2 September 2018 - Hari Minggu Ke Dua Puluh Dua Musim Selama - Berita Iban Online

Header Ads

  • Baru Nyadi

    2 September 2018 - Hari Minggu Ke Dua Puluh Dua Musim Selama

    ‘Orang tu ngemesaika Aku ngena mulut sida, tang ati sida jauh ari Aku. Sida ngelebuka diri nyembah Aku, laban sida meri ajar mensia lalu ngumbai nya adat Aku.’ Kita ngelengkaka pesan Allah Taala, lalu bepegai ba ajar mensia.”

    2 September 2018 - Hari Minggu Ke Dua Puluh Dua Musim Selama

    Bacha Ke Satu:

    Ulang Adat 4: 1 - 2, 6 - 8

    Udah nya Moses lalu bejaku ngagai orang mayuh, “Kita enda tau enda ngasika semua adat ti diajar aku ngagai kita. Nya baru kita deka idup lalu ngalahka menua ti diberi TUHAN Allah Taala aki ini kita, ngagai kita.

    Anang nambahka utai ngagai pesan ti diberi aku ngagai kita, lalu anang muai utai ari pesan nya. Kita enda tau enda ngasika pesan TUHAN Allah Taala kita, ti diberi aku ngagai kita.

    Kita enda tau enda ngasika semua adat nya, kena ngayanka ngagai orang bansa bukai penalam penemu kita. Lebuh sida ninga pasal semua adat nya, sida deka nyebut, ‘Naka meh penalam penemu enggau pemereti bansa orang tu!’

    Laban nadai bansa bukai bisi petara ti diau semak sida ke tau dikangauka sida, baka TUHAN Allah Taala kitai.

    Lalu nadai bansa bukai bisi adat ti lurus baka adat ti diajar aku ngagai kita sehari tu.”

    Masmur Entara:

    Masmur 15: 2 - 3A, 3B - 4B, 5

    Saut: Orang ti ngereja utai ti lurus, deka diau begulai enggau TUHAN.

    Ke Satu
    Semina orang ke ngasika Allah Taala dalam semua utai lalu seruran ngereja utai ti ngena, ke nyebut utai ti amat sereta tau dikarapka, lalu enda betenahka orang.

    Saut: Orang ti ngereja utai ti lurus, deka diau begulai enggau TUHAN.

    Ke Dua
    Sida nadai ngereja penyalah ngagai pangan diri lalu sida enda mega nusui berita ngapa pasal pangan diri. Sida begedika orang ke ditulak Allah Taala, tang masa orang ke nangika TUHAN.

    Saut: Orang ti ngereja utai ti lurus, deka diau begulai enggau TUHAN.

    Ke Tiga
    Sida nyali orang duit, lalu enda minta anak duit nya, lalu sida enda ulih diumpan makai suap nyadika saksi ngelaban orang ke nadai penyalah. Barang sapa ngereja utai tu, deka diau likun berari.

    Saut: Orang ti ngereja utai ti lurus, deka diau begulai enggau TUHAN.

    Bacha Ke Dua:

    St. James 1: 17 - 18, 21B - 22, 27

    Menyadi ti dikerindu: Semua pemeri ti menyana, ti pemadu badas endang datai ari atas magang, nurun ari Apai penampak ke enda berubah, ke enda mindah kin kitu baka ayuk.

    Ari peneka Iya Empu Iya udah ngadaka kitai, ulih jaku pemendar, ngambika kitai nyadi lumur satu ari semua utai ti idup ti digaga Iya.

    Terima enggau ati ti baruh jaku ti ditanam, ti bisi kuasa nyelamatka semengat kita.

    Tang anang semina mendingka jaku nya, lalu nipu diri empu. Kereja utai ti diasuh jaku nya.

    Pengarap ti tuchi, ti bendar di mua Allah Taala ti Apai nya: ngintu orang ke patu balu, ke merinsa, sereta ngintu diri tuchi ari penyai dunya.

    Alleluia (peda St. James 1: 18)

    Alleluia, alleluia
    Ari peneka Iya Empu, Apai udah ngadaka kitai, ulih jaku pemendar, ngambika kitai nyadi lumur satu ari semua utai ti idup ti digaga Iya.
    Alleluia.

    Bacha Injil:

    Mark 7: 1 - 8, 14 - 15, 21 - 23

    Lebuh orang Parisi enggau sekeda pengajar Adat ke datai ari Jerusalem begelumu ngelingi Iya, sida meda sekeda murid Jesus makai ngena jari ti enda tuchi, reti nya, enda dibasu.

    (Laban orang Parisi, enggau semua orang Judah, enda makai enti sida apin masu jari sida nitihka ajar aki ini sida; lalu sida enda makai utai ti udah dibeli ari pasar, enti utai nya apin dibasu. Lalu sida mayuh adat asal ti bukai ti dititihka sida, baka bebasuka mangkuk, periuk enggau pekekas bukai ti digaga ari temaga.)

    Nya alai orang Parisi enggau sida pengajar Adat lalu nanya Iya, “Nama kebuah murid Nuan enda nitihka adat sida ke tuai, tang makai ngena jari ti enda tuchi?”

    Jesus lalu nyaut sida, “Betul jaku nabi Isaiah lebuh iya benabika pasal kita ke pura-pura ngapa tu, munyi ti udah ditulis: 

    ‘Orang tu ngemesaika Aku ngena mulut sida, tang ati sida jauh ari Aku. Sida ngelebuka diri nyembah Aku, laban sida meri ajar mensia lalu ngumbai nya adat Aku.’ Kita ngelengkaka pesan Allah Taala, lalu bepegai ba ajar mensia.”

    Iya lalu ngangauka orang mayuh ngagai Iya baru, lalu bejaku ngagai sida, “Pendingka Aku, semua kita, lalu mereti: Nadai utai ti tama ngagai mensia tau ngasuh iya enda tuchi. Utai ti ngasuh mensia enda tuchi nya utai ti pansut ari mensia.”

    “Laban ari dalam mensia, ari ati mensia pansut runding ti jai: bambai, ngenchuri, munuh orang, butang, amu, ulah ti jai, nipu orang, ulah ti kamah, kepapas, bejakuka orang, sumbung, enggau pemeli. Semua utai ti jai nya pansut ari ati mensia; nya utai ti ngasuh iya enda tuchi.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads