Header Ads

  • Berita Tebaru

    #InjilSeharitu: 10 August 2018 - Hari Lima ba Minggu Ke Lapan Belas Musim Selama

    Ku Jesus bejaku ngagai sida murid Iya: “Enggau bendar Aku madah ngagai seduai, enti leka gandum enda labuh ke tanah lalu mati, iya deka mengkang semina leka aja. - John 12: 24 -26

    10 August 2018 - Hari Lima ba Minggu Ke Lapan Belas Musim Selama (Feast of Saint Lawrence, Deacon and Martyr)

    Bacha Ke Satu:

    2 Korint 9: 6 - 10

    Menyadi:
    Ingatka jaku tu: orang ke nanam mimit, deka ngetau mimit, lalu orang ke nanam mayuh, deka ngetau mayuh.

    Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Allah Taala rinduka orang ke meri enggau ati ti gaga.

    Lalu Allah Taala ulih meri kita semua macham berekat ti belimpah-limpah, ngambika lebuh kita seruran chukup semua utai, kita ulih meri mayuh utai kena ngereja genap bengkah pengawa ti badas.

    Munyi ti ditulis, “Iya meri enggau ati ti gerah mudah.  Iya meri ngagai orang ke seranta. Pengelurus Iya meruan belama iya.”

    Allah Taala, ke meri benih ngagai orang ke nanam, enggau roti ke pemakai, deka meri lalu nambahka semua utai kita, sereta nambahka asil pengelurus kita.

    Masmur Entara:

    Masmur 112: 1 - 2, 5 - 6, 7 - 8, 9

    Saut (peda 5): Beberekat meh orang ke gerah ati lalu nyali utai ngagai orang ti suntuk.

    Ke Satu
    Beberekat meh orang ke nangika TUHAN, 
    ke gaga ati ngasika pesan Iya.
    Bala peturun iya deka nyadi orang ke bekuasa dalam menua tu. 
    Peturun iya deka bulih berekat.

    Saut: Beberekat meh orang ke gerah ati lalu nyali utai ngagai orang ti suntuk.

    Ke Dua
    Lantang meh orang ke gerah ati nyali utai ngagai orang, ke bejalaika pengawa iya enggau atur ti lurus.
    Laban orang ke lurus nadai kala lebu. 
    Iya deka dikingatka belama iya.

    Saut: Beberekat meh orang ke gerah ati lalu nyali utai ngagai orang ti suntuk.

    Ke Tiga
    Iya enda takut nerima berita ti enda manah. 
    Ati iya tegap, lalu iya manggaika pengarap iya ba TUHAN.
    Iya enda irau ati tauka takut, datai ke meda munsuh iya alah.

    Saut: Beberekat meh orang ke gerah ati lalu nyali utai ngagai orang ti suntuk.

    Ke Empat
    Iya meri utai enggau ati ti gerah mudah ngagai orang ke suntuk, lalu penelap iya nadai kala puntan. 
    Iya deka nyadi orang ke bekuasa sereta dibasa orang.

    Saut: Beberekat meh orang ke gerah ati lalu nyali utai ngagai orang ti suntuk.

    Alleluia (peda John 8: 12BC)

    Alleluia, alleluia
    Barang sapa nitihka Aku, enda bejalai dalam pemetang, tang deka ngembuan penampak ti meri pengidup, ku TUHAN.
    Alleluia.

    Bacha Injil:

    John 12: 24 - 26

    Ku Jesus bejaku ngagai sida murid Iya:
    “Enggau bendar Aku madah ngagai seduai, enti leka gandum enda labuh ke tanah lalu mati, iya deka mengkang semina leka aja.

    Tang enti iya mati, iya deka bebuah lebat.

    Orang ke sayauka nyawa diri, deka ngelenyauka iya, lalu orang ke begedika nyawa diri di dunya tu, deka bulih pengidup ti meruan belama iya.

    Barang sapa deka betuaika Aku, enda tau enda nitihka Aku, lalu dia alai Aku, dia meh endur alai orang ke betuaika Aku. Apai deka ngemesaika orang ke betuaika Aku.”

    No comments

    Post Top Ad