Header Ads

  • Berita Tebaru

    14 September 2018 - Hari Lima ba Minggu Ke Dua Puluh Tiga Musim Selama

    Baka Moses ke nuatka ular temaga di menua puang, baka nya meh Anak Mensia deka dituatka, ngambika barang sapa arapka Iya bulih pengidup ti meruan belama iya.

    14 September 2018 - Hari Lima ba Minggu Ke Dua Puluh Tiga Musim Selama (Feast of the Exaltation of the Holy Cross).

    Bacha Ke Satu:

    Penyampau 21: 4B - 9

    Di rantau jalai, orang mayuh nyau enda liat ati agi, lalu bejaku ngelaban Allah Taala enggau ngelaban Moses, ku sida, “Nama kebuah nuan mai kami pansut ari menua Ejip lalu nejuka kami mati di menua puang tu, ba endur ti nadai pemakai, nadai ai tu? Kami nyau leju makai pemakai ti enda nyamai tu!”

    Udah nya TUHAN lalu ngasuh ular ti bisa datai ngagai orang mayuh. Ular nya lalu mantuk sida, lalu mayuh amat sida mati.

    Orang mayuh lalu mansang ngagai Moses, lalu bejaku, “Kami udah bedosa laban kami udah bejaku ngelaban TUHAN, enggau ngelaban nuan. Besampi ngagai TUHAN minta Iya muai ular tu.” 

    Moses lalu besampika orang mayuh.
    Udah nya, TUHAN lalu ngasuh Moses ngaga siku ular ari temaga, lalu nuatka ular nya ngena siti tiang; barang sapa kena pantuk ular, deka merening ngagai ular nya, lalu gerai.

    Nya alai Moses ngaga siku ular ari temaga, lalu nuatka ular nya ngena tiang; Lalu barang sapa dipantuk ular, deka merening ngagai ular temaga nya, lalu digeraika.

    Masmur Entara:

    Masmur 78: 1 - 2, 34 - 35, 36 - 37, 38

    Saut (peda 7b): Anang enda ingatka utai ti udah dikereja TUHAN.

    Ke Satu
    Pendingka ajar aku, kita ke nembiak aku, 
    lalu peratika utai ti disebut aku. Aku deka bejaku ngena jaku sempama lalu nerangka utai ti nyelai ti nyadi dulu kelia.

    Saut: Anang enda ingatka utai ti udah dikereja TUHAN.

    Ke Dua
    Genap kali Iya munuh sekeda bala sida, 
    sida ti bukai nguingka diri ngagai Iya. Sida nesal ati, lalu bebendar besampi ngagai Iya. Sida ingatka Allah Taala endang penyaga sida, ingatka Iya ti Pemadu Bekuasa udah datai nulung sida.

    Saut: Anang enda ingatka utai ti udah dikereja TUHAN.

    Ke Tiga
    Tang jaku sida bula semua. Utai ti disebut sida ukai datai ari ati. Sida enda taluk ngagai Iya. Sida enda tetap ati ngagai sempekat sida enggau Iya.

    Saut: Anang enda ingatka utai ti udah dikereja TUHAN.

    Ke Empat
    Tang Allah Taala kasihka nembiak Iya. Iya ngampun dosa sida lalu enda ngerusak sida. Iya suah nagang Diri ringat lalu nagang Diri ngeransi.

    Saut: Anang enda ingatka utai ti udah dikereja TUHAN.

    Bacha Ke Dua:

    Pilipi 2: 6 - 11

    Menyadi:
    Taja pen Jesus Kristus endang Allah Taala tang Iya enda ngumbai diri sebaka enggau Allah Taala, tang Iya ngelengkaka semua nya, lalu ngaga Diri nyadi ulun, ada ngena gamal mensia. Iya ngemaruhka Diri, lalu ngasi nyentuk ke mati, indah mati ba kayu regang. Nya alai Allah Taala udah ngangkatka Iya tinggi lalu meri Iya nama ti ari atas semua nama, ngambika lebuh nama Jesus disebut, semua utai di serega, di dunya enggau di dunya ti di baruh, besugang magang, lalu semua dilah deka ngaku Jesus nya Tuhan, ke mulia Allah Taala ti Apai.

    Alleluia

    Alleluia, alleluia
    Kami nyembah Nuan, O Kristus, lalu kami muji Nuan, laban ulih Regang Nuan ti kudus, Nuan udah nebus dunya.
    Alleluia.

    Bacha Injil:

    John 3: 13 - 17

    Jesus bejaku ngagai Nikodimus: 
    “Nadai orang udah kala niki ke serega, kelimpah ari Iya ke nurun ari serega, iya nya Anak Mensia.

    Baka Moses ke nuatka ular temaga di menua puang, baka nya meh Anak Mensia deka dituatka, ngambika barang sapa arapka Iya bulih pengidup ti meruan belama iya.

    “Laban Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.

    Laban Allah Taala ukai ngirumka Anak Iya ngagai dunya ngambika Iya ngakim dunya, tang ngambika Iya nyelamatka dunya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: