Polis nangkap polis? - Berita Iban Online

Header Ads

  • Baru Nyadi

    Polis nangkap polis?

    Gambar Pengias.

    KOTA BHARU: Tiga iku raban polis, siku ari suspek baru gawa empat bulan ditangkap sepengudah tiga jam ngerumpak enam iku lelaki ba sebuah rumah di Cherang, ditu tumu pagi tadi.

    Seiku Sarjan enggau dua Konstabel polis beumur 20-an nya ditangkap enggau mata duit penyampau RM2,710, pistol sereta digelang jari ba tisi Jalai Kota Bharu-Kuala Krai urung jam 2.30 pagi nyentuk 3 pagi.

    Sapi Ketuai Polis Kelantan, Datuk Din Ahmad madah maya kes nyadi, kesemua suspek nepan kerita Nissan Navara nuju ke sebuah rumah di Cherang urung jam 12.05 tengah malam.

    Ku iya, suspek bisi mai pistol enggau gelang jari tama ke dalam rumah nya sebedau ngasuh enam iku lelaki ke bisi ba bilik besai mansutka kerepai sida iya sebedau ngerampas duit ari mansa. 

    “Suspek enda puas ati lalu ngambi kad bank ari dua iku mansa ke beumur 19 enggau 41 taun, lalu mai mansa mansutka duit ba mesin ngemansutka duit automatik ba bank di Kota Bharu.

    “Tang semina siti kad bank ke ulih kena enggau ngasuh mansa ngemansutka mata duit penyampau RM2,000.

    “Mansa pengudah nya dibai pulai ke rumah sebedau sida iya ngeripot ngagai polis,” ku iya madahka bala pengarang berita di Opis Polis Kontinjen (IPK) ditu sehari tu tadi.

    Nitihka penerang, suspek iya keterubah udah mujur ditangkap begulai enggau kerita ke dikena sida iya ba Jalai Kota Bharu-Kuala Krai urung jam 2.30 pagi.

    “Sepengudah tanya tasat tumu dipejalai, suspek betalipaun enggau dua kaban iya sebedau sida iya mujur ditangkap ba Jalai Kota Bharu-Kualai Krai. Sida iya pengudah nya dibai ke balai polis kena bejalaika pengawa silik agi.

    “Semua suspek ke gawa di Kontinjen Pantai Timur direman pengelama tujuh belabuh ari sehari tu nyentuk 22 Ogos tu nitihka Seksyen 395 Kanun Keseksaan,” ku iya.

    Ku iya, kes tu agi dipansik taja pan suspek nadai kala ngembuan sebarang rikod jenayah lama. 

    “Kami enda bechiping enggau bala kemesai tauka staf polis ke ngereja pengawa ti salah ari undang-undang,” ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads