Header Ads

  • Berita Tebaru

    #InjilSeharitu: 7 August 2018 - Hari Dua ba Minggu Ke Lapan Belas Musim Selama

    Ku Jesus, “Kitu ke nuan!” Peter lalu angkat ari perau lalu bejalai ba atas ai mansang ngagai Jesus. -Matthew 14: 22 - 36

    Bacha Ke Satu:

    Jeremiah 30: 1 - 2, 12 - 15, 18 - 22

    Ku TUHAN Allah Taala ke disembah orang Israel bejaku ngagai aku,
    “Tuliska dalam siti bup semua utai ti udah dipadahka Aku ngagai nuan.”

    Ku TUHAN bejaku ngagai bala nembiak Iya,
    “Bakal kita enda ulih gerai. Telih kita enda ulih gerai.

    Kita nadai orang ngibun, nadai ubat kena ngubat rumbak kita, nadai ulih ngarapka diri digeraika.

    Semua ambai kita nadai agi ingatka kita. Sida nadai agi ibuhka kita. Aku udah nyerang kita baka munsuh. Ukum kita amat berat laban dosa kita mayuh lalu penyai kita besai.

    Anang agi mutapka telih kita. Kita nadai ulih gerai. Aku ngukum kita baka tu laban dosa kita mayuh lalu penyai kita besai.”

    Ku TUHAN bejaku,
    “Aku deka mai bala nembiak Aku pulai baru ngagai menua sida empu lalu kasihka genap ruang bilik sida. Jerusalem deka digaga baru, lalu istana di nengeri nya deka digaga baru.

    Orang ke diau dia deka belagu pantun puji. Sida deka manjung gaga ati. Ulih berekat ari Aku, pemayuh tubuh sida deka nambah-menambah. Berekat ari Aku deka ngasuh sida dibasa orang.

    Aku deka mulaika kuasa sida ke lama menya ngagai bansa sida tu baru lalu nudukka sida tegap di mua Aku. Aku deka ngukum semua orang ke nekanka pengidup sida.

    Orang ke megai sida deka datai ari bansa sida empu, anak raja sida, ari bala sida empu. Iya deka datai ngadap Aku lebuh Aku ngangauka iya, laban sapa berani datai, enti iya enda dikangauka? Sida deka nyadi nembiak Aku, lalu Aku deka nyadi Allah Taala sida. Aku ti TUHAN, udah bejaku.”

    Masmur Entara:

    Masmur 102: 15 - 17, 18 - 20, 28 & 21 - 22

    Saut (peda 16): TUHAN deka ngaga Sion baru, lalu mandangka pemesai kuasa Iya.

    Ke Satu
    Semua bansa deka nangika TUHAN.
    Semua raja di dunya deka nangika kuasa Iya.

    Lebuh TUHAN ngaga Sion baru,
    Iya deka mandangka pemesai kuasa Iya.

    Iya deka ningaka bala nembiak Iya ti udah ditinggalka Iya,
    lalu mendingka sampi sida.

    Saut: TUHAN deka ngaga Sion baru, lalu mandangka pemesai kuasa Iya.

    Ke Dua
    Tuliska utai ti udah dikereja TUHAN ke rebak ti dudi,
    ngambika orang ke apin ada diatu, deka muji Iya.

    TUHAN nilik ke baruh ari endur Iya ti kudus ba endur ti tinggi,
    Iya nilik ke baruh ari serega ngagai dunya.
    Iya ninga demuh orang jil
    lalu ngelepaska orang ke kena ukum bunuh.

    Saut: TUHAN deka ngaga Sion baru, lalu mandangka pemesai kuasa Iya.

    Ke Tiga
    Bala anak kami deka diau likun,
    lalu ari jaga Nuan peturun sida deka diau likun.

    Nya alai nama Iya deka disebut di Sion,
    lalu Iya deka dipuji di Jerusalem
    lebuh semua bansa enggau perintah
    begempuru lalu nyembah TUHAN.

    Saut: TUHAN deka ngaga Sion baru, lalu mandangka pemesai kuasa Iya.

    Alleluia (peda John 1: 49B)

    Alleluia, alleluia
    Pengajar, Nuan amat Anak Allah Taala!
    Nuan tu meh Raja orang Israel!
    Alleluia.

    Bacha Injil:

    Matthew 14: 22 - 36

    Udah nya Jesus ngasuh sida murid nepan perau lalu mupuk dulu ke seberai danau nya, lalu Iya Empu ngasuh orang mayuh pulai.

    Lebuh Iya udah ngasuh orang mayuh pulai, Iya lalu niki ngagai bukit sigi, deka besampi. Lebuh hari nyau lemai, semina Jesus aja bisi dia.

    Tang ba urung maya nya, perau ti ditepan sida murid nyau udah jauh ari tebing lalu dipangkaka gelumbang, laban sida nanjak ribut.

    Ba entara pukul tiga enggau pukul enam pagi, Jesus mansang ngagai sida, bejalai ba atas ai.

    Tang lebuh sida meda Iya bejalai ba atas ai, sida balat amat takut, lalu nyerauh, “Antu!”
    Tang Jesus lalu tekala nya bejaku enggau sida. Ku Iya, “Anang takut! Aku tu. Anang takut!”

    Peter lalu nyaut Iya. “Tuhan, enti nya amat Nuan, asuh aku bejalai ba atas ai ngagai Nuan.”

    Ku Jesus, “Kitu ke nuan!” Peter lalu angkat ari perau lalu bejalai ba atas ai mansang ngagai Jesus.

    Tang lebuh iya meda pemalat ribut, iya takut, lalu lebuh iya baru deka belabuh tengelam, iya lalu nyerauh, “Tuhan, selamatka aku!”

    Jesus lalu tekala nya nyapai iya, lalu bejaku, “Mit amat meh pengarap nuan! Nama kebuah nuan kakang?”

    Lebuh seduai iya nepan ngagai perau, ribut lalu teduh.

    Sida ke dalam perau nya lalu nyembah Iya. Ku sida, “Nuan amat Anak Allah Taala!”

    Lebuh sida udah ngelayang ke seberai, sida lalu sangkai di Genesaret.

    Lalu lebuh orang ke di menua nya ngelala Jesus, sida lalu mesanka orang ari serata menua nya, lalu sida mai ngagai Jesus semua orang ke sakit, minta Iya nejuka sida negu puting kelambi Iya, lalu semua orang ke negu puting kelambi Iya, gerai magang.

    Tauka:

    Matthew 15: 1 - 2, 10 - 14

    Udah nya orang Parisi enggau sida pengajar Adat datai ari Jerusalem ngagai Jesus, lalu bejaku,

    “Nama kebuah sida murid Nuan ngelanggar adat asal aki ini kitai, enda masu jari sida sebedau sida makai!”

    Jesus lalu ngangauka orang mayuh ngagai Iya, lalu bejaku ngagai sida, “Pendingka tu ulih kita, ngambika kita mereti!

    Utai ti tama ngagai nyawa orang, nadai ngasuh iya enda tuchi, tang utai ti pansut ari nyawa iya, nya utai ti ngasuh iya enda tuchi.”

    Udah nya, sida murid Iya datai lalu bejaku enggau Iya, “Kati Nuan nemu orang Parisi pedis ati ninga utai ti disebut Nuan?”
    Disaut Jesus, “Semua utai ti tumbuh, ti ukai ditanam Apai Aku ti di serega, deka dichabut magang.

    Anang ibuhka sida. Sida nya malin ke buta. Lalu enti malin ke buta ngiring orang ke buta, seduai iya deka sama labuh ngagai lubang kebung.”

    No comments

    Post Top Ad