Header Ads

  • Berita Tebaru

    Sebuah rumah panjai ba jalai Lubok Antu, napi penusah angus

    DI PALAN PENUSAH NYADI: Siti blok rumah panjai ba Rumah Engkabi Jamu, San Semanju ditu dituntung penusah angus pagi tadi. 📷#Facebook

    ENGKILILI: Siti blok rumah panjai ba Rumah Engkabi Jamu, San Semanju ditu dituntung penusah angus pagi tadi.

    Enam pintu rumah angus lengis lalu tiga pintu ke bukai mujur diselamat.

    Penusah angus diripotka nyadi urung pukul 8 pagi lalu ngujungka 46 iku sida ke diau dia semina tinggal gari ba tubuh aja.

    Piak Bomba bisi nerima kangau urung pukul 8.21 pagi. Bekau ari nya, seraban bomba ari Balai Bomba enggau Penyah Penusah Betong berumban ngesah palan penusah kelimpah disaup raban Bomba ari Balai Bomba enggau Penyah Penusah Sri Aman.

    Pengudah datai ba palan penusah api endang udah nganguska enam pintu rumah lalu bomba mujur ngerara api ari majak nyerarai ngagai sekeda rumah ke berimbai.

    Nadai penusah bakal diripot nyadi lalu kebuah penusah nyadi agi dipansik.

    Rumah Engkabi, San Semanju bisi 60 pintu tang dientak nyembuah ari pangan diri.

    Blok rumah panjai ke angus seberai Sekula Primari (SK) San Semanju.

    Berebak enggau nya, Kaban Kunsil Nengeri (ADUN) Engkilili Dr Johnical Rayong Ngipa enggau Pemesai Opis Kaunsil Pelilih Lubok Antu Engkilili Richard Ngumbang terus datai ngesah penusah pengudah ninga berita nya urung pukul 2 lemai.

    Ku iya, ba atur tumu semua sida ke ditinggang penusah diasuh ngenduh ba ba bilik kelas lama ba SK San Semanju.

    “Semua 46 iku sida ke tasah deka dijaga piak JKM enggau manah lebih agi ba sukut pemakai enggau utai irup,” ku iya.

    Seraya ngenataika penyinu ati bekaul enggau penusah nya, Dr Rayong ngarap penusah ke baka nya nadai agi nyadi lalu ngelalau peranak rumah panjai patut bejimat maya nyumai, ngena perengka elektrik enggau sebarang aja utai ke ulih ngasuh rumah angus.

    “Manah agi kitai karam ba ai laban nadai lenyau reta tengkira tang nyema nyadi penusah angus baka tu tentu kitai deka rugi besai... Ukai semina lenyau reta tengkira tang mega deka ngaga rumah baru tentu beguna timpuh ke lama,” ku iya.

    “Taja pia, aku beterima kasih ngagai Tuhan laban penusah tu nadai orang bebadi nyawa semina angus ba reta tengkira,” ku iya.

    Bela bisi datai Pemesai Pengintu Pengelantang Pendiau (JKM) Nengeri, Tiong Kunyok, Pemesai JKM Pelilih Lubok Antu Sanggat Rangia, pengari opis perintah enggau bala ketuai raban bansa ke besemak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: