20 August 2018 - Hari Satu ba Minggu Ke Dua Puluh Musim Selama (Memorial of Saint Bernard, Abbot and Doctor of the Church) - Berita Iban Online

Header Ads

  • Baru Nyadi

    20 August 2018 - Hari Satu ba Minggu Ke Dua Puluh Musim Selama (Memorial of Saint Bernard, Abbot and Doctor of the Church)

    Orang nya lalu nanya, “Pesan ni?” Disaut Jesus, “Anang munuh orang. Anang butang. Anang ngenchuri. Anang besaksi bula.Bebasaka apai enggau indai nuan, lalu rinduka pangan nuan baka nuan ti rinduka diri empu.” - Matthew 19: 16 - 22

    Bacha Ke Satu:

    Esekiel 24: 15 - 23

    Ku TUHAN bejaku ngagai aku,
    “Anak mensia, Aku deka nabanka siku orang ke balat dikerinduka nuan. Nuan enda tau mutap tauka nyabak, tauka bekeberai ai mata.

    Anang nyabak didinga orang. Anang ngelai diri ngulit lalu bejalai enda belabung tauka enda bekasut. Anang nambai mua nuan, tauka makai pemakai ti diempa orang ke ngulit.”

    Tumu pagi nya aku bejaku enggau orang. Lemai nya bini aku mati, lalu hari siti aku ngereja utai ti diasuh TUHAN.
    Orang lalu nanya aku, “Nama kebuah nuan baka tu?”

    Aku lalu nyaut sida, “TUHAN udah bejaku ngagai aku, ngasuh aku madahka pesan tu ngagai kita orang Israel: Kita temegahka penegap Rumah Sembiang. Kita rindu meda pemanah gaya rumah nya, lalu kita rindu nemuai ngagai rumah nya, tang TUHAN deka ngamahka endur nya, lalu bala anak kita ke tinggal deka mati dibunuh ngena pedang.

    Nya baru kita deka ngereja utai ti udah dikereja aku. Kita enda nambai mua diri, lalu enda mega makai pemakai ti diempa tukang sabak.

    Pala kita dibalut labung, lalu kita bejalai bekasut. Kita enda mega ngulit tauka nyabak, tang kita deka tusah ati ke penyai kita lalu bedemuh mantaika serebana kita ngagai pangan diri.”

    Masmur Entara:

    Ulang Adat 32: 18 - 19, 20, 21

    Saut (peda 18a): Sida enda agi ingatka Allah Taala sida, ti udah meri sida pengidup.

    Ke Satu
    Sida enda agi ingatka Allah Taala sida, Penebus sida ke kering, ti udah meri sida pengidup.Lebuh TUHAN meda nya, Iya ringat lalu nulak bala anak lelaki enggau bala anak indu Iya.

    Saut: Sida enda agi ingatka Allah Taala sida, ti udah meri sida pengidup.

    Ke Dua
    Ku Iya bejaku, ‘Aku deka ngelalaika mua Aku ari sida. Aku deka meda pengujung sida, laban orang tu jai, sereta enda tetap ati.

    Saut: Sida enda agi ingatka Allah Taala sida, ti udah meri sida pengidup.

    Ke Tiga
    Sida udah nyungkak Aku chemburu 
    laban sida nyembah utai ti ukai petara, 
    nyungkak Aku ringat ketegal engkeramba sida. 
    Nya alai Aku deka ngasuh sida ringat ngena siti bansa. 
    Aku deka ngasuh sida chemburu ngena siti bansa ti beli.

    Saut: Sida enda agi ingatka Allah Taala sida, ti udah meri sida pengidup.

    Alleluia (peda Matthew 5: 3)

    Alleluia, alleluia
    Beberekat meh orang ke seranta dalam roh, laban Perintah serega endang enggi sida. Alleluia.

    Bacha Injil:

    Matthew 19: 16 - 22

    Nyadi sekali, siku orang datai ngagai Jesus, lalu nanya, “Pengajar, nama pengawa ti manah ti enda tau enda dikereja aku ngambika aku tau bulih pengidup ti meruan belama iya?”

    Ku Jesus bejaku ngagai iya, “Nama kebuah nuan nanyaka utai ti manah ngagai Aku? Ka semina siku aja ti manah. Enti nuan keran deka tama ngagai pengidup ti meruan belama iya, titihka pesan.”

    Orang nya lalu nanya, “Pesan ni?” Disaut Jesus, “Anang munuh orang. Anang butang. Anang ngenchuri. Anang besaksi bula.
    Bebasaka apai enggau indai nuan, lalu rinduka pangan nuan baka nuan ti rinduka diri empu.”

    Ku orang bujang nya nyaut, “Semua pesan nya udah dititihka Aku magang. Nama utai bukai ti enda tau enda dikereja aku?”

    Ku Jesus bejaku ngagai iya, “Enti nuan deka nyadi pemadu badas, mupuk nuan lalu jual semua reta tengkira nuan, lalu beri duit nya ngagai orang ke seranta, lalu nuan deka bisi pengaya di serega. Udah nya datai lalu titihka Aku.”

    Lebuh orang bujang nya ninga nya, iya angkat ari endur nya tusah ati laban iya orang ke kaya bendar.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads