Header Ads

  • Berita Tebaru

    26 August 2018 - Hari Minggu Ke Dua Puluh Satu Musim Selama


    26 August 2018 - Hari Minggu Ke Dua Puluh Satu Musim Selama

    Bacha Ke Satu:

    Josua 24: 1 - 2A, 15 - 17, 18B

    Josua ngasuh semua raban bansa orang Israel begempuru di Sekem. Iya mesanka semua tuai, bala kepala, bala hakim, enggau bala pemesai orang Israel. Semua sida lalu datai magang di mua Allah Taala.

    Josua lalu bejaku ngagai semua orang Israel, “Enti kita enggai nyembah TUHAN, pilih sehari tu ni bagi petara ti deka dipetuaika kita, nemuka iya nya petara ti udah disembah aki ini kita di menua Mesopotamia, tauka petara orang Amor, ke bempu menua ti alai kita diau diatu. Tang aku enggau semua kami sebilik deka betuaika TUHAN.”

    Orang mayuh lalu nyaut, 
    “Kami enggai sekali-kali ninggalka TUHAN lalu betuaika petara bukai!
    TUHAN Allah Taala kitai udah mai aki ini kitai enggau bala kitai pansut ari menua Ejip, alai kitai ti udah nyadi ulun, lalu kitai udah meda kereja ajih ti dikereja Iya. Iya udah nyaga kitai lebuh kitai nengah menua semua bansa ti ditengah kitai. Nya alai kami deka mega betuaika TUHAN, laban Iya endang Allah Taala kitai.”

    Masmur Entara:

    Masmur 34: 1 - 2, 15 - 16, 17 - 18, 19 - 20

    Saut (peda 8a): Asaika meh, lalu peda pemadas TUHAN.

    Ke Satu
    Aku deka seruran meri terima kasih ngagai TUHAN. Aku enggai badu muji Iya. Aku deka muji Iya ketegal utai ti udah dikereja Iya. Awakka semua orang ke kena tekan, mending lalu gaga ati!

    Saut: Asaika meh, lalu peda pemadas TUHAN.

    Ke Dua
    TUHAN ngemataka orang ke lurus 
    lalu mendingka sabak sida. Tang Iya ngelaban orang ke ngereja penyai, ngambika lebuh sida mati, sida enda dikingatka agi.

    Saut: Asaika meh, lalu peda pemadas TUHAN.

    Ke Tiga
    Orang ke lurus ngangauka TUHAN, lalu TUHAN ninga, lalu Iya ngelepaska sida ari semua penusah sida. TUHAN diau semak orang ke tusah ati lalu ngidupka sida ke nadai agi pengadang.

    Saut: Asaika meh, lalu peda pemadas TUHAN.

    Ke Empat
    Orang ke badas natka mayuh macham penusah, tang TUHAN ngelepaska sida ari semua penusah nya. TUHAN nyaga sida. Siti pen nadai meh tulang sida patah.

    Saut: Asaika meh, lalu peda pemadas TUHAN.

    Bacha Ke Dua:

    Epesus 5: 21 - 32

    Menyadi:
    Nunduk ngagai pangan diri, kena masa Kristus. 

    Kita ke bini, nunduk ngagai laki kita, baka ke nunduk ngagai Tuhan. 

    Laban laki nyadi kepala bini, baka Kristus ke nyadi kepala eklisia, iya nya tubuh Iya Empu, lalu Iya Empu nyadika Juruselamat ke eklisia nya. 

    Baka eklisia ke nunduk ngagai Kristus, baka nya mega bini patut nunduk ngagai laki dalam semua utai. 

    Kita ke laki, rinduka bini kita, baka Kristus ke rinduka eklisia, lalu nyerahka Diri Empu ke eklisia, ngambika nguduska eklisia, lebuh Iya udah nuchi eklisia nya ngena ai enggau ulih jaku Iya, lalu nyerahka eklisia nya enggau semua pemadas iya ngagai Iya Empu, nadai bepetik, enda ngeriut, tauka utai ti baka nya, ngambika eklisia nya kudus sereta nadai penimpang. 

    Baka nya meh laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu. 

    Laban nadai orang kala begedika tubuh diri, tang iya nupi sereta bejimat ngintu tubuh nya, baka ti dikereja Kristus ke eklisia, laban kitai tu raban tubuh Iya. 

    “Nya kebuah lelaki ninggalka apai indai iya, lalu jadi enggau bini iya, lalu seduai iya nyadi setubuh enggau pangan diri.” 
    Tu misteri ti besai kena aku mandingka Kristus enggau eklisia.

    Tauka

    Epesus 5: 2A, 25 - 32

    Menyadi:
    Idup dalam pengerindu, baka Kristus ke udah rinduka kitai.

    Kita ke laki, rinduka bini kita, baka Kristus ke rinduka eklisia, lalu nyerahka Diri Empu ke eklisia, ngambika nguduska eklisia, lebuh Iya udah nuchi eklisia nya ngena ai enggau ulih jaku Iya, lalu nyerahka eklisia nya enggau semua pemadas iya ngagai Iya Empu, nadai bepetik, enda ngeriut, tauka utai ti baka nya, ngambika eklisia nya kudus sereta nadai penimpang. 

    Baka nya meh laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu. 

    Laban nadai orang kala begedika tubuh diri, tang iya nupi sereta bejimat ngintu tubuh nya, baka ti dikereja Kristus ke eklisia, laban kitai tu raban tubuh Iya. 

    “Nya kebuah lelaki ninggalka apai indai iya, lalu jadi enggau bini iya, lalu seduai iya nyadi setubuh enggau pangan diri.” 

    Tu misteri ti besai kena aku mandingka Kristus enggau eklisia.

    Alleluia (peda John 6: 63C, 68C)

    Alleluia, alleluia
    Jaku Nuan TUHAN, nya Roh enggau pengidup. Nuan ngembuan jaku ti meri pengidup ti meruan belama iya.
    Alleluia.

    Bacha Injil:

    John 6: 60 - 69

    Lebuh mayuh ari bala sida murid Jesus ninga nya, sida lalu bejaku, “Ajar tu kelalu mar. Sapa ulih nerima ajar tu?”

    Tang Jesus nemu sida murid Iya mutapka ajar nya, lalu ku Iya bejaku ngagai sida, “Kati kita enda nyamai ati ninga jaku nya. Enti pia, kati enti kita meda Anak Mensia niki ngagai endur Iya ti suba?. Roh aja ke meri pengidup; kuasa mensia enda ulih ngereja utai. Jaku ti udah disebut Aku ngagai kita, nya Roh enggau pengidup. Tang sekeda kita enda arap.” 

    Laban Jesus nemu kenyau ari pun, sapa ke enda arap, lalu sapa ke deka nyual Iya.

    Lalu ku Iya bejaku, “Nya meh kebuah Aku udah madah ngagai kita, nadai orang ulih datai ngagai Aku, enti Apai enda ngeletak iya.”

    Ketegal nya, mayuh murid Jesus ninggalka Iya, lalu enggai agi bejalai enggau Iya.

    Nya alai Iya lalu bejaku ngagai sida ke dua belas, “Kati kita deka mega ninggalka Aku?”

    Simon Peter lalu nyaut Iya, “Tuhan, sapa patut digagai kami? Nuan ngembuan jaku ti meri pengidup ti meruan belama iya.

    Kami udah arap lalu nemu, Nuan tu meh Anak Allah Taala ti kudus.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: