13 August 2018 - Hari Satu ba Minggu Ke Sembilan Belas Musim Selama - Berita Iban Online

Header Ads

  • Baru Nyadi

    13 August 2018 - Hari Satu ba Minggu Ke Sembilan Belas Musim Selama

    Tang ngambika sida enda pedis ati, alai nuan mupuk ngagai danau, lalu ulurka ginti. Dalam nyawa ikan ti terubah diejut nuan, nuan deka tetemuka sesingkap duit. Ambi duit nya lalu beri ngagai sida, ke Aku enggau ke nuan. - Matthew 17: 22 - 27

    Bacha Ke Satu:

    Esekiel 1: 2 - 5, 24 - 28

    Kena lima hari bulan ti keempat dalam taun ti kelima Raja Jehoiakin udah dibuai ngagai menua Babilon.

    Aku ninga TUHAN bejaku ngagai aku ba tebing Sungai Kebar di menua Babilon, lalu aku ngasaika kuasa Iya.

    Aku engkadah lalu tepedaka biaubalai datai ari utara: siti mua hari ti besai ti beperenching, enggau api ti enda nemu ngetu nyelar, lalu ba tengah-tengah api nya, bisi siti utai ti beperenching baka temaga ti udah dipugar.

    Lalu aku mega tepedaka empat iku utai ti idup, ti baka gamal mensia, ba tengah-tengah biaubalai nya.

    Aku bisi ninga munyi sayap sida lebuh sida terebai, munyi segum pangka gelumbang, munyi nyawa bala soldadu, munyi nyawa Allah Taala ti Pemadu Bekuasa. Lebuh sida ngetu terebai, sida nyimpul sayap sida. 

    Tang munyi utai agi bisi didinga datai ari atas kebung ti ngerungkup pala sida.

    Ba atas kebung ti ngerungkup pala sida nya bisi siti utai ti baka kerusi diraja ti baka batu nilam; lalu duduk ba atas utai ti baka kerusi diraja nya, bisi siti utai ti baka gamal mensia.

    Lalu ari atas utai ti baka punggung, aku meda utai ti beperenching baka temaga ti dikelingi api; lalu ari baruh utai ti baka punggung, aku bisi meda utai ti baka api, ti dikelingi penampak.

    Penampak nya baka gaya anakraja ti ba mua hari lebuh hari ujan. Nya meh gaya mulia TUHAN.

    Masmur Entara:

    Masmur 148: 1 - 2, 11 - 12, 13, 14

    Saut: Serega enggau dunya penuh enggau mulia Nuan.

    Ke Satu
    Puji meh TUHAN ti datai ari serega,
    puji meh Iya ba endur ti pemadu tinggi.
    Puji meh Iya, semua kita ke melikat Iya, 
    semua kita ke bala soldadu serega.

    Saut: Serega enggau dunya penuh enggau mulia Nuan.

    Ke Dua
    Puji meh Iya, O kita bala raja enggau semua mensia, bala anak raja enggau semua pemerintah ti bukai, indu ke biak, enggau orang bujang, 
    orang ke tuai enggau bala anak mit.

    Saut: Serega enggau dunya penuh enggau mulia Nuan.

    Ke Tiga
    Awakka semua sida muji nama TUHAN, 
    laban semina nama Iya aja dikemesaika; 
    laban mulia Iya ari atas dunya enggau serega.

    Saut: Serega enggau dunya penuh enggau mulia Nuan.

    Ke Empat
    Iya meri pengering ngagai nembiak Iya, 
    ngambika sida muji Iya, iya nya orang Israel ke balat dikesayauka Iya. 
    Puji TUHAN!

    Saut: Serega enggau dunya penuh enggau mulia Nuan.

    Alleluia (peda 2 Tesalonika 2: 14)

    Alleluia, alleluia
    Allah Taala udah ngangauka kita ulih Berita Manah, ngambika kita tau bulih mulia Jesus Kristus Tuhan kitai.
    Alleluia.

    Bacha Injil:

    Matthew 17: 22 - 27

    Lebuh semua murid begempuru di Galili, Jesus bejaku ngagai sida, “Anak Mensia deka diserahka ngagai orang lalu sidai deka munuh Iya, lalu Iya deka diangkatka idup baru ari mati ba hari ti ketiga.” Ati sida lalu balat tusah.

    Lebuh sida datai di Kapernaum, orang ke ngumpul duit pupu ke Rumah Sembiang mansang ngagai Peter, lalu nanya, “Kati pengajar kita enda mayar duit pupu Rumah Sembiang?” “Mayar,” ku Peter nyaut. Lebuh Peter pulai ke rumah, Jesus lalu bejaku dulu enggau iya. Ku Iya, “Baka ni ku penemu nuan, Simon? Ari sapa raja dunya ngambi chukai tauka pupu? Ari peranak menua nya empu, tauka ari orang bukai?” “Ari orang bukai,” ku Peter nyaut. Lalu ku Jesus, “Enti pia, peranak menua enda ibuh mayar chukai. Tang ngambika sida enda pedis ati, alai nuan mupuk ngagai danau, lalu ulurka ginti. Dalam nyawa ikan ti terubah diejut nuan, nuan deka tetemuka sesingkap duit. Ambi duit nya lalu beri ngagai sida, ke Aku enggau ke nuan.”

    2 comments:

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads