Header Ads

  • Berita Tebaru

    12 September 2018 - Hari Tiga ba Minggu Ke Dua Puluh Tiga Musim Selama

    Luke 6: 20 - 26

    12 September 2018 - Hari Tiga ba Minggu Ke Dua Puluh Tiga Musim Selama

    Bacha Ke Satu:

    1 Korint 7: 25 - 31

    Menyadi:
    Ngenang pasal orang ke dara bungas, aku nadai pesan ari Tuhan, tang aku meri penemu diri empu, laban ulih pengasih Tuhan, aku tau dikarapka.

    Aku ngira, ketegal penusah ti nyadi diatu, manah agi enti kita mengkang baka gaya kita ke diatu.

    Kati nuan bisi bini? Anang muai bini nuan. Kati nuan apin bebini? Anang bebini.

    Tang enti nuan bebini, nuan ukai bedosa. Lalu enti dara bungas belaki, iya ukai bedosa. Tang orang ke jadi melaki-bini deka dituntung penusah dunya, lalu aku ngasuh kita nyeliahka nya.

    Utai ti ku aku, menyadi, nya baka tu: Kitai nyau suntuk hari. Berengkah ari diatu, awakka orang ke bisi bini idup baka orang ke nadai bini, lalu orang ke ngulit, baka orang ke enda ngulit, lalu orang ke rami gaga, baka orang ke enda rami gaga, lalu orang ke bebelika utai, baka orang ke nadai utai, lalu orang ke ngereja pengawa dunya, baka orang ke ukai ngereja pengawa dunya, laban gaya dunya ti diatu deka lenyau.

    Masmur Entara:

    Masmur 45: 10 - 11, 13 - 14, 15 - 16

    Saut (peda 10): Nuan ti deka nyadi bini raja, pendingka utai ti disebut aku.

    Ke Satu
    Nuan ti deka nyadi bini raja, pendingka utai ti disebut aku: Anang agi ingatka bala nembiak nuan enggau kaban belayan nuan. Pemajik nuan deka ngasuh raja ingin rinduka nuan. Iya tuan nuan, nya alai nuan enda tau enda ngasika iya.

    Saut: Nuan ti deka nyadi bini raja, pendingka utai ti disebut aku.

    Ke Dua
    Anak indu raja bisi di istana - naka meh pemajik gamal iya! Baju iya digaga ari ubung emas. Bengepan ngena baju ti mayuh chura, iya dibai ngagai raja, dititihka bala indu ke ngiring iya, lalu sida nya mega dibai ngagai raja.

    Saut: Nuan ti deka nyadi bini raja, pendingka utai ti disebut aku.

    Ke Tiga
    Enggau ati ti lantang sereta gaga 
    sida datai lalu tama ngagai istana raja.
    Nuan, raja aku, deka mayuh anak lelaki 
    ti deka nganti bala aki ini nuan nyadi raja, 
    lalu nuan deka ngasuh sida merintah semua dunya.

    Saut: Nuan ti deka nyadi bini raja, pendingka utai ti disebut aku.

    Alleluia (peda Luke 6: 23AB)

    Alleluia, alleluia
    Rami lalu merejuk gaga ati meh kita, 
    laban upah ti besai disedia ke kita di serega.
    Alleluia.

    Bacha Injil:

    Luke 6: 20 - 26

    Jesus lalu merening ngagai sida murid Iya, lalu bejaku, 

    “Beberekat meh kita ke seranta, laban kita deka bempu Perintah Allah Taala! 

    Beberekat meh kita ke lapar diatu, laban kita deka dikenyangka! 

    Beberekat meh kita ke nyabak diatu, laban kita deka ketawa!

    Beberekat meh kita lebuh orang begedika kita, lebuh sida nulak kita, ngeleseka kita, lalu bejai kita ketegal Anak Mensia!

    Rami gaga ati meh kita lebuh hari nya, lalu merejuk gaga ati, laban upah ti besai disedia ke kita di serega. Laban nya meh utai ti udah dikereja aki ini sida kelia ngagai sida nabi.

    Tang tulah meh kita ke kaya; laban kita udah nyamai diau!

    Tulah meh kita ke kenyang diatu, laban kita deka lapar! 

    “Tulah meh kita ke ketawa diatu, laban kita deka ngulit sereta nyabak!

    Tulah meh kita lebuh semua orang muji kita, laban nya utai ti udah dikereja aki ini sida ngagai sida nabi ti pelesu.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: