20 September 2018 - Hari Empat ba Minggu Ke Dua Puluh Empat Musim Selama - Berita Iban Online

Header Ads

  • Baru Nyadi

    20 September 2018 - Hari Empat ba Minggu Ke Dua Puluh Empat Musim Selama

    “Kati nuan bisi meda indu tu? Aku tama ngagai rumah nuan, tang nuan nadai meri Aku ai kena Aku masu kaki, tang iya udah masu kaki Aku ngena ai mata iya, lalu ngendas kaki Aku ngena buk iya.

    20 September 2018 - Hari Empat ba Minggu Ke Dua Puluh Empat Musim Selama (Memorial of Saints Andrew Kim Tae-gon, Priest, and Paul Chong Ha-sang, and Companions, Martyrs)

    Bacha Ke Satu:

    1 Korint 15: 1 - 11

    Nyadi diatu, menyadi, aku deka ngasuh kita ngingatka Berita Manah ti udah ditusui aku ngagai kita, ti udah diterima kita, ti alai kita bediri tegap.

    Berita Manah nya nyelamatka kita, enti kita bepegai teguh ba jaku ti diajar aku ngagai kita -- nyangka meh kita semina arap ngapa.

    Laban aku meri ngagai kita utai ti pemadu beguna, ti udah diterima aku, iya nya, Kristus mati ketegal dosa kitai, munyi ti ditulis dalam Bup Kudus.

    Iya dikuburka, lalu diangkatka idup baru ba hari ti ketiga, munyi ti ditulis dalam Bup Kudus.

    Iya lalu pegari di mua Peter, lalu udah nya pegari di mua semua sida ke dua belas iku.

    Udah nya Iya pegari di mua lebih lima ratus iku murid Iya sereta sekali. Mayuh sida nya agi idup diatu, taja pen sekeda udah mati.

    Udah nya Iya pegari di mua James, lalu udah nya, di mua semua sida rasul.
    Ke penudi iya, Iya mega pegari di mua aku, ke ada salah maya.

    Laban aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Allah Taala.

    Tang ulih pengasih Allah Taala, aku nyadi aku ke diatu, lalu Iya enda lebu kasihka aku. Sigi amat enda lebu laban aku udah bebendar agi bekereja ari sida rasul ti bukai, taja pen ukai aku empu ke bekereja, tang pengasih Allah Taala ti dalam aku.

    Nya alai, nemuka orang ke bekereja nya aku tauka sida, kami mai Berita Manah lalu kita arap.

    Masmur Entara:

    Masmur 118: 1 - 2, 16 - 17, 28

    Saut (peda 1a): Beri meh terima kasih ngagai TUHAN, laban Iya endang badas.

    Ke Satu
    Beri meh terima kasih ngagai TUHAN, laban Iya endang badas; Pengerindu Iya meruan belama iya. Awakka orang Israel nyebut, “Pengerindu Iya endang meruan belama iya.”

    Saut: Beri meh terima kasih ngagai TUHAN, laban Iya endang badas.

    Ke Dua
    “Jari kanan TUHAN ti patut dipuji, jari kanan TUHAN udah menang!”. Aku enda mati, tang deka idup lalu nusui pasal utai ti udah dikereja TUHAN.

    Saut: Beri meh terima kasih ngagai TUHAN, laban Iya endang badas.

    Ke Tiga
    Nuan endang Allah Taala aku, lalu aku deka meri terima kasih ngagai Nuan. Nuan endang Allah Taala aku, Aku deka ngemesaika Nuan.

    Saut: Beri meh terima kasih ngagai TUHAN, laban Iya endang badas.

    Alleluia (peda Matthew 11: 28)

    Alleluia, alleluia
    Datai ngagai Aku semua kita ke lelak ngema utai ti berat, lalu Aku deka ngasuh kita belelak, ku TUHAN.
    Alleluia.

    Bacha Injil:

    Luke 7: 36 - 50

    Siku orang Parisi mai Jesus makai enggau iya. Jesus lalu mansang ngagai rumah orang nya, lalu belatur deka makai.

    Nyadi di nengeri nya bisi siku indu ke bedosa. Lebuh iya ninga Jesus bisi makai dalam rumah orang Parisi nya, iya lalu mai sebutul minyak wangi.

    Iya bediri ari belakang Jesus ngimbai kaki Iya, nyabak, lalu belabuh ngemasahka kaki Jesus ngena ai mata iya. Iya lalu ngendas kaki Jesus ngena buk iya, nyium lalu nata kaki Jesus ngena minyak wangi nya.

    Lebuh orang Parisi ke mai Jesus makai, meda nya, iya lalu bejaku dalam ati diri, 
    “Enti orang tu amat nabi, Iya tentu nemu indu ke negu Iya nya orang ke bedosa.”

    Jesus lalu bejaku ngagai iya, “Simon, Aku bisi utai ti deka dipadahka ngagai nuan.” 

    Simon lalu nyaut, “Padahka ngagai aku, Pengajar.”

    Jesus lalu madah ngagai iya, ku Iya, 
    “Siku orang ke bejalika duit ngagai orang, bisi dua iku orang berutang ba iya. Siku berutang lima ratus singkap duit pirak, lalu siku berutang lima puluh singkap.

    Lebuh seduai iya enda tebayarka utang diri, iya muai utang seduai iya. Sapa ari seduai nya ke deka lebih agi rinduka iya?”
    Simon lalu nyaut, 

    “Nyangka iya ke mayuh agi utang, ke enda ibuh mayar utang.” 

    Jesus lalu nyaut, “Betul sangka nuan.”
    Jesus lalu nguing ngagai indu nya, lalu bejaku ngagai Simon, 

    “Kati nuan bisi meda indu tu? Aku tama ngagai rumah nuan, tang nuan nadai meri Aku ai kena Aku masu kaki, tang iya udah masu kaki Aku ngena ai mata iya, lalu ngendas kaki Aku ngena buk iya.

    Nuan enda nyium Aku, tang kenyau ari Aku tama tadi iya enda ngetu-ngetu nyium kaki Aku.

    Nuan enda nata pala Aku ngena minyak, tang iya udah nata kaki Aku ngena minyak wangi.

    Nya alai, Aku madah ngagai nuan, dosa iya ti mayuh, udah diampun, nya kebuah iya balat rindu; tang orang ke diampun mimit, deka rindu mimit aja.”

    Jesus lalu bejaku ngagai indu nya, “Dosa nuan diampun.”

    Tang orang ke duduk makai enggau Iya ba mija nya lalu belabuh bejaku enggau pangan diri, 

    “Sapa orang tu, datai ke Iya berani ngampun dosa?”

    Lalu ku Jesus bejaku ngagai indu nya, “Pengarap nuan udah nyelamatka nuan. Pulai meh nuan enggau selamat.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads