11 September 2018 - Hari Dua ba Minggu Ke Dua Puluh Tiga Musim Selama - Berita Iban Online

Header Ads

  • Baru Nyadi

    11 September 2018 - Hari Dua ba Minggu Ke Dua Puluh Tiga Musim Selama

    Sida udah datai deka mendingka Iya, sereta minta diri digeraika ari penyakit. Lalu orang ke dikeduan antu digeraika.

    11 September 2018 - Hari Dua ba Minggu Ke Dua Puluh Tiga Musim Selama

    Bacha Ke Satu:

    1 Korint 6: 1 - 11

    Menyadi:
    Enti kita bisi laya enggau pangan diri, kati kita berani mai pekara nya ngagai kot lalu minta diri diatur orang kapir, lalu enda minta diri diatur bala nembiak Tuhan?
    Kati kita enda nemu, nembiak Tuhan deka ngakim dunya? Lalu enti kita deka ngakim dunya, nama kebuah kita enda ulih ngatur pekara ti mit?

    Kati kita enda nemu kitai deka ngakim melikat? Anang kenang pasal ngakim utai ti dalam pengidup tu!

    Nya alai, enti kita bisi pekara ti baka nya, indah orang ke baruh pangkat dalam eklisia deh tau diasuh kita ngakim pekara nya!

    Aku nyebut tu kena aku ngemaluka kita. Nyangka meh kita nadai orang ke chukup bepenemu-dalam ngatur pekara entara kita ke diri menyadi dalam Tuhan, ti ngujungka kita ke sama Kristian mansang ngagai kot, lalu minta diri diatur orang ke ukai orang Kristian?

    Enti kita nyara pangan diri, nya nunjukka kita endang udah alah. Nama kebuah enda nejuka orang ngereja utai ti salah ngagai kita? Nama kebuah enda nejuka sida ngakal kita?

    Tang kita empu ngereja utai ti salah lalu nipu orang. Indah menyadi kita ke dalam Kristus deh ditipu kita!

    Kati kita enda nemu, orang ke jai enda ulih bempu Perintah Allah Taala? Anang nipu diri! Orang ke ngereja ulah ti kamah, tauka nyembah engkeramba, tauka butang, tauka lelaki beleman enggau lelaki, tauka ngenchuri, tauka amu, tauka pemabuk, tauka bejakuka orang, tauka perumpak, enda ulih bempu Perintah Allah Taala.

    Baka nya meh sekeda bala kita suba. Tang kita udah dituchi, udah dikuduska, udah digaga lurus dalam nama Tuhan Jesus Kristus enggau ulih Roh Allah Taala kitai.

    Masmur Entara:

    Masmur 149: 1B - 2, 3 - 4, 5 - 6A & 9B

    Saut (peda 4): TUHAN gaga ati ke nembiak Iya.

    Ke Satu
    Belagu ngena lagu ti baru ke TUHAN. 
    Puji Iya lebuh bala nembiak Iya begempuru! Awakka ati kita gaga, Israel, laban Iya udah ngaga kita. Rami gaga ati meh kita orang Sion, ke Raja kita!

    Saut: TUHAN gaga ati ke nembiak Iya.

    Ke Dua
    Betanda muji nama Iya meh kita, 
    belagu muji Iya ngena dedumbak enggau belikan. Laban TUHAN gaga ati ke nembiak Iya; Iya meri pemenang ngagai orang ke baruh ati.

    Saut: TUHAN gaga ati ke nembiak Iya.

    Ke Tiga
    Awakka bala nembiak Allah Taala rami gaga ke pemenang sida, lalu belagu gaga ati lebuh sida gali ba kerusi-panjai sida. Awakka sida manjung muji Allah Taala,
    Tu meh pemenang ti diberi Allah Taala 
    ngagai bala nembiak Iya. Puji TUHAN!

    Saut: TUHAN gaga ati ke nembiak Iya.

    Alleluia (peda John 15: 16)

    Alleluia, alleluia
    Aku ke milih kita ari dunya, ngambika kita bejalai lalu bebuah lebat, buah ti tan, ku TUHAN.
    Alleluia.

    Bacha Injil:

    Luke 6: 12 - 19

    Lebuh maya nya, Jesus niki ngagai bukit sigi, deka besampi, lalu Iya besampi semalam-malam nya ngagai Allah Taala.

    Ba urung rerak tawas, Iya ngangauka sida murid Iya, lalu milih dua belas iku ari bala sida, lalu Iya ngumbai sida nya rasul:

    Simon (ke digelar Iya Peter) enggau menyadi iya Andrew; James seduai John, Philip enggau Bartolomew,

    Matthew seduai Thomas, James anak Alpius, enggau Simon (ke digelar Bujang Berani),

    Judas anak James, enggau Judas Iskariot, ke nyual Iya.

    Iya lalu nurun ari bukit nya enggau sida, lalu bediri ba tanah ti rata, sama enggau mayuh sida murid Iya, sereta enggau mayuh amat orang ari semua menua Judea, Jerusalem, enggau ari Tire enggau ari Sidon ti ba tebing tasik.

    Sida udah datai deka mendingka Iya, sereta minta diri digeraika ari penyakit. Lalu orang ke dikeduan antu digeraika.

    Semua orang dalam bala mayuh nya nguji negu Iya, laban kuasa pansut ari Iya lalu ngeraika semua sida.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads