Header Ads

  • Berita Tebaru

    23 August 2018 - Hari Empat ba Minggu Ke Dua Puluh Musim Selama

    Udah nya raja lalu bejaku ngagai bala ulun iya, ‘Berekas kaki jari iya, lalu buai iya ke luar ngagai endur ti petang, alai orang deka nyabak sereta begerit ngeli.’ Laban mayuh dikangau, tang mimit aja dipilih.” 📖 Matthew 22 : 1 -14

    23 August 2018 - Hari Empat ba Minggu Ke Dua Puluh Musim Selama

    Bacha Ke Satu:

    Esekiel 36: 23 - 28

    Ku TUHAN bejaku:

    “Lebuh Aku mandangka pengudus nama Aku ti besai, nama ti udah kamah laban kita di semua menua nya, nya baru sida deka nemu Aku endang TUHAN. 

    Aku TUHAN Allah Taala udah bejaku. Aku deka ngena kita nunjukka pengudus Aku ngagai semua bansa.

    Aku deka ngambi kita ari semua bansa enggau menua, lalu mai kita pulai baru ngagai menua kita empu.

    Aku deka mechikka ai ti beresi ngagai kita, lalu nuchi kita ari semua engkeramba, enggau ari semua utai bukai ti udah ngamahka kita.

    Aku deka meri kita ati ti baru, enggau runding ti baru. Aku deka muai ati kita ti kieh ti digaga ari batu, lalu meri kita ati ti ngasi.

    Aku deka nyimpan Roh Aku dalam kita, lalu Aku deka ngasuh kita nitihka Adat Aku, lalu bejimat ngasika semua pesan ti udah diberi Aku ngagai kita.

    Nya baru kita deka diau di menua ti udah diberi Aku ngagai aki ini kita. Kita deka nyadi nembiak Aku, lalu Aku deka nyadi Allah Taala kita.”

    Masmur Entara:

    Masmur 51: 10 - 11, 12 - 13, 16 - 17

    Saut (peda Esekiel 36: 25): Aku deka mechikka ai ti beresi ngagai kita, lalu nuchi kita ari semua dosa kita.

    Ke Satu
    Gaga ati aku tuchi, O Allah Taala, lalu simpan roh ti baru sereta taluk, dalam aku. Anang muai aku ari mua Nuan. Anang ngambi Roh Kudus Nuan ari aku.

    Saut: Aku deka mechikka ai ti beresi ngagai kita, lalu nuchi kita ari semua dosa kita.

    Ke Dua
    Pulaika aku baru ngagai pengaga ti datai ari pengelepas Nuan, lalu asuh aku rajin ngasika Nuan. Nya baru aku deka ngajar pasal pesan Nuan ngagai orang ke bedosa, lalu sida deka pulai baru ngagai Nuan.

    Saut: Aku deka mechikka ai ti beresi ngagai kita, lalu nuchi kita ari semua dosa kita.

    Ke Tiga
    Nuan enda rinduka piring, nya kebuah aku enda ngenjuk sida ngagai Nuan. Nuan enda rinduka piring tunu. Piring aku nya ati ti baruh, O Allah Taala. Nuan enggai nulak ati ti baruh, ati ti nesal.

    Saut: Aku deka mechikka ai ti beresi ngagai kita, lalu nuchi kita ari semua dosa kita.

    Alleluia (peda Masmur 95: 7C - 8A)

    Alleluia, alleluia
    Sehari tu dingaka utai ti disebut Iya:
    Anang kieh.
    Alleluia.

    Bacha Injil:

    Matthew 22: 1 - 14

    Jesus lalu bejaku baru ngena jaku sempama ngagai orang mayuh.

    Ku Iya, “Perintah serega tau dibandingka enggau siku raja ke nyendiaka gawai tikah ke anak lelaki iya.

    Iya ngasuh bala orang gaji iya ngangauka orang ke udah diambi ngabang datai ngagai gawai tikah nya. Tang sida enggai datai.

    Iya lalu ngasuh bala orang gaji iya ti bukai, ku iya, ‘Padahka ngagai orang ke udah diambi ngabang: Dinga kita, aku udah nyendiaka pengerami makai besai. Jelu sapi aku, enggau anak sapi aku ti gemu udah disayat, lalu semua utai udah sedia magang. Datai meh kita ngagai gawai tikah!’

    Tang sida enda tentu ibuhka tesau nya lalu mupuk ngagai endur bukai, siku ke umai, siku ngagai pengawa dagang iya, lalu sida ti bukai nangkap bala orang gaji raja nya, beduan lalu munuh sida.

    Raja nya lalu ringat. Iya ngirumka bala soldadu iya, munuh bala pemunuh nya, lalu nunu nengeri sida.

    Udah nya iya bejaku ngagai bala ulun iya, ‘Gawai tikah udah sedia, tang orang ke udah diambi ngabang enda tau datai.
    Nya alai bejalai kita ngagai jalai raya lalu ambi ngabang ngagai gawai tikah tu semua orang ke ditemu kita.’

    Bala ulun iya lalu mansang ngagai semua jalai raya, lalu ngempuruka semua orang ke ditemu sida, orang ke manah enggau orang ke jai. Nya alai balai tikah nya nyau penuh laban bala pengabang.

    Tang lebuh raja tama, deka meda bala pengabang, iya tepedaka siku lelaki ke enda ngena pekayan tikah.

    Iya lalu bejaku ngagai orang nya, ‘Unggal, baka ni ku nuan tama kitu enda ngena pekayan tikah?’ Orang nya lalu nadai nemu jalai bejaku.

    Udah nya raja lalu bejaku ngagai bala ulun iya, ‘Berekas kaki jari iya, lalu buai iya ke luar ngagai endur ti petang, alai orang deka nyabak sereta begerit ngeli.’ Laban mayuh dikangau, tang mimit aja dipilih.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: