27 August 2018 - Hari Satu ba Minggu Ke Dua Puluh Satu Musim Selama - Berita Iban Online

Header Ads

  • Baru Nyadi

    27 August 2018 - Hari Satu ba Minggu Ke Dua Puluh Satu Musim Selama



    27 August 2018 - Hari Satu ba Minggu Ke Dua Puluh Satu Musim Selama (Memorial of Saint Monica)

    Bacha Ke Satu:

    2 Tesalonika 1: 1 - 5, 11 - 12

    Surat ari Paul, Silas enggau Timoti, ngagai eklisia di Tesalonika dalam Allah Taala ti Apai kitai enggau Tuhan Jesus Kristus:

    Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

    Kami enda tau enda seruran meri terima kasih ngagai Allah Taala ke kita, menyadi, laban nya endang patut, laban pengarap kita deras amat mansang, lalu pengerindu genap iku kita ke pangan diri nambah-menambah.

    Nya alai, kami empu temegahka kita di mua semua eklisia Allah Taala, ketegal kita tan ati, enggau ketegal pengarap kita, taja pen kita natka semua macham pemerinsa enggau penusah.

    Semua utai tu nunjukka Allah Taala endang ngakim ngena pengelurus, ngambika kita ulih tama ngagai Perintah Iya. Ketegal Perintah nya meh kita kena perinsa diatu.

    Nya meh kebuah kami seruran besampika kita, ngambika Allah Taala ngaga kita amat patut dikangauka Iya, lalu nembuka semua utai ti dikinginka Iya enggau semua kereja ti badas, ulih kuasa Iya, ngambika nama Jesus Kristus Tuhan kitai dimuliaka dalam kita, lalu kita dimuliaka dalam Iya, nitihka pengasih Allah Taala kitai enggau pengasih Tuhan Jesus Kristus.

    Masmur Entara:

    Masmur 96: 1 - 2A, 2B - 3, 4 - 5

    Saut (peda 3): Padahka ngagai semua bansa, pasal kereja Allah Taala ti besai.

    Ke Satu
    Nyanyi lagu ti baru ke TUHAN! 
    Belagu ke TUHAN, semua dunya!
    Belagu ke TUHAN, lalu puji Iya!

    Saut: Padahka ngagai semua bansa, pasal kereja Allah Taala ti besai.

    Ke Dua
    Padahka tiap hari berita manah pasal Iya ti udah ngelepaska kitai. Padahka mulia Iya ngagai semua bansa; padahka ngagai semua mensia pasal kereja Iya ti besai.

    Saut: Padahka ngagai semua bansa, pasal kereja Allah Taala ti besai.

    Ke Tiga
    TUHAN endang besai kuasa, lalu patut dipuji. Iya endang patut dikemesaika lebih ari semua petara. Petara semua orang bansa bukai endang semina engkeramba aja, tang TUHAN udah ngaga langit.

    Saut: Padahka ngagai semua bansa, pasal kereja Allah Taala ti besai.

    Alleluia (peda John 10: 27)

    Alleluia, alleluia
    Bedus Aku mendingka nyawa Aku, ku TUHAN; Aku ngelala sida, lalu sida nitihka Aku.
    Alleluia.

    Bacha Injil:

    Matthew 23: 13 - 22

    Ku Jesus bejaku ngagai orang mayuh lalu enggau sida murid Iya:

    “Tulah meh kita pengajar Adat, kita orang Parisi, kita ke pura-pura ngapa! Kita nutup pintu Perintah serega di mua orang mayuh, tang kita empu enda tama, lalu kita nagang orang bukai tama!. Tulah meh kita pengajar Adat enggau kita orang Parisi! Kita tu orang ke pura-pura ngapa!Kita ngerampas rumah indu ke balu, lalu kita pura-pura ngayanka diri lama besampi! Nya alai kita deka diberi ukum ti pemadu berat!

    “Tulah meh kita pengajar Adat enggau kita orang Parisi! Kita tu orang ke pura-pura ngapa! Laban kita belayar meraka tasik, lalu ngelangkah mayuh bengkah menua, nguji mai siku orang ngagai agama kita, lalu kita ngaga orang nya nyadi peranak neraka  dua kali lipat jai agi ari kita empu!

    “Tulah meh kita malin ke buta, ke nyebut, ‘Enti orang besumpah atas nama Rumah Sembiang, utai nya nadai ngawa, tang enti iya besumpah ngena nama emas ti dalam Rumah Sembiang, iya kena tanchang sumpah nya.’ Kita tu buta sereta beli! Laban ni ti besai agi, emas tauka Rumah Sembiang ti ngasuh emas nya kudus?. Lalu ku kita, ‘Enti orang besumpah atas nama alta, utai nya nadai ngawa, tang enti iya besumpah atas nama pemeri ti ba alta nya, iya kena tanchang sumpah nya.’ Kita tu buta! Laban ni ti besai agi, pemeri tauka alta ti ngasuh pemeri nya kudus?. Nya alai orang ke besumpah atas nama alta, besumpah mega atas nama alta nya enggau atas nama semua pemeri ti ba alta nya, lalu orang ke besumpah atas nama Rumah Sembiang, besumpah mega atas nama Rumah Sembiang nya enggau atas nama Allah Taala ti diau dalam Rumah Sembiang nya, lalu orang ke besumpah atas nama serega, besumpah mega atas nama kerusi diraja Allah Taala enggau atas nama Iya ke duduk ba kerusi diraja nya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads