Header Ads

  • Berita Tebaru

    21 August 2018 - Hari Dua ba Minggu Ke Dua Puluh Musim Selama (Memorial of Saint Pius X, Pope)


    Bacha Ke Satu:

    Esekiel 28: 1 - 10

    Ku TUHAN bejaku ngagai aku, “Anak mensia, padahka ngagai raja menua Tire utai ti disebut Aku TUHAN Allah Taala ngagai iya: 

    Nuan ngerigangka diri ngena penyumbung, lalu ngumbai diri petara.
    Kenu ku nuan, nuan duduk ba kerusi diraja baka petara, dikelingi tasik. Nuan nyangka ngaga diri nyadi petara, tang nuan ukai petara. Nuan semina mensia aja, ukai petara. Nuan ngumbai diri pintar agi ari Danel, lalu ngumbai nadai utai ulih dilalaika ari nuan. Penemu-dalam nuan, enggau pengelandik nuan udah ngasuh nuan kaya laban reta emas enggau pirak.
    Nuan landik bedagang, lalu selalu bulih untung. Nuan temegahka pengaya diri!

    Nyadi diatu, tu utai ti disebut Aku TUHAN Allah Taala: 

    Laban nuan ngumbai diri bepenemu-dalam baka petara, Aku deka ngasuh bala munsuh ti nadai pengasih, nyerang nuan. Sida deka ngerusak semua utai ti manah ti udah ulih nuan ngena pengelandik enggau penemu-dalam nuan.Sida deka munuh nuan, lalu muai bangkai nuan ngagai tasik. Lebuh sida datai lalu munuh nuan, kati nuan agi deka majak ngumbai diri petara? Lebuh nuan betunga mua enggau orang ke deka munuh nuan, nya baru nuan deka nemu diri endang semina mensia aja, ukai petara.

    Nuan deka mati baka ukui ba jari orang bansa bukai ke enda arapka Allah Taala. Aku TUHAN Allah Taala udah bejaku.”

    Masmur Entara:

    Ulang Adat 32: 26 - 27AB, 27CD - 28, 30, 35CD - 36AB

    Saut (peda 39c): Aku munuh, lalu Aku mega ti ngidup.

    Ke Satu
    “Aku bisi ati deka ngachirka sida, 
    ngambika orang nadai agi ingatka sida;
    Tang Aku enggai ke munsuh sida temegah, enggai ke munsuh sida salah sangka.”

    Saut: Aku munuh, lalu Aku mega ti ngidup.

    Ke Dua
    “‘Kitai menang; TUHAN Empu ti ngereja semua nya.’ Israel nya bansa ti enda nemu berunding. Sida enda mereti.”

    Saut: Aku munuh, lalu Aku mega ti ngidup.

    Ke Tiga
    “Baka ni ku siku munsuh ulih ngalahka seribu iku, lalu dua iku munsuh ulih ngalahka sepuluh ribu iku, enti TUHAN Allah Taala sida nadai udah nyual sida ngagai munsuh, enti TUHAN nadai udah ngelengkaka sida?”

    Saut: Aku munuh, lalu Aku mega ti ngidup.

    Ke Empat
    Maya sida deka kena laban penusah ti besai nyau semak, maya sida dirusak deka datai enggau jampat. TUHAN deka sinu ati ke nembiak Iya, 
    lalu ngumbai sida nadai penyalah.

    Saut: Aku munuh, lalu Aku mega ti ngidup.

    Alleluia (peda 2 Korint 8: 9)

    Alleluia, alleluia
    Jesus Kristus Tuhan kitai: taja pen Iya kaya, Iya nyadi seranta, ngambika ulih penyeranta Iya, kita tau nyadi kaya.
    Alleluia.

    Bacha Injil:

    Matthew 19: 23 - 30

    Jesus lalu bejaku enggau sida murid Iya, 
    “Enggau bendar Aku madah ngagai kita, mar amat meh orang ke kaya tama ngagai Perintah serega.

    Aku nandu nya baru: nyamai agi jelu unta tama nengah lubang jarum ari orang ke kaya tama ngagai Perintah Allah Taala.”

    Lebuh sida murid ninga nya, sida alit ati, lalu nanya, “Enti pia, sapa ulih diselamatka?”

    Jesus merening ngagai sida, lalu bejaku, 
    “Ba mensia, utai tu enda ulih, tang ba Allah Taala semua utai ulih magang.”

    Peter lalu bejaku, “Peda Nuan, kami udah ninggalka semua utai lalu nitihka Nuan. Nama utai ulih kami?”

    Ku Jesus bejaku ngagai sida, “Enggau bendar Aku madah ngagai kita, lebuh Anak Mensia duduk ba kerusi diraja Iya ti bemulia ba dunya ti baru, kita ke udah nitihka Aku deka mega duduk ba dua belas iti kerusi diraja, ngakim dua belas raban bansa orang Israel.

    Lalu genap iku orang ke udah ninggalka rumah, tauka menyadi lelaki, tauka menyadi indu, tauka apai, tauka indai, tauka anak, tauka umai, ketegal nama Aku, deka nerima seratus kali mayuh agi, lalu deka diberi pengidup ti meruan belama iya.

    Tang mayuh ke dulu deka nyadi dudi, lalu orang ke dudi deka nyadi dulu.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: