19 September 2018 - Hari Tiga ba Minggu Ke Dua Puluh Empat Musim Selama - Berita Iban Online

Header Ads

  • Baru Nyadi

    19 September 2018 - Hari Tiga ba Minggu Ke Dua Puluh Empat Musim Selama

    Sida nya baka bala anak mit ke duduk ba sebelah pasar, ke bekangauka pangan diri, ‘Kami nyepu kesuling, tang kita enda betanda! Kami bekeduie nyabak, tang kita enda nyabak!’

    19 September 2018 - Hari Tiga ba Minggu Ke Dua Puluh Empat Musim Selama

    Bacha Ke Satu:

    1 Korint 12: 31 - 13: 13

    Menyadi:
    Kita patut inginka pemeri ti besai agi. Aku deka nunjukka jalai ti pemadu manah ke kita.

    Enti aku bejaku ngena mayuh macham jaku mensia, enggau ngena jaku melikat, tang nadai pengerindu, aku tu gong ti inggar dipangkung, tauka luching ti sering-sering.

    Lalu enti aku bisi kuasa kena benabi lalu nemu semua misteri, sereta nemu semua penemu, lalu enti aku bisi pengarap kena nginsitka bukit, tang nadai pengerindu, aku nadai guna.

    Enti aku meri semua utai aku ngagai orang, lalu enti aku nyerahka tubuh aku ngambika ditunu, tang nadai pengerindu, nya nadai pulai ke penguntung aku.

    Pengerindu nya liat ati, nelap, enda kepapas, enda temegah tauka sumbung, tauka jai jaku enggau orang. 

    Pengerindu enda berundingka diri empu, enda jampat ringat tauka bedendam.
    Pengerindu enda gaga ati ke penyalah, tang gaga ati ke utai ti bendar.

    Pengerindu natka semua utai, arapka semua utai, ngadang semua utai, tan dalam semua utai.

    Pengerindu enda nemu abis. Tang jaku ti benabi nemu abis; jaku ti nyelai nemu abis; penemu nemu abis.

    Laban kitai semina nemu mimit aja, lalu jaku ti benabi endang enda kala chukup, tang lebuh utai ti pemadu badas datai, utai ti enda chukup badas deka lesap magang.

    Lebuh aku agi mit, aku bejaku baka anak mit, aku berunding baka anak mit, aku bekira baka anak mit. Lebuh aku nyau besai tuai, aku muai semua perangai anak mit.

    Kitai diatu semina meda ayas aja, baka ke meda dalam cheremin; ila baru kitai deka betemu betunga mua. Diatu aku semina nemu mimit aja; ila baru aku deka nemu semua utai, baka Allah Taala ke nemu semua utai pasal aku.

    Diatu utai tiga bengkah tu agi mengkang: pengarap, pengadang, enggau pengerindu. Tang utai ti pemadu besai nya pengerindu.

    Masmur Entara:

    Masmur 33: 2 - 3, 4 - 5, 12 & 22

    Saut (peda 12b): Beberekat meh orang ke udah dipilih TUHAN nyadika nembiak Iya!

    Ke Satu
    Beri terima kasih ngagai TUHAN ngena belikan. Belagu ke Iya ngena sape. Nyanyi lagu ti baru ke Iya. Tebah belikan enggau pengabis pengelandik kita, sereta enggau panjung kita!

    Saut: Beberekat meh orang ke udah dipilih TUHAN nyadika nembiak Iya!

    Ke Dua
    Laban jaku TUHAN endang amat, lalu semua pengawa Iya endang dikereja Iya enggau ati ti tetap. TUHAN rinduka atur ti lurus sereta betul. Dunya penuh laban pengerindu Iya ti meruan belama iya.

    Saut: Beberekat meh orang ke udah dipilih TUHAN nyadika nembiak Iya!

    Ke Tiga
    Lantang meh bansa ti ngaku TUHAN nyadika Allah Taala sida. Beberekat meh orang ke udah dipilih TUHAN nyadika nembiak Iya! Awakka pengerindu Nuan meruan enggau kami, O TUHAN, lebuh kami manggaika pengandal ati kami ba Nuan.

    Saut: Beberekat meh orang ke udah dipilih TUHAN nyadika nembiak Iya!

    Alleluia (peda John 6: 63C, 68C)

    Alleluia, alleluia
    Jaku Nuan TUHAN, nya Roh enggau pengidup,
    Nuan ngembuan jaku ti meri pengidup ti meruan belama iya.
    Alleluia.

    Bacha Injil:

    Luke 7: 31 - 35

    Ku Jesus nampung jaku Iya, “Ngagai apa Aku mandingka orang ke rebak diatu? Baka apa sida nya?

    Sida nya baka bala anak mit ke duduk ba sebelah pasar, ke bekangauka pangan diri, ‘Kami nyepu kesuling, tang kita enda betanda! Kami bekeduie nyabak, tang kita enda nyabak!’

    Laban John pemaptisa udah datai, nadai makai utai, nadai ngirup wain, lalu ku kita, ‘Iya dirasuk antu!’ 

    Anak Mensia udah datai makai enggau ngirup, lalu ku kita, ‘Peda orang nya! Iya bam sereta pemabuk, pangan sida pengumpul chukai, enggau orang ke bedosa!’

    Tang taja pia, penemu-dalam diayanka amat ngena, ulih orang ke nerima iya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads