Header Ads

  • Berita Tebaru

    Genturung pendiau asal mayuh sekut, perintah patut meri tanah lot

    Datuk Dr Juanda Jaya

    KUCHING: Perintah Sarawak dilanggur patut meri tanah lot ngagai anak Sarawak ke udah bisi ruang bilik lebih agi sida ke agi numpang rumah apai indai ba genturung pendiau asal di nengeri tu.

    Langgur penemu nya dibantaika Kaban Kunsil Nengeri (ADUN) Jemoreng Datuk Dr Juanda Jaya ti madah, pekara nya endang patut diperunding dikena mutar penanggul penyekut ba genturung pendiau asal.

    Tambah mega ku iya, tu betuju ngambika anak Sarawak ke udah bisi ruang bilik ngembuan tanah kediri dikena ngentak rumah.

    “Aku udah suah nyebut maya belaban bejaku ba Aum DUN bekaul pematut meri genap anak Sarawak ke udah bisi ruang bilik ba genturung pendiau asal tanah lot awak sida ulih ngentak rumah ba tanah diri empu.

    “Pekara tu nyadi laban rumah ke bisi genturung pendiau asal udah penuh nyadi diri sebilik nyau majak nambah ninting taun,” ku iya nengah WhatsApp ditu, kemari.

    Juanda nerang, pengawa meri tanah lot nya kala dipejalai maya jeman ex-kepala menteri  Tun Datuk Patinggi Abdul Rahman Ya’kub.

    Ku iya, sebaka enggau skim nangkir genturung pendiau ba  Kampung Gita enggau Kampung Malaysia Jaya, pengawa nya dipeda chukup mujur.

    “Nyadi buah penemu ke mujur digaga ke pemaik rayat baka tu patut ditampung sereta dikereja ba menua bukai.

    “Nya kebuah, aku minta baka ke suah disebut ba DUN ngelama tu iya nya seekar tanah tau dibagi ngagai empat iku diri sebilik,”ku iya.

    Kenu ku iya, Sarawak nengeri ke pemadu mayuh tanah.

    “Tanah Sarawak endang dipenggi rayat Sarawak, penemu tu patut disukung semua anak Sarawak, ku iya.

    Tambah mega, nyema nadai orang nyukung penemu tu, nyadi enda mayuh sida ke rebak baru ngembuan tanah enggau rumah ba menua asal diri. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: