13 September 2018 - Hari Empat ba Minggu Ke Dua Puluh Tiga Musim Selama - Berita Iban Online

Header Ads

  • Baru Nyadi

    13 September 2018 - Hari Empat ba Minggu Ke Dua Puluh Tiga Musim Selama

    Ku Jesus bejaku ngagai sida murid Iya: “Tang Aku madah ngagai kita ke mending: Rinduka munsuh kita. Kereja utai ti manah ngagai orang ke begedika kita.


    13 September 2018 - Hari Empat ba Minggu Ke Dua Puluh Tiga Musim Selama

    Bacha Ke Satu:

    1 Korint 8: 1B - 7, 11 - 13

    Menyadi:
    Penemu ngasuh orang ngerigangka diri, tang pengerindu ngemansangka orang.
    Barang sapa ngumbai diri nemu utai, apin bisi penemu ti patut dikembuan iya; tang orang ke rinduka Allah Taala, dikelala Allah Taala.

    Nya alai, ba pasal pemakai ti udah diberi ngagai engkeramba, kitai sama nemu, “engkeramba endang ukai utai ti idup”, lalu “Allah Taala endang siku aja.”
    Laban enti sema utai ti dikumbai petara bisi di langit tauka di dunya--laban utai ti dikumbai “petara” enggau dikumbai “tuhan” endang amat mayuh.

    Tang ba kitai, kitai semina bisi siku aja Allah Taala, Apai ke pun semua utai, lalu kitai idup ke Iya; lalu kitai semina bisi siku aja Tuhan, iya nya Jesus Kristus. Ulih Iya semua utai udah digaga, lalu ulih Iya kitai idup.

    Tang ukai semua orang ngembuan penemu tu. Laban sekeda orang udah teleba enggau engkeramba nyentuk ngagai diatu, nya alai sida agi ngumbai pemakai ti diempa sida nya pemakai ti udah diberi ngagai engkeramba, lalu laban ati sida agi lemi, sida lalu ngumbai diri bedosa lebuh sida makai pemakai nya.

    Nya alai, menyadi ke lemi nya, ke udah ditebus Kristus, deka rusak laban penemu kita.

    Tang lebuh kita bedosa ngelaban orang Kristian lalu nelihka ati sida ti agi lemi, kita bedosa ngelaban Kristus.

    Nya alai, enti pemakai ngasuh orang Kristian bedosa, aku enggai sekali-kali makai dagin, enggai ke aku ngasuh sida bedosa.

    Masmur Entara:

    Masmur 139: 1 - 3, 13 - 14AB, 23 - 24

    Saut (peda 24b): Iring aku TUHAN, niti jalai ti meruan belama iya.

    Ke Satu
    O TUHAN, Nuan udah meresa lalu nemu aku. Nuan nemu semua utai ti dikereja aku; Ari jauh Nuan meda semua runding aku. Nuan meda aku lebuh aku gawa tauka belelak, lalu Nuan nemu semua utai ti dikereja aku.

    Saut: Iring aku TUHAN, niti jalai ti meruan belama iya.

    Ke Dua
    Laban Nuan udah nempa semua perengka tubuh aku; Lalu bejantilka aku dalam kandung indai aku. Aku muji Nuan laban Nuan endang patut dikenangika, laban semua utai ti dikereja Nuan endang nyelai sereta manah magang.

    Saut: Iring aku TUHAN, niti jalai ti meruan belama iya.

    Ke Tiga
    Peresa meh aku, O Allah Taala, ngambika Nuan nemu ati aku. Uji meh ati aku, ngambika Nuan nemu runding aku. Giga meh ulah ti jai dalam aku lalu iring aku niti jalai ti meruan belama iya.

    Saut: Iring aku TUHAN, niti jalai ti meruan belama iya.

    Alleluia (peda 1 St. John 4: 12)

    Alleluia, alleluia
    Enti kitai rinduka pangan diri, Allah Taala meruan dalam kitai, lalu pengerindu Iya digaga nyadi pemadu badas dalam kitai.
    Alleluia.

    Bacha Injil:

    Luke 6: 27 - 38

    Ku Jesus bejaku ngagai sida murid Iya: “Tang Aku madah ngagai kita ke mending: Rinduka munsuh kita. Kereja utai ti manah ngagai orang ke begedika kita.

    Berekatka orang ke nyumpah kita, besampika orang ke merinsaka kita.

    Enti orang nampar kuyu kita sepiak, awakka iya mega nampar kuyu kita sepiak. Enti orang ngambi kelambi kita, awakka iya mega ngambi baju kita.

    Beri ngagai semua orang ke minta utai ari kita, lalu lebuh orang ngambi utai kita, anang minta utai nya dipulaika baru.

    Kereja ngagai orang baka ke dikedekaka kita kereja sida ngagai kita.

    Enti kita rinduka orang ke rinduka kita, baka ni ku nya tau nyadika berekat kita? Indah orang ke bedosa deh nemu rinduka orang ke rinduka sida!

    Lalu enti kita manah enggau orang ke manah enggau kita, baka ni ku nya tau nyadika berekat kita? Indah orang ke bedosa deh nemu ngereja nya!

    Enti kita nyali utai semina ngagai orang ke dikarapka ulih mulaika utai nya ngagai kita, baka ni ku nya tau nyadika berekat kita? Indah orang ke bedosa deh nemu nyali utai ngagai pangan diri, lalu ngarapka diri ulih nerima utai nya pulai baru!

    Tang rinduka munsuh kita, lalu kereja utai ti manah ngagai sida. Jali utai ngagai orang, lalu anang ngarapka diri nerima bayar. Nya baru upah kita besai, lalu kita deka nyadi anak Allah Taala ti Pemadu Tinggi; laban Iya manah enggau orang ke enda nemu beterima kasih, sereta enggau orang ke jai.

    Kasihka orang, baka Apai kita ti kasih.

    “Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun.

    Beri, lalu kita deka diberi. Takar ti chukup, ti dienyak, digusak, ti meruap lalu lilih, deka diberi ngagai kita; laban takar ti dikena kita nakar deka dikena nakar utai ke kita.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads