15 August 2018 - Hari Tiga ba Minggu Ke Sembilan Belas Musim Selama (Solemnity of the Assumption of the Blessed Virgin Mary - Mass during the Day) - Berita Iban Online

Header Ads

  • Baru Nyadi

    15 August 2018 - Hari Tiga ba Minggu Ke Sembilan Belas Musim Selama (Solemnity of the Assumption of the Blessed Virgin Mary - Mass during the Day)

    INJIL SEHARI TU: Lebuh Elisabet ninga jaku tabi Maria, anak mit ti dalam kandung Elisabet lalu engkebut. Penuh laban Roh Kudus, Elisabet lalu bejaku enggau nyawa ti inggar, “Beberekat meh nuan ari semua indu bukai, lalu beberekat meh anak ke dikandungka nuan! - Luke 1 : 39 -56

    Bacha Ke Satu:

    Pemandang 11: 19A; 12: 1 - 6A, 10AB

    Rumah Sembiang Allah Taala di serega lalu dibuka, lalu Peti Lampang Batu Adat bisi dipeda dalam Rumah Sembiang nya.

    Udah nya siti tanda ti besai lalu pegari di langit, iya nya siku indu ke begari ngena mata hari, lalu kaki iya bepelasarka bulan, lalu ba pala iya bisi siti makota ti digaga ari dua belas igi bintang.

    Iya ngandung lalu nyabak laban iya radai deka beranak.

    Siti agi tanda pegari di langit, iya nya siku naga ti besai ti bechura mirah, ti bisi tujuh igi pala enggau sepuluh iti tanduk, enggau tujuh iti makota ba pala iya.

    Iya narit sebagi ari tiga bagi bintang ti di langit ngena iku iya, lalu nikauka sida ke baruh ngagai dunya. Naga nya lalu bediri di mua indu ke baru deka beranak nya, deka makai anak indu nya lebuh anak mit nya ada.

    Indu nya lalu ngadaka anak lelaki siku, ti deka merintah semua bansa ngena sebatang besi. Tang anak iya dirampas lalu dibai ngagai Allah Taala enggau ngagai kerusi diraja Iya.

    Indu nya lalu rari ngagai menua puang, ngagai siti endur ti udah disedia Allah Taala ke iya.

    Aku lalu ninga nyawa ti inggar bejaku di serega, “Diatu pengelepas, kuasa enggau Perintah Allah Taala kitai, enggau kuasa Kristus Iya, udah datai.”

    Masmur Entara:

    Masmur 45: 9, 10, 11, 15

    Saut (peda 9bc): Kuin ke bengepan ngena emas ti pemadu manah bediri ari kanan kerusi diraja nuan.

    Ke Satu
    Bala anak indu raja bukai sama begulai enggau bala anak indu nuan; 

    kuin ke bengepan ngena emas ti pemadu manah bediri ari kanan kerusi diraja nuan.

    Saut: Kuin ke bengepan ngena emas ti pemadu manah bediri ari kanan kerusi diraja nuan.

    Ke Dua
    Nuan ti deka nyadi bini raja, pendingka utai ti disebut aku: 

    anang agi ingatka bala nembiak nuan enggau kaban belayan nuan.

    Saut: Kuin ke bengepan ngena emas ti pemadu manah bediri ari kanan kerusi diraja nuan.

    Ke Tiga
    Pemajik nuan deka ngasuh raja ingin rinduka nuan. Iya tuan nuan, nya alai nuan enda tau enda ngasika iya.

    Saut: Kuin ke bengepan ngena emas ti pemadu manah bediri ari kanan kerusi diraja nuan.

    Ke Empat
    Enggau ati ti lantang sereta gaga sida datai lalu tama ngagai istana raja.

    Saut: Kuin ke bengepan ngena emas ti pemadu manah bediri ari kanan kerusi diraja nuan.

    Bacha Ke Dua:

    1 Korint 15: 20 - 27

    Menyadi:
    Tang iya ti bendar, Kristus udah diangkatka ari mati, nyadi orang ke terubah diangkatka idup baru ari bala orang ke udah mati.

    Laban enti pemati datai ulih siku mensia, pengangkat ari mati mega datai ulih siku mensia, laban semua mensia mati dibai Adam, nya alai semua mensia deka idup dibai Kristus.

    Tang genap iku deka diangkatka begintir-gintir: keterubah, Kristus ke buah bungas, lalu lebuh Kristus datai baru, nya baru bala nembiak Kristus.

    Udah nya baru pengujung datai, lebuh Kristus nyerahka Perintah ngagai Allah Taala ti Apai, lebuh Iya udah ngerusak semua pemerintah, perintah enggau kuasa.

    Laban Iya enda tau enda merintah nyentuk ngagai maya Allah Taala udah ngengkahka semua munsuh Iya di baruh kaki Iya.

    Munsuh ti pemadu dudi dirusak nya pemati.

    Laban “Allah Taala udah ngengkahka semua utai di baruh kaki Kristus.” Tang leka jaku “semua utai” sigi terang enda nyengkaum Allah Taala Empu, ke ngengkahka semua utai di baruh kaki Kristus.

    Alleluia

    Alleluia, alleluia
    Maria dibai nikika serega bala melikat cukup pengaga ati.
    Alleluia.

    Bacha Injil:

    Luke 1: 39 - 56

    Maria angkat lalu beguai-guai mupuk ngagai sebuah nengeri di menua Judah ti bebukit, tama ngagai rumah Sekariah, lalu meri tabi basa ngagai Elisabet.

    Lebuh Elisabet ninga jaku tabi Maria, anak mit ti dalam kandung Elisabet lalu engkebut. Penuh laban Roh Kudus, Elisabet lalu bejaku enggau nyawa ti inggar, “Beberekat meh nuan ari semua indu bukai, lalu beberekat meh anak ke dikandungka nuan!

    Lalu nama kebuah utai tu nyadi ba aku, datai ke indai Tuhan aku nyau nemuai ngagai aku?

    Laban lebuh aku ninga jaku tabi nuan tadi, anak mit ke dalam kandung aku engkebut gaga ati.

    Beberekat meh iya ke arapka jaku Tuhan deka dikamatka!”

    Maria lalu bejaku, “Semengat aku ngemesaika Tuhan, lalu ati aku gaga ke Allah Taala ti Juruselamat aku, laban Iya udah kasihka nembiak Iya ke baruh ati. 

    Belabuh ari diatu semua serak deka ngumbai aku beberekat laban Allah Taala ti bekuasa udah ngereja utai ti besai ke aku. Kudus meh nama Iya.

    Iya mandangka pengasih Iya ngagai orang ke nangika Iya, ari serak siti ngagai serak siti.

    Iya udah mandangka pengering Iya ngena lengan Iya lalu udah mambarka orang ke sumbung enggau semua pelan sida.

    Iya udah muai raja ti bekuasa ari kerusi diraja sida, lalu ngeninggika orang ke baruh ati.

    Iya udah ngenyangka orang ke lapar enggau utai ti manah, lalu muru sida ke kaya pulai puang.

    Iya udah nulung nembiak Iya Israel, kena Iya ngingatka pengasih Iya, nitihka semaya ti digaga Iya enggau aki ini kitai, ngagai Abraham enggau ngagai peturun iya belama iya.”

    Maria lalu diau enggau Elisabet kira tiga bulan. Udah nya iya pulai ngagai rumah iya empu.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads