Header Ads

  • Berita Tebaru

    Palan endur ngurung ukui lelang deka ditumbuhka

    GAMBAR PENGIAS: Ukui lelang benung makai uras ba tisi jalai.

    KUCHING: Perintah nengeri ngemendar pengawa ngaga palan endur ngurung ukui lelang di Mengeri Kuching, Sibu enggau Miri. 

    Menteri Opis Kunsil enggau Pengawa Berumah Datuk Dr Sim Kui Hian madah palan nya dikearap ulih nyaup ngetuka pengerembai sakit rabies ketegal ti diketup ukui. 

    ‘Palan ukai semina nyendia endur ngurung sereta ngintu ukui lelang, tang dikena nentuka ukui diperiri ngambika enda majak mayuh. 

    “Tu sebengkah pemutus perintah nengeri ba pengeran ngelaban keruga sakit rabies lalu nentuka Sarawak diseliah ari penyakit nya,” ku Dr. Sim. 

    Iya mansutka jaku nya ba pengerami ngintu genap 22 taun Opis Kunsil Kandang Padawan (MPP) ditu, kemari. 

    Dr Sim nambah opis menteri diatu benung ngiga kandang endur ke engkeman endur numbuhka palan nya. 

    Ku iya, enti udah ngepunka operasyen jemah, Serakup Nagang Ulah Jai enggau Jelu (SSPCA) deka mantu perintah ngintu ukui lelang ke dikurung. 

    Ngenang kaul ke sama, Dr Sim minta opis kunsil bejalaika tanggungpengawa nentuka kandang endur ke dikuasa nadai ukui lelang. 

    Entara sekeda atur ke patut diperati ku Dr Sim iya nya anang sekali meri ukui lelang makai ketegal ulah nya deka ngasuh ukui nya datai berari. 

    Kelimpah ari nya opis kunsil meseti ngelalau orang ke ngempu ukui ngambika enda ngelepas ukui sida sengapa. 

    “Mayuh pekara patut digaga dikena nentuka Sarawak diseliah ari sakit rabies. Rabies mega ngerampit mayau. 

    “Kes pemadu baru di Padungan, virus rabies ngerampit chit pengudah mayau, tau nyadi udah tu ila rabies ngerampit jelu  bukai baka chapi, babi... tu balat enda manah,’ ku iya. 

    Iya nambah, majoriti kes rampit rabies di Sarawak bekaul enggau ukui. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: