Header Ads

  • Berita Tebaru

    8 August 2018 - Hari Tiga ba Minggu Ke Lapan Belas Musim Selama

    Tang indu nya datai lalu besugang di mua Jesus, lalu bejaku, “Saup aku, Tuhan!” -Matthew 15: 21 - 28

    8 August 2018 - Hari Tiga ba Minggu Ke Lapan Belas Musim Selama (Memorial of Saint Dominic, Priest)

    Bacha Ke Satu:

    Jeremiah 31: 1 - 7

    Ku TUHAN bejaku, 
    “Maya deka datai alai Aku deka nyadi Allah Taala ke semua raban bansa orang Israel, lalu sida deka nyadi nembiak Aku.

    Orang ke enda mati laban pedang, ngasaika penelap Aku lebuh sida di menua puang. Lebuh orang Israel tetenguk deka belelak, Aku pegari di mua sida ari jauh. 

    Kita orang Israel, Aku endang seruran rinduka kita. Nya kebuah Aku seruran ngayanka pengerindu Aku ti meruan belama iya ngagai kita.

    Aku deka nirika kita baru. Kita deka sekali agi mai tamborin kita lalu betanda enggau ati ti gaga.

    Kita deka bekebun anggur baru ba sebelah bukit menua Samaria, lalu orang ke bekebun nya deka makai asil ari kebun nya empu.

    Sigi amat, maya deka datai alai orang ke nyaga menua deka ngangau ba sebelah bukit menua Epraim, ‘Aram kitai niki ngagai Sion, ngagai TUHAN Allah Taala kitai.’”

    Ku TUHAN bejaku, 
    “Belagu enggau ati ti gaga ke Israel, bansa ti pemadu besai. Nyanyi pantun puji, ‘TUHAN udah ngidupka nembiak Iya. Iya udah ngidupka nembiak Iya, iya nya orang Israel.’”

    Masmur Entara:

    Jeremiah 31: 10, 11 - 12AB, 13

    Saut (10d): TUHAN deka nyaga kitai baka pengibun bedus ke nyaga raban bedus iya.

    Ke Satu
    Pendingka Aku, semua kita bansa bukai, 
    lalu padahka jaku Aku di seberai tasik.

    Aku udah ngachirka bala nembiak Aku, 
    tang Aku deka ngempuruka sida baru 
    lalu nyaga sida baka pengibun bedus ke nyaga raban bedus iya.

    Saut: TUHAN deka nyaga kitai baka pengibun bedus ke nyaga raban bedus iya.

    Ke Dua
    Aku udah nebus orang Israel 
    lalu udah nebus sida ari siti bansa ti kering.

    Sida deka datai lalu belagu gaga ati ba Bukit Sion lalu deka gaga ke pemeri Aku.

    Saut: TUHAN deka nyaga kitai baka pengibun bedus ke nyaga raban bedus iya.

    Ke Tiga
    Udah nya sida indu ke agi biak, 
    deka betanda sereta lantang ati lalu sida ke lelaki, ke biak enggau ke tuai, deka rami gaga. 

    Aku deka merindang sida, lalu nukar ulit sida nyadi pengaga, ngubah ati sida ke balat tusah nyadi lantang.

    Saut: TUHAN deka nyaga kitai baka pengibun bedus ke nyaga raban bedus iya.

    Alleluia (peda Luke 7: 16)

    Alleluia, alleluia
    Nabi ke besai udah pegari ba bala kitai! 
    Allah Taala udah datai nulung nembiak Iya! Alleluia.

    Bacha Injil:

    Matthew 15: 21 - 28

    Jesus angkat ari endur nya lalu mupuk ngagai menua semak nengeri Tire enggau Sidon.

    Siku indu orang Kanaan ari menua nya mansang ngagai Jesus, lalu ngangau, 
    “Kasihka aku, O Tuhan, Anak David! Anak indu aku balat amat diperinsaka antu.”

    Tang Jesus enda nyaut iya. Sida murid datai lalu bejaku enggau Iya, “Buru indu nya, laban iya rauh-rauh betitihka kitai!”

    Jesus lalu nyaut, “Aku udah diasuh datai semina ngagai bedus orang Israel ke tesat.”

    Tang indu nya datai lalu besugang di mua Jesus, lalu bejaku, “Saup aku, Tuhan!”

    Ku Jesus nyaut, “Aku enda patut ngambi pemakai ari anak mit, lalu nibarka nya ngagai ukui.”

    Indu nya lalu nyaut, “Nya endang amat, Tuhan, tang indah ukui deh makai teda pemakai ti labuh ari mija tuan iya.”

    Jesus lalu nyaut iya, “Endu, besai pengarap nuan! Utai ti dikedekaka nuan, deka nyadi.” Anak indu iya lalu gerai tekala nya.

    No comments

    Post Top Ad