Siku anak mit 10 taun lemas, ngambi bul ba pegung - Berita Iban Online

Header Ads

  • Baru Nyadi

    Siku anak mit 10 taun lemas, ngambi bul ba pegung

    Raban Bomba mai mansa, Eezender Neo Gaong, 10 taun, ke ditemu lemas ba pegung ai timbun ba belakang sebuah flat di Jalai Suria 47, Bandar Seri Alam, Pasir Gudang. 📷@Bomba

    JOHOR BAHRU: Siku anak mit lemas sepengudah nguji ngambi buah bul ke ba pegung ai tambun ba sebuah rumah pangsa di Jalai Suria 47, Bandar Seri Alam ditu, malam tadi.

    Mansa, Eezender Neo Gaong, 10 taun, bansa Iban ditemu lemas urung jam 11.25 malam maya operasyen ngiga enggau nyelamat (SAR) dipejalaika raban Bomba enggau Penyelamat (BBP) Pasir Gudang.

    Ketuai Polis Pampang Seri Alam, Superintendan Norazam Shaari, madah mansa begulai enggau lapan iku agi kaban iya ke beumur antara lapan nyentuk 10 taun main bul sereta nyemerai ba dalam pegung nya.

    “Mansa enggau kaban iya ke palan nya urung jam 3 lemai. Mansa dipechayaka nguji ngambi bul ke anyut ke tengah pegung nya. 

    “Ba pegung nya urung penalam ai ke ditambun antara 2.7 nyentuk ke tiga meter enggau nadai pagar,” ku iya.

    Bangkai mansa dianjung ke Sepital Sultan Ismail (HSI) ditu, enggau kes diklasifikasi nyadi parai ngenyit.

    Norazam mega meri jaku lalu ngagai orang mayuh ngambika enda nejuka anak main tauka mandi ba palan nya. 

    Berebak enggau nya, Ketuai BBP Pasir Gudang, Ibrahim Omar, madah raban bomba bisi nerima kangau urung jam 7.03 malam sebedau 14 iku raban bomba ngesah ke palan penusah nyadi.

    “Maya datai ba palan penusah nyadi, raban bomba lalu bejalaika pengawa SAR ianya ngiga siku anak mit lelaki beumur 10 taun nitihka ripot ke diterima raban bomba. 

    “Raban bomba mujur tetemuka bangkai tauka tubuh mansa urung penyauh 10 meter ari tebing pegung ke endur mansa diripotka labuh,” ku iya.

    Ibrahim madah, sengudah temu, bangkai mansa disuaka ngagai polis kena bejalaika pengawa mansik silik agi. 

    1 comment:

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads