Siku lelaki ditemu enda enseput ba sebuah hotel di Jalai Kuching - Samarahan - Berita Iban Online

Header Ads

  • Baru Nyadi

    Siku lelaki ditemu enda enseput ba sebuah hotel di Jalai Kuching - Samarahan

    DIPALAN PENUSAH NYADI:Pintu bilik mansa dirumpang ngambika staf ulih tama dalam enggau meresa bilik.

    KOTA SAMARAHAN: Siku lelaki ditemu enda enseput ba dalam bilik sebuah hotel di Jalai Kuching-Samarahan, lemai kemari.

    Mansa ke dikelala enggau nama Chen Keat Choon, 48 taun, ditemu staf hotel nya benung gali urung jam 6.20 lemai, sepengudah lelaki nya enda pansut ari bilik nya tauka nadai ngaga 'check out'.

    Ketuai Polis Pampang Samarahan, Deputi Superintendan Lee Chong Chern madah, lelaki nya tama 'check in' ba hotel nya kena Hari Dua tu tadi enggau iya patut ngerejista pansut kemari.

    Ku iya, staf hotel deka lelaki agi ka diau dia ba hotel nya tauka enda, tang enda ulih ngagauka iya.

    “Sepengudah beberapa kali lelaki nya enda ulih dikangau, staf hotel pengudah nya lalu ke bilik iya laban deka bejalaika pengawa meresa bilik.

    “Maya datai ba bilik mansa, pintu bilik iya di lock, lalu dirumpang ngambika staf hotel nya ulih tama ke dalam bilik nya,” ku iya maya ke ditanya pengarang berita sehari tu tadi.

    Ku iya, sepengudah pintu dirumpang, lelaki nya ditemu enda ngeleda tauka enda enseput sereta benung gali ba atas katil.

    Ku iya, raban bomba enggau ambulans dikangau kena pejalaika pengawa mansik silik agi sebedau mansa nya dipadahka udah midang.

    “Bala pemesai enggau raban Balai Polis Kota Samarahan dikangau ke palan penusah nyadi madahka nadai bekau orang tama ke dalam enggau nadai perengkaguna jenayah ditemu ba palan penusah nyadi.

    “Barang ke berega enggau dokumen peribadi ke diempu lelaki nya mega agi bisi ba dalam bilik nya,” ku iya.

    Ku iya, piak polis mega bisi tetemuka mayuh macham bengkah ubat kelimpah ari bup rikod perubat lelaki nya madahka lelaki nya bisi sakit tuberkulosis (Tibi) enggau lempuang (paru-paru kronik).

    “Bangkai tauka tubuh mansa dianjung ke Hospital Umum Sarawak di Kuching kena bejalaika pengawa buntastasat enggau kes diklasifikasi parai ngenyit,” ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads