Biro Tatanegara (BTN) patut diketu, ku Lo - Berita Iban Online

Header Ads

  • Baru Nyadi

    Biro Tatanegara (BTN) patut diketu, ku Lo

    Lo Khere Chiang

    KUCHING: Biro Tatanegara (BTN) ti mayuh kontroversi patut diketu lalu ukai patut dialus tauka diberi nama baru.

    Kaban Kunsil Nengeri (ADUN) Batu Kitang, Lo Khere Chiang madah, laban nya entara pekara ti disemaya Pakatan Harapan (PH) dalam manifesto Pengawa Bepilih Besai Ke-14 (PRU14).

    Manifesto PH ba PRU14 besemaya ulih mutar sereta ngamatka beberapa isu dalam timpuh 100 hari.

    “Aku bepenemu BTN ti penuh kontroversi enda patut dialuska sereta diberi nama baru tang patut diketu tekala nya laban nya mega semaya PH dalam manifesto sida ba pengawa bepilih.

    “100 hari udah abis. Manifesto PH ti manah udah berengkah bau laban nyau deka nadai utai ke disemaya dikeamatka. Nyau siti-siti semaya pengawa bepilih diengkah ke tisi enggau mayuh tegal.

    “Aku sinuka pengundi ti tentu ngasaika sida dikemula,” ku iya nengah penerang berita iya, kemari.

    Bepelasarka ripot berita di Kuala Lumpur, madahka perintah bedau sedia madamka  BTN taja pan bisi sekeda piak ngansak ejensi ari baruh Opis Menteri Besai (JPM) nya ditutup.

    Taja pia ku Sapit Menteri ba JPM (Penyerakup Menua enggau Pengelantang Rama), Dr. Md. Farid Md. Rafik, sida benung ngaluska ejensi nya sebedau ngaga sebarang pemutus.

    Sebedau tu udah suah amat kaban politik PH enggau raban bansa madahka BTN nya ngasilka empas negatif.

    BTN nya dipadahka nyadi kereban propaganda politik, nerenak ulah begedi sereta takut entara bida bansa enggau jalai pengarap.

    Beduduk ari pekara nya, Farid besemaya deka ngemaruka nama sereta ngaluska BTN tang iya enda nerangka reti nya, ku Lo.

    “Sekalika dipejalaika enggau lurus? Sekalika ngaluska nya nempa mayuh agi penyerekang rayat Malaysia ari ke diatu? Bakani kitai ulih arapka nya enda lebih besai ari diatu? Bakani kitai deka nentu sekalika tu enda jauh ari juluk asal ‘nempa patriotisme enggau nasionalisme’ ngagai semua rayat Malaysia?.

    “Enggau pemayuh semaya ke digaga PH tang bedau ulih dikeamatka, aku irauka BTN enda dipadamka baka ti disemaya PH.

    “Aku ngarapka PH deka ngamatka semaya ke udah digaga enggau rayat sereta ukai nipu sida dikena ngulihka sukung,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads