25 August 2018 - Hari Enam ba Minggu Ke Dua Puluh Musim Selama - Berita Iban Online

Header Ads

  • Baru Nyadi

    25 August 2018 - Hari Enam ba Minggu Ke Dua Puluh Musim Selama

    Nya alai, kereja sebarang utai ti diajar sida ngagai kita, lalu titihka ajar nya, tang anang ngereja utai ti dikereja sida, laban sida enda ngereja utai ti diajar sida empu.

    25 August 2018 - Hari Enam ba Minggu Ke Dua Puluh Musim Selama

    Bacha Ke Satu:

    Esekiel 43: 1 - 7AB

    Orang nya mai aku ngagai pintu ti adap ke timur, lalu dia aku tepedaka penampak mulia Allah Taala ke disembah orang Israel datai ari timur. Nyawa Allah Taala munyi segum pangka gelumbang, lalu tanah beperenching laban penampak mulia Iya.

    Genera nya sebaka enggau genera ti udah dipeda aku lebuh Allah Taala datai ngerusak Jerusalem, enggau genera ti dipeda aku ba tebing Sungai Kebar. Udah nya aku lalu nyungkurka diri ke tanah.

    Penampak ti beperenching nya bejalai nengah pintu timur, lalu tama ngagai Rumah Sembiang.

    Roh TUHAN ngangkatka aku lalu mai aku ngagai tengah laman ti di dalam, lalu aku meda Rumah Sembiang nya penuh laban mulia TUHAN.

    Orang nya bediri ngimbai aku dia, lalu aku ninga TUHAN bejaku ngagai aku ari dalam Rumah Sembiang nya.

    “Anak mensia, tu endur alai kerusi diraja Aku. Aku deka diau ditu begulai enggau orang Israel, lalu merintah sida belama iya.”

    Masmur Entara:

    Masmur 85: 8AB & 9, 10 - 11, 12 - 13

    Saut (peda 9b): Mulia TUHAN deka diau di menua kitai.

    Ke Satu
    Aku mendingka utai ti disebut TUHAN Allah Taala. Iya besemaya deka meri pemaik ngagai kitai ke nembiak Iya. Iya tentu sedia deka ngelepaska orang ke ngemesaika Iya, lalu mulia Iya deka diau di menua kitai.

    Saut: Mulia TUHAN deka diau di menua kitai.

    Ke Dua
    Pengerindu enggau penetap ati deka betemu. Pengelurus enggau pemaik deka beberap. Penaluk mensia deka niki ari dunya, 
    lalu pengelurus Allah Taala deka nilik ke baruh ari serega.

    Saut: Mulia TUHAN deka diau di menua kitai.

    Ke Tiga
    TUHAN deka ngasuh kitai nyadi kaya-raja, lalu kitai deka bulih ngetau. Pengelurus deka bejalai dulu ari TUHAN 
    lalu nyendiaka jalai Iya.

    Saut: Mulia TUHAN deka diau di menua kitai.

    Alleluia (peda Matthew 23: 9B, 10B)

    Alleluia, alleluia
    Kita semina bisi siku aja Apai, Iya ke di serega; kita semina bisi siku aja kepala, iya nya Kristus. 
    Alleluia.

    Bacha Injil:

    Matthew 23: 1 - 12

    Udah nya Jesus lalu bejaku ngagai orang mayuh enggau ngagai sida murid Iya.

    “Sida pengajar Adat enggau orang Parisi udah diberi kuasa nerangka Adat Moses.

    Nya alai, kereja sebarang utai ti diajar sida ngagai kita, lalu titihka ajar nya, tang anang ngereja utai ti dikereja sida, laban sida enda ngereja utai ti diajar sida empu.

    Sida nanchangka ma ti berat, ti mar dibai, ba bau orang bukai, tang sida empu enggai enchukirka tunjuk mai ma nya.

    Sida minta diri dipeda orang mayuh lebuh sida ngereja semua pengawa sida. Sida ngaga papak kain ti besai alai sida nuliska jaku ari Bup Kudus, lalu dilekatka sida ba kening enggau ba lengan sida, lalu rambing puting gari sida panjai.

    Sida rindu duduk ba penuduk ti di atas lebuh pengerami makai besai, enggau duduk ba penuduk ti pemadu manah dalam balai gempuru, lalu sida rindu ditabi orang ba sebelah pasar, lalu rindu dikumbai orang ‘Pengajar.’ 

    Tang kita enda tau dikumbai Pengajar, laban kita semina bisi siku aja Pengajar, lalu semua kita tu diri menyadi magang.

    Lalu anang ngumbai orang di dunya tu Apai, laban kita semina bisi siku aja Apai, Iya ke di serega.

    Lalu kita pen enda mega tau dikumbai kepala, laban kita semina bisi siku aja kepala, iya nya Kristus.

    Orang ke pemadu besai ba bala kita deka nyadi kuli kita.

    Semua orang ke ngeninggika diri, deka dikemaruhka, lalu semua orang ke ngemaruhka diri, deka ditinggika.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads