Anang enda nyikap diri, anak enggau penemu - Berita Iban Online

Header Ads

  • Baru Nyadi

    Anang enda nyikap diri, anak enggau penemu

    Willie Mongin

    KUCHING: Kelimpah bebendar ngetan hak tanah adat sereta kampung galau, rayat Sarawak mega patut ngenegapka penemu enggau pelajar ba bala anak.

    Pekara nya dipansutka Kaban Parlimen Puncak Borneo Willie Mongin rambau pengerami bejadika Seminar Orang Asal ba Palan Redeems, Bau ditu ensana.

    “Ba pengawa kitai ngetan hak bekaul enggau tanah adat sereta kampung galau perimba aki ini kelia, kitai mega patut nyikap diri empu enggau bala anak ngena penemu enggau pelajar, sekalika nya ba akademik tauka bidang pengelandik,” ku iya.

    Iya madah tu beguna amat laban nitih pansik PBB ke dibantai kena 15 Januari 2010, bisi siku ari tiga peranak asal idup merinsa enggau napi penusah ba serata menua.

    Tandu Willie berita keterubah dibantai PBB pasal pendiau rayat peranak asal ba dunya mandangka statistik ngirauka ati pasal penyeranta, pengerai, pelajar, pengawa, hak mensia, rampa menua enggau ke bukai.

    “Peranak asal ba serata dunya deka majak merinsa ketegal penyeranta, penanggul pengerai, penyalah enggau salah guna hak mensia ti enda meruan sereta pelajar ti ulih mansutka sida ari penyeranta,” ku iya.

    Pia mega, iya madah sida ke ngembuan pelajar deka ngembuan peluang ke besai ngasai pengidup ke lebih menyana sereta pansut ari pekuh penyeranta.

    “Endang utai dikeandal aku ngambi kitai orang asal terus ngemeratka pekara pelajar ba bala anak ngambi bansa kitai deka ulih besemekih enggau bansa bukai ba dunya diatu ti chukup mayuh pemar.

    “Nya alai, aku meransang semua kitai bebendar agi nempa nembiak rebak baru peranak asal ke disikap enggau penemu pasal hak sida ba tanah diri enggau pengeraja asal tang mega bisi penemu ke chukup dikena ngenegap awak sida ulih besemekih ba dunya kereja tauka ba pengawa dagang,’ ku iya.

    Berebak enggau nya, iya meri timbal ke manah ngagai pengawa piak Gerempung Ukai Perintah (NGO), lebih agi ari Serakup Orang Asal SeMalaysia (JOAS) ke udah ngatur seminar nya.

    “Nengah sekeda projek ke udah dipejalai, iya udah emri kitai siti chara tauka paradigma baru pasal cgara nyaga enggau ngetanka kualiti kampung enggau pengeraja asal ari ke dikeruga orang luar nengah kerejasama  komuniti enggau piak perintah.

    “Tu endang sebengkah ari chara ke manah enggau kelimpah nya mega mantu piak perintah bejalaika tanggungpengawa ngatur pesaka ke bisi ba kampung lebih agi dalam ngintu kampung galau,” ku iya.

    Berebak enggau nya, iya ngarap seminar baka nya patut diatur suah agi dikena meri penyedar pasal hak peranak asal, asil kampung sereta pengeraja asal. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads