

    Alleluia, alleluia
    Aku tu roti ti idup, ke nurun ari serega, ku TUHAN;
    barang sapa makai roti tu deka idup belama iya.
    Alleluia.

    Bacha Injil:

    John 6: 41 - 51

    Orang Judah lalu mutap pasal Iya, laban Iya udah nyebut, “Aku tu meh roti ti nurun ari serega.”

    Ku sida bejaku, “Ukai enda Iya tu Jesus anak Josep, lalu kitai ngelala apai indai Iya? Baka ni ku Iya diatu nyebut, ‘Aku udah nurun ari serega’?”

    Jesus lalu nyaut sida, “Anang mutap. Nadai orang ulih datai ngagai Aku enti Apai ke udah ngirumka Aku, enda ngasuh iya, lalu Aku deka ngangkatka iya ba hari ti penudi. 

    Endang udah ditulis dalam bup sida nabi, ‘Lalu semua sida deka diajar Allah Taala.’ Genap iku orang ke udah ninga lalu belajar ari Apai, datai ngagai Aku.

    Ukai reti nya orang bisi udah meda Apai, kelimpah ari Iya ke datai ari Allah Taala. Semina Iya aja ke udah meda Apai.

    Enggau bendar Aku madah ngagai kita, barang sapa arap deka bulih pengidup ti meruan belama iya.

    Aku tu meh roti pengidup. Aki ini kita makai mana di menua puang, tang sida mati.

    Tu roti ti nurun ari serega, ngambika orang makai iya lalu enda mati.

    Aku tu roti ti idup, ke nurun ari serega. Barang sapa makai roti tu deka idup belama iya, lalu roti ti deka diberi Aku kena ngidupka dunya nya tubuh Aku Empu.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: