"Nama kebuah 'sayang' ngereja pengawa tu?," ku bini saspek - Berita Iban Online

Header Ads

  • Baru Nyadi

    "Nama kebuah 'sayang' ngereja pengawa tu?," ku bini saspek

    Saspek enchuri kantung duit ditanchang orang mayuh ba Pasar Tamu Putatan.

    PENAMPANG: Anchur luluh hati siku indu maya tepadaka laki iya digagai enggau dijamah sebedau ditanchang orang mayuh ba Pasar Tamu Putatan, ditu, pagi tadi.

    Penusah nyadi urung jam 8.30 pagi tadi, saspek dipechaya nguji ngambi kantung duit siku indu tang mujur ditangkap orang mayuh sepengudah mansa ngerauh minta tolong.

    Suspek udah nya ditanchang jari serayaka nganti polis datai, sebedau nya bisi siku indu mansang semak lalu merap saspek.

    “Nama kebuah 'sayang' ngereja pengawa tu? 'Sayang' patut bisi ba rumah maya tu,” ku serabana siku indu dipechayaka bini lelaki ke kena tanchang orang mayuh. 

    Indu nya nyabak enggau enda badu-badu nanya nama kebuah lelaki nya ngereja pengawa nya. 

    Orang mayuh pan nyau berasai sinu sepengudah meda indu nya nyabak enggau ninga serabana iya. Kelimpah ari begedi ngagai lelaki iya ke udah nyadi orang ngereja penyalah 'jenayah' enggau ngenusahka orang bukai. 

    Enda lama udah nya, seraban polis datai ba palan penusah nyadi sepengudah nerima penerang bekaul enggau penusah nyadi. 

    Saspek udah nya dibai ke Balai Polis Putatan kena nasat silik.

    Ketuai Polis Pampang Penampang, Deputi Superintendan Mohd Haris Ibrahim maya ke ditelefon madah, saspek ditangkap sepengudah dipechaya ngereja penyalah jenayah ianya enchuri kantung duit siku indu ba pasar tamu nya. 

    “Saspek beumur 30-an ditan kena nasat silik agi enggau kes tu dipansik ari baruh Seksyen 379 Kanun Keseksaan laban enchuri,” ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads