Bangkai siku lelaki ditemu melepu di Sungai Sebiew, Bintulu - Berita Iban Online

Header Ads

  • Baru Nyadi

    Bangkai siku lelaki ditemu melepu di Sungai Sebiew, Bintulu

    DITEMU MELEPU: Raban bomba benung deka ngangkatka bangkai siku lelaki pansut ari Sungai Sebiew.

    BINTULU: Mensia mayuh ke diau besemak Sungai Sebiew ditu tekenyit sepengudah nemu bangkai siku lelaki melepu di sungai nya urung jam 6.50 pagi kemari.

    Ketuai Polis Pampang Bintulu Superintenden Zulkipli Suhaili maya ke ditanya pengarang berita madahka bangkai mansa lelaki beumur 20-an nya ditemu melepu, lungkup enggau semina bechawat aja ditisi sungai nya.

    “Sepengudah nerima penerang pasal bisi tetemuka bangkai nya segerup polis ari Opis Polis Pampang Bintulu berumban ngesah ke palan penusah kenyadi deka bejalaika pengawa nyidi enggau mansik,” ku iya.

    Ku Zulkipli, lebuh maya datai di palan penusah kenyadi bangkai siku lelaki ditemu piak iya melepu di sungai nya. 

    Polis minta bantu ari Bomba enggau Penyelamat Bintulu kena bejalaika pengawa ngambi bangkai mansa. 

    Ku iya, kes bedau temu enti nyema kes tu bekaul enggau kes jenayah laban nitihka asil pansik tumu nadai abi jamah tauka bakal ba tubuh mansa, tang semua nya nganti pemutus ari asil bedah tasat tu ila. 

    “Naka kediatu, kes tu diklasifikasika nyadi kes mati ngenyit, tang pengawa nyidi enggau mansik agi dipejalaika nitih penerang ke diterima kami,” ku iya.

    Zulkipli mega nesau mensia mayuh, sapa ke bisi bala diri sebilik nadai pulai ke rumah dalam kandang beberapa hari tu, tau betalipaun tauka ngenataika ngagai balai polis kesemak kena ngemuntangka pengawa ngelala bangkai mansa nya.

    Bangkai mansa udah nya dianjung 'Rumah Mayat Hospital Bintulu' kena bejalaika pengawa meresa enggau bedah tasat. 

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads