Header Ads

  • Berita Tebaru

    Pemujur politik Dayak di nengeri tu bepun ari penyerakup raban nembiak

    BESERAKUP DALAM POLITIK DAYAK: (ari lima kiba, belakang) Cobbold, Guro Siang enggau Julius sereta bala bukai begambar kenang begulai enggau nembiak Guro Siang ti tamat belajar kuntau di Sibu, empai lama.

    SIBU: Pemujur enggau pengelantang politik Dayak ba nengeri tu bela bepun ari penyerakup enggau sukung raban nembiak kemaya hari.

    Presiden Parti Bansa Dayak Sarawak (PBDS) Cobbold John madah, pemujur nya deka dipunka enggau chura politik Dayak ti randaka penyerakup semua nyengkaum bala nembiak.

    “Nya alai, aku ngansak nembiak kitai ngambika beserakup ba dunya politik Dayak.

    “Ari penyerakup ke tegut enda ngira tikas umur dia politik kitai Dayak deka bulih pemujur enggau pengelantang,” pia ku iya madah maya dipebasa bejadi pengawa tamat kuntau nembiak Pencha Spring Sarawak ba kelang Guro John Siang di Batu 16, Jalai Sibu-Bintulu, empai lama.

    Nambahka jaku iya, Cobbold bela meransang rebak baru diatu enda betinggal beratika ubah politik kemaya hari.

    “Ba politik mega kitai ngarap bala nembiak liat ati napi nama-nama penguji ti datai ari politik,” ku iya madah baru.

    Awak tu mega dikena iya ngelalau raban pati parti PBDS di sitak tengah sama bela besaup bejalaika tanggungpengawa parti sida.

    Iya madah, tanggungpengawa nya enda ulih dikereja siku ketuai pati parti aja enti nadai saup ari raban bukai.

    Chairman PBDS Sibu Julius Enchana ba jaku iya maya tu bela besetujuka penemu Cobbold ti madahka raban parti nyadika pengering ngagai PBDS.

    “Nya alai, kitai semua meseti regas bejalaika tuju penumbuh parti ti ngelawa tuju Dayak Baru, Agenda Baru tauka Sarawak Baru,” pia ku iya madah.

    Iya mega maya tu beterima kasih ngagai mensia mayuh ti udah ngerejister nyadi raban dalam parti nya lebih agi ari menua Bejait, Kanowit iya nya menua penatai Presiden keterubah PBDS suba, Tan Sri Datuk Amar Leo Moggie Irok.

    “Kitai mega temegah ati laban bisi kaban ke lama suba diatu udah mulaika diri begulai enggau kitai baru ba PBDS,” ku iya madah.

    Kelimpah ari nya, Julius maya tu bekunsika ‘Dayak Agenda’ enggau ‘Dayak Dilema’ ngagai mensia mayuh ke bisi datai.

    Pengawa tamat sehari nya mega dikemujur Guro John Siang empu ti mega Ketuai PBDS pati Pasai Bon, Wen Achat (Bejait) enggau Anjie Selie (Pasai Siong). #UtusanBorneo

    No comments

    Post Top Ad