Header Ads

  • Berita Tebaru

    14 August 2018 - Hari Dua ba Minggu Ke Sembilan Belas Musim Selama (Memorial of Saint Maximilian Kolbe, Priest and Martyr)

    Iya lalu bejaku, “Enggau bendar Aku madah ngagai kita, enti kita enda berubah lalu nyadi baka anak mit, kita enda ulih tama ngagai Perintah serega. - Matthew 18: 1 - 5

    Bacha Ke Satu:

    Esekiel 2: 8 - 3: 4

    Ku TUHAN Allah Taala bejaku ngagai aku: “Anak mensia, pendingka utai ti dipadahka Aku ngagai nuan. Anang angkat ngelaban baka sida nya. Buka nyawa nuan lalu empa utai ti deka diberi Aku ngagai nuan.”

    Aku lalu tepedaka siti jari nyuaka siti gulung surat ngagai aku.

    Jari nya lalu muka gulung surat nya, lalu aku meda gulung surat nya udah ditulis ari sepiak-sepiak, tulis ti ngundan sabak tusah ati enggau munyi rauh orang ke nyabak sereta bedemuh.

    Ku Allah Taala bejaku, “Anak mensia, empa gulung surat nya. Udah nya mupuk nuan lalu bejaku ngagai orang Israel.”
    Aku lalu merangapka nyawa aku, lalu Iya meri gulung surat nya ngagai aku ngambika aku makai iya.

    Ku Allah Taala bejaku, “Anak mensia, empa gulung surat ti diberi Aku ngagai nuan, ngambika perut nuan kenyang.” Aku lalu makai gulung surat nya, lalu iya manis asai ai manyi.

    Udah nya Allah Taala bejaku, “Anak mensia, alai nuan mansang ngagai orang Israel, lalu sebut ngagai sida sebarang utai ti diasuh Aku sebut nuan.”

    Masmur Entara:

    Masmur 119: 14, 24, 72, 103, 111, 131

    Saut (peda 103a): Naka meh pemanis ajar Nuan.

    Ke Satu
    Aku gaga ati nitihka adat Nuan, lebih agi ari ke gaga ati ngembuan mayuh reta.

    Saut: Naka meh pemanis ajar Nuan.

    Ke Dua
    Adat Nuan ngasuh ati aku gaga. 
    Adat Nuan nyadika penyanding penemu aku.

    Saut: Naka meh pemanis ajar Nuan.

    Ke Tiga
    Adat ti udah diberi Nuan besai agi reti ba aku ari semua duit emas enggau semua duit pirak di dunya tu.

    Saut: Naka meh pemanis ajar Nuan.

    Ke Empat
    Naka meh pemanis ajar Nuan, 
    manis agi ari ai manyi dalam mulut aku!

    Saut: Naka meh pemanis ajar Nuan.

    Ke Lima
    Adat Nuan endang nyadika pesaka aku belama iya; sigi amat, sida nyungkak ati aku gaga.

    Saut: Naka meh pemanis ajar Nuan.

    Ke Enam
    Mulut aku rangap-rangap lalu aku sengah-sengah lelengauka pesan Nuan.

    Saut: Naka meh pemanis ajar Nuan.

    Alleluia (peda Matthew 11: 29AB)

    Alleluia, alleluia
    Ambi lalu san tangkun Aku, lalu belajar ari Aku, laban Aku nelap sereta baruh ati.
    Alleluia.

    Bacha Injil:

    Matthew 18: 1 - 5, 10, 12 - 14

    Lebuh maya nya, sida murid datai ngagai Jesus, lalu nanya, “Sapa orang ke pemadu besai dalam Perintah serega?”

    Iya lalu ngangauka siku anak mit, lalu ngasuh iya bediri ba tengah-tengah sida.

    Iya lalu bejaku, “Enggau bendar Aku madah ngagai kita, enti kita enda berubah lalu nyadi baka anak mit, kita enda ulih tama ngagai Perintah serega.

    Barang sapa ngemaruhka diri baka anak mit tu, deka nyadi orang ke pemadu besai dalam Perintah serega.

    Barang sapa nerima anak mit baka tu dalam nama Aku, nerima Aku.

    “Bejimat kita, enggai ke kita mechat sida ke mit tu. Laban, Aku madah ngagai kita, di serega din melikat sida endang seruran bediri di mua Apai Aku di serega.

    Baka ni ku pikir kita? Enti orang siku bisi seratus iku bedus, lalu siku bedus nya lenyau, enda ke iya deka ninggalka sida ke semilan puluh semilan iku ba bukit, lalu bejalai ngiga siku ti lenyau nya?

    Lalu lebuh iya udah tetemuka bedus nya, enggau bendar Aku madah ngagai kita, iya deka lebih agi gaga ati ke bedus siku nya ari ke sida ke semilan puluh semilan iku ti enda lenyau.

    Baka nya meh Apai kita  ti di serega enggai nejuka indah siku ari sida ke mit tu lenyau.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: