Opis Tanah enggau Survei Sibu penuh endur mensia mayuh ketegal deka minta skim tanah - Berita Iban Online

Header Ads

  • Baru Nyadi

    Opis Tanah enggau Survei Sibu penuh endur mensia mayuh ketegal deka minta skim tanah

    Notis Pemadah ngagai mensia mayuh.

    SIBU: Opis Tanah enggau Survei Pampang Sibu penuh endur mensia mayuh sehari tu tadi sepengudah nemu sentang notis pemadah (notis pemberitahuan) minta skim tanah dikena ngaga rumah di "Skim Pembesaran Kampung Bukit Lima Fasa I".

    Nitihka ke diterima kami, urung penyampau beratus iku orang ke bisi nganti ba mua pintu penamak opis nya urung jam 12.00 tadi laban deka ngambi pom minta skim tanah nya (borang permohonan).

    Urung jam 2.30 lemai tadi, mua pintu penamak Opis Tanah enggau Survei Pampang Sibu nya agi ditutup enggau pom minta skim tanah lalu bedau disadung ngagai bala mayuh ke benung nganti di mua opis nya. 

    Nya kebuah bala ke bisi nganti dia enyauka charut ketegal enda ulih besabar sereta kelalu lama nganti pom lot tanah nya ke disadung. 

    Taja pia, sida ulih dirara Pengari ari Opis Tanah enggau Survei Sibu enggau madahka pom Skim Tanah nya nadai limit enggau ulih dipinta kena Hari Satu nyentukka Hari lima.

    Pom Skim Tanah belabuh disadung urung jam 3.00 lemai enggau bisi mega bala keduak udah mupuk dulu mulaika kediri laban enda tan ati nganti kelalu lama. 

    Notis Skim Tanah nya mega, bisi dibuka ngagai genturung pendiau Bumiputera Islam ari Kampung Datu, Kampung Hilir, Kampung Baharu, Kampung Nangka enggau Kampung Usahajaya Baru.

    Tang, Pengari ari Opis Tanah enggau Survei Sibu enggai meri meri komen sentang syarat 'penduduk Bumiputera Islam'.

    Pengari ari Opis Tanah enggau Survei Sibu nya semina madahka pekara nya deka diterangka piak Opis Tanah enggau Survei di Kuching.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads