Header Ads

  • Berita Tebaru

    18 August 2018 - Hari Enam ba Minggu Ke Sembilan Belas Musim Selama

    Tang ku Jesus bejaku, “Awakka anak mit datai ngagai Aku, lalu anang nagang sida, laban Perintah serega diempu orang ke baka sida tu.” - Matthew 19: 13 - 15

    Bacha Ke Satu:

    Esekiel 18: 1 - 10, 13, 30 - 32

    Ku TUHAN bejaku ngagai aku,
    “Nama reti jaku-dalam tu ti selalu disebut orang di menua Israel? ‘Apai indai makai buah anggur ti masam, tang bala anak ke ngasaika nyawa diri masam.’

    Ku TUHAN Allah Taala bejaku, 
    “Laban Aku tu Allah Taala ti idup, kita enda tau agi besebutka jaku-dalam nya di menua Israel. Seput semua orang, seput apai indai enggau seput anak endang enggi Aku. Semina orang ke bedosa aja ti deka mati.

    “Enti sema orang siku lurus lalu ngereja utai ti beradat sereta ngena.
    Iya enda nyembah engkeramba orang Israel tauka makai piring ti diberi ba rumah alai nyembah engkeramba. Iya enda nguji ngulihka bini orang, tauka beleman enggau indu ke benung datai kain.

    Iya enda nekanka pengidup orang, tang mulaika gadai orang ke nginjau duit ari iya, enda ngerumpak utai orang, meri roti ngagai orang ke lapar, lalu meri gari ngagai orang ke telanjai.

    Iya ukai ngiga untung lebuh iya nyali orang duit. Iya enggai ngereja penyai, lalu iya meri pemutus penemu ti betul lebuh iya ngatur laya orang.

    Iya ngasika pesan Aku, lalu bejimat nitihka Adat Aku. Nya meh orang ke lurus, lalu iya deka idup,” ku TUHAN Allah Taala bejaku.

    “Enti sema orang nya bisi anak lelaki ke mangah sereta munuh orang, ngiga untung lebuh iya nyali duit ngagai orang: kati orang nya deka idup? Enda. Iya enda ulih idup. Iya udah ngereja semua utai ti jai nya. Nya alai iya tetap deka mati. Iya empu deka betanggungjawapka pemati diri.

    “Diatu Aku TUHAN Allah Taala, madahka ngagai kita orang Israel, Aku deka ngakim genap iku kita nitihka utai ti udah dikereja kita. Lengkaka semua penyai ti benung dikereja kita diatu, lalu anang nejuka dosa ngerusak kita.

    Lengkaka semua penyai ti benung dikereja kita, lalu awakka runding enggau ati kita digaga nyadi baru. Nama kebuah kita orang Israel deka mati?

    Aku enggai meda orang mati,” ku TUHAN Allah Taala bejaku. “Nesal ati ke dosa kita, lalu idup.”

    Masmur Entara:

    Masmur 51: 10 - 11, 12 - 13, 16 - 17

    Saut (peda 10a): Gaga ati aku tuchi, O Allah Taala.

    Ke Satu
    Gaga ati aku tuchi, O Allah Taala, 
    lalu simpan roh ti baru sereta taluk, dalam aku.
    Anang muai aku ari mua Nuan. 
    Anang ngambi Roh Kudus Nuan ari aku.

    Saut: Gaga ati aku tuchi, O Allah Taala.

    Ke Dua
    Pulaika aku baru ngagai pengaga ti datai ari pengelepas Nuan, 
    lalu asuh aku rajin ngasika Nuan.
    Nya baru aku deka ngajar pasal pesan Nuan ngagai orang ke bedosa, 
    lalu sida deka pulai baru ngagai Nuan.

    Saut: Gaga ati aku tuchi, O Allah Taala.

    Ke Tiga
    Nuan enda rinduka piring, 
    nya kebuah aku enda ngenjuk sida ngagai Nuan. 
    Nuan enda rinduka piring tunu.
    Piring aku nya ati ti baruh, O Allah Taala. 
    Nuan enggai nulak ati ti baruh, ati ti nesal.

    Saut: Gaga ati aku tuchi, O Allah Taala.

    Alleluia (peda Matthew 11: 25)

    Alleluia, alleluia
    Pujika Nuan Apai, Tuhan ke bekuasa di serega enggau di dunya, laban Nuan udah mandangka misteria Perintah ngagai bala anak mit.
    Alleluia.

    Bacha Injil:

    Matthew 19: 13 - 15

    Anak mit lalu dibai ngagai Iya, ngambika Iya ngengkahka jari Iya atas sida, lalu besampika sida. Tang murid Iya balat amat ngerara orang ke mai sida anak mit nya.

    Tang ku Jesus bejaku, “Awakka anak mit datai ngagai Aku, lalu anang nagang sida, laban Perintah serega diempu orang ke baka sida tu.”

    Iya lalu ngengkahka jari Iya atas sida, lalu mupuk ari endur nya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: