17 September 2018 - Hari Satu ba Minggu Ke Dua Puluh Empat Musim Selama - Berita Iban Online

Header Ads

  • Baru Nyadi

    17 September 2018 - Hari Satu ba Minggu Ke Dua Puluh Empat Musim Selama

    “Tuan, anang ngiruh Diri, laban aku enda chukup badas alai Nuan datai.

    17 September 2018 - Hari Satu ba Minggu Ke Dua Puluh Empat Musim Selama

    Bacha Ke Satu:

    1 Korint 11: 17 - 26, 33

    Menyadi:
    Tang ba atur ti nangkanka tu, aku enda muji kita, laban lebuh kita begempuru, kita ukai ngereja utai ti badas, tang ngereja utai ti jai.

    Laban, kena aku ngemunka jaku, lebuh kita begempuru besembiang, aku ninga kita bisi beserekang ari pangan diri. Aku arapka nya mimit.

    Iya ti bendar, kita endang patut bisi bagi entara bala kita, ngambika kita nyamai ngelala sapa orang Kristian ke bendar, sapa ke ukai.

    Lebuh kita begempuru, iya ti bendar kita ukai makai pemakai Tuhan.

    Laban lebuh kita makai, tiap iku kita terus makai pemakai diri empu, lalu sekeda kita lapar, lalu sekeda mabuk.

    Kati kita nadai rumah alai kita makai ngirup? Tauka, kita deka mechat eklisia Allah Taala, lalu ngemaluka orang ke nadai utai? Baka ni ku jalai aku bejaku ngagai kita tu? Kati aku patut muji kita? Sigi enda!

    Laban aku udah nerima ari Tuhan utai ti diberi aku ngagai kita, iya nya, malam Tuhan Jesus dijual, Iya ngambi roti, lalu lebuh Iya udah meri terima kasih, Iya mechahka roti nya, lalu bejaku, “Tu tubuh Aku ti diberi ke kita. Kereja tu kena ngingatka Aku.”

    Baka nya mega, lebuh sida udah badu makai, Iya ngambi mangkuk, lalu bejaku, “Mangkuk tu sempekat baru ti ditanggam ngena darah Aku. Kereja tu genap kali kita ngirup iya, kena ngingatka Aku.”

    Laban genap kali kita makai roti tu, lalu ngirup ari mangkuk tu, kita madahka pemati Tuhan, nyentuk ngagai Iya datai baru.

    Nya alai, menyadi, lebuh kita begempuru makai, anti pangan diri.

    Masmur Entara:

    Masmur 40: 6 - 7A, 7B - 8, 9, 16

    Saut (peda 1 Korint 11: 26b): Padahka pemati TUHAN, nyentuk ngagai Iya datai baru.

    Ke Satu
    Nuan enda begunaka piring enggau pemeri. Nuan nadai minta jelu ti ditunu segala ba alta tauka minta piring pengampun dosa. Tang Nuan udah meri aku pending kena aku ningaka Nuan nya alai aku nyaut, “Tu aku.”

    Saut: Padahka pemati TUHAN, nyentuk ngagai Iya datai baru.

    Ke Dua
    “Atur ti diberi Nuan ngagai aku bisi dalam Bup Adat. Naka meh pengerindu ati aku ngereja peneka Nuan, O Allah Taala aku! Aku nyimpan ajar Nuan dalam ati aku.”

    Saut: Padahka pemati TUHAN, nyentuk ngagai Iya datai baru.

    Ke Tiga
    Lebuh semua nembiak Nuan begempuru, O TUHAN, aku madahka berita manah pasal Nuan ke ngelepaska kami. Nuan nemu, aku sigi enggai badu nusui berita nya.

    Saut: Padahka pemati TUHAN, nyentuk ngagai Iya datai baru.

    Ke Empat
    Awakka semua orang ke datai ngagai Nuan lantang sereta gaga ati. Awakka semua orang ke meri terima kasih ketegal pengelepas ti diberi Nuan seruran nyebut, “Naka meh pemesai mulia TUHAN!”

    Saut: Padahka pemati TUHAN, nyentuk ngagai Iya datai baru.

    Alleluia (peda John 3: 16)

    Alleluia, alleluia
    Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya bulih pengidup ti meruan belama iya.
    Alleluia.

    Bacha Injil:

    Luke 7: 1 - 10

    Lebuh Jesus udah nyebut semua utai nya ngagai orang mayuh, Iya lalu mupuk ngagai Kapernaum.

    Siku pemesai soldadu Rome bisi siku ulun. Ulun nya balat dikesayauka iya. Nyadi ulun nya sakit lalu nyau deka mati.

    Lebuh pemesai nya ninga pasal Jesus, iya lalu ngasuh sekeda tuai orang Judah betemu enggau Jesus, minta Jesus datai lalu ngeraika ulun iya.

    Lebuh bala tuai orang Judah betemu enggau Jesus, sida bebendar amat minta Iya datai. Ku sida, 

    “Orang tu patut disaup Nuan, laban iya angkunka bansa kitai, lalu iya udah ngaga sebuah balai gempuru ke kami.”

    Jesus lalu mupuk enggau sida, tang lebuh Iya nyau ka datai ba rumah nya, pemesai nya lalu ngasuh pangan iya madah ngagai Jesus, 

    “Tuan, anang ngiruh Diri, laban aku enda chukup badas alai Nuan datai.

    Nya kebuah aku enda datai ngagai Nuan. Tak sebut aja jaku, lalu geraika nembiak aku.

    Laban aku empu mega bekereja di baruh pemesai, lalu aku mega bisi soldadu dipegai aku. Aku bejaku ngagai siku, ‘Mupuk nuan!’ lalu iya mupuk. 

    Ngagai siku ti bukai aku bejaku, ‘Kitu ke nuan,’ lalu iya datai. Lalu aku bejaku ngagai ulun aku, ‘Kereja tu!’ lalu iya ngereja utai nya.”

    Lebuh Jesus ninga nya, Iya balat alit ati ke pemesai nya. Jesus nguing ngagai bala orang mayuh ke nitihka Iya, lalu bejaku 

    “Aku madah ngagai kita, Indah di menua Israel deh Aku nadai udah kala tetemuka pengarap ti baka tu.”

    Lebuh orang ke udah diasuh mai pesan pulai ngagai rumah pemesai nya, sida nemu ulun nya udah gerai.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads