Polis nangkap siku penyaga anak mit, baby balat bedarah ba untak - Berita Iban Online

Header Ads

  • Baru Nyadi

    Polis nangkap siku penyaga anak mit, baby balat bedarah ba untak

    Baby (mansa) diatu benung diperubat ba Sepital Tuanku Ja’afar Seremban (HTJS).

    SEREMBAN: Polis nangkap siku penyaga anak mit (ama) ke dipechayaka bisi bekaul enggau kes siku baby (anak mit) beumur empat bulan ke balat bakal ba untak enggau mansa diatu benung diperubat ba Sepital Tuanku Ja’afar Seremban (HTJS) ditu.

    Ketuai Polis Pampang Seremban, Asisten Komisioner Thiew Hock Poh, madah saspek indu, beumur 23 taun, ditan polis ba Opis Polis Pampang Seremban ditu, urung  jam 8.45 malam tadi.

    “Saspek deka baie ke Mahkamah Seremban pagi kena minta pemendar ngetan tauka reman saspek, kena mantu mansik kes ari baruh Seksyen 31(1)(a) Akta Kanak-Kanak 2001,” ku iya maya ke dirandau pengarang berita, malam tadi.

    Sebedau tu, baby lelaki ke dikelala enggau nama Muhammad Ummar Zayyan Muhammad Haikal Hafiz, balat bakal ketegal bedarah dalam untak enggau mata pengudah enda ngeleda tauka enda nemu diri ba rumah penyaga iya ditu, hari satu tu tadi.

    Indai iya, Zura Emilia Mokhtar, 26 taun, maya ke ditanya pengarang berita, madah anak iya nya, dianjung ke rumah penyaga ke ditemu tauka kelala iya ari social media Facebook, urung pengelama seminggu sebedau penusah ke enda disadang nyadi.

    “Hari satu tu tadi, aku bisi nerima kangau ari orang ke nyaga (ama) madahka anak aku enda ngeleda tauka nemu diri. Berindik ari nya, laki aku lalu ngambi anak tua iya enggau berumban nganjung ke HTJS ngambika ulih diperubat enggau silik agi,” ku iya.

    Penusah ke ditapi baby nya nyau 'viral' ba media Facebook kemari, maya siku lelaki madah lutur bisi tetemuka bekau kembai ba perut enggau pah baby nya. Orang mayuh (pemacha) ke bisi macha artikel nya, nyalahka penyaga anak mit nya laban dipechayaka nyamah baby nya. 

    Berindik ari artikel nya, ku Zura Emilia, iya enda nemu sentang artikel nya nyau viral ba social media enggau iya enggai nyalahka sapa-sapa maya tu. Awak ka polis bejalaika pengawa mansik tu enggau silik.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads