Pemutus kes tanah nyauka setaun nadai didinga rita - Berita Iban Online

Header Ads

  • Baru Nyadi

    Pemutus kes tanah nyauka setaun nadai didinga rita

    ENDA PUAS ATI: Peranak Kampung Lebur ngatur gempuru likun di pintu penama TH Plantation kemari minta isu tanah NCR sida diputar enggau lengkas.

    KUCHING: Peranak Kampung Lebur di Jalai Gedong, Serian kemari ngatur gempuru likun di pintu penama TH Plantation Berhad. 

    Gempuru nya diuluka Marida Anak Jalai sereta digulu 99 ketuai ruang bilik Kampung Lebur ke alai gempuru nya diatur enggau tuju ngansak isu tanah adat NCR ke malut sida diputar enggau lengkas. 

    “Aku ke nyadi affidavit kedua ke asal ngenanka hak tanah di Kampung Lebur ke mungkur 186 iku ketuai ruang bilik berasai enda lantang ketegal isu tanah NCR Sungai Tampoi baka ke nadai berita agi tajapan pemutus Kort Federal udah dibacha kena 13 Oktober 2017. 

    “Surat bantah ke bekaul enggau proses nuntut tauka minta tanah udah dikenataika JKK Kampung Lebur ngagai 'Biro Pengaduan Awam' kena 5 Disember 2017 lalu bela dituju ngagai Perintah Nengeri Sarawak enggau LCDA, tang nyentuk ke diatu mengkang enda dibalas,” ku iya. 

    Berindik enggau nya ku Marida, gempuru likun nya diatur enggau tuju minta ejensi ke bekaul meri penerang lalu mutarka isu tanah NCR Kampung Lebur enggau lengkas. 

    Nitihka penerang Marida, isu tanah NCR Kampung Lebur nyadi siti isu tanah ke pemadu mar ba sejarah Sarawak. 

    Ku iya, ba proses nuntut tanah nya, peranak Kampung Lebur udah 2 kali menang pechara kort.

    “Kena 23 Februari 2012, Kort Tinggi Sabah Sarawak mutuska diak peranak Kampung Lebur bisi hak ba tanah temuda Sungai Tampoi pemesai 316.20 hektar.

    “Perintah nengeri enggau LCDA udah nya minta ngagai Kort Apil, tang pinta sida ditulak Kort Tinggi Sabah Sarawak kena 27 September 2013,’ku Marida.

    Marida nambah, petisyen ‘out of court settlement’ bisi digaga 99 iku ketuai ruang bilik ke mungkur penghulu, tuai rumah enggau  JKK lalu udah disuaka ngagai luyar Baru Bian enggau See Chee How.

    Tang ku Marida, luyar ke dikearap nya enda ngemujur dokumen sida lalu ngujungka kes tanah Kampung Lebur dipechara ba Kort Federal.

    Pechara nya ku Marida matak 87 iku ketuai ruang bilik Kampung Lebur ti betuaika Tr. Nyutan Ak Jami ti ngujungka sida alah ngelaban TH Plantation Berhad lalu tanah sida diempu Perintah Nengeri.

    “Tajapia, nadai bayar pampas diberi ngagai peranak Kampung Lebur pengudah 10 bulan Kort Federal netapka pemutus,”ku Marida.

    JKKK Kampung Lebur ku Marida nambah nerima pemutus Kort Federal nya lalu enti tanah NCR sida udah enda ulih dinan agi, sida enggau nyemetak minta perintah mayar pampas nitihka rega tanah maya ke diatu.

    “Kami minta luyar ke dikearap mantaika mua diri lalu nyaup mutarka kes tu.

    “Kami mega minta perintah nengeri masuk champur enti luyar nya mengkang enggai mantaika diri lalu mutarka penyarut tu,” ku Marida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads