Header Ads

  • Berita Tebaru

    Perintah nengeri ngatur program nerangka ubah Kanun Tanah Sarawak

    Penguang

    MARUDI: Perintah nengeri deka ngatur ‘roadshow’ ba pengawa meri penerang silik ngagai rayat nengeri tu senentang ubah Kanun Tanah Sarawak 2018 baka ti udah dikemendar ba Aum Kunsil Nengeri (DUN) apin lama ke udah.

    Menteri Muda Kaunsil Kandang Menua, Datu Dr. Penguang Manggil madahka program tu deka diatur abis tumu bulan September tu, tuju iya deka nerang silik enggau dalam agi bekaul semua ubah ti bisi dalam nya.

    “Nya kebuah aku nangkan rayat kelebih agi peranak rumah panjai anang saru penemu pasal penerang ti diterima.

    “Tang komiti tanah Hak Adat Bansa Asal (NCR) Kabinet Nengeri diketuaika Sapit Kepala Menteri, Datuk Amar Douglas Uggah Embas, deka ngatur pejalai berengkah ari bulan September tu ila, meri penerang lenak sentang ubah nya enggau isi iya,” ku iya.

    Pengguang mansutka jaku nya lebuh bejaku bejadika Gawai Mangkung Tiang rumah panjai baru ti betuaika Tuai Rumah (TR) Jelaping Jali di Sungai Arang B, Bakong Hilir, apin lama ke udah.

    Berindik ari nya, iya minta semua ketuai komuniti, ketuai bansa enggau bala kaunsilor ngulu atur pejalai tu ila.

    Penguang ti mega Kaban Kunsil Nengeri (ADUN) Marudi, ba jaku dipansutka iya udah nya minta semua parti ngambika meri sukung tegut ngagai Perintah Nengeri enggau Gabungan Parti Sarawak (GPS), ba pengawa mulaika baru hak nengeri tu, ti enda dikeibuh.

    Ku iya, GPS iya nya parti ungkup rayat Sarawak, datai ari nengeri tu empu lalu ditumbuh khas gawa negika hak enggau peminta rayat nengeri tu, semina ditemu rayat Sarawak aja.

    Ba lansa bukai, nya ngelalau semua tuai rumah ngaga akaun ungkup Komiti Pemansang enggau Pengelikun Genturung Pendiau (JKKK) rumah panjai enggau genturung pendiau sida empu ngambi ngemuntangka agi bantu enggau agih belanja Projek Mit Pemansang Menua Pesisir (MRP) perintah diberi terus ngagai akaun dipenggi rumah panjai sida.

    Berebak enggau pengerami nya, Penguang mega bisi nyuaka geran MRP ngagai JKKK Rumah Jelaping penyampau RM20,000; Biro Indu Rumah Jelaping RM10,000; Serakup Apai Indai enggau Pengajar (PIBG) Sekula Primari (SK) Sungai Arang RM5,000.

    Pia mega iya bisi ngemendarka Projek Transformasyen Menua Pesisir (RTP) ungkup taun 2018, dikena nyeleti jalai ngelawa Rumah Sayun enggau Rumah Jelaping.

    Dulu ari nya, Penguang mega bisi ngatur pejalai ngabas Rumah Mering, di Sungai Biar, Bakong lalu nyuaka geran MRP ngagai JKKK Rumah Mering, penyampau RM24,000; Biro Indu Rumah Mering nerima RM5,000, JKKK Rumah Ngumbang Tia (RM25,000) enggau PIBG SK Sungai Biar, Bakong (RM10,000) sereta mega nyuaka geran MRP sepenyampau RM40,000 ari Douglas Uggah ngagai JKKK Rumah Benang Pilang.

    Sama bisi datai bini iya, Datin Monica Jaya, Sekretari Politik Kepala Menteri, Alexander Asing, sereta bala tuai rumah panjai enggau peranak diau ngelingi. #UtusanBorneo

    No comments

    Post Top Ad