22 September 2018 - Hari Enam ba Minggu Ke Dua Puluh Empat Musim Selama - Berita Iban Online

Header Ads

  • Baru Nyadi

    22 September 2018 - Hari Enam ba Minggu Ke Dua Puluh Empat Musim Selama

    Iya bejaku ngena jaku sempama: “Orang siku mansang naburka benih. Lebuh iya naburka benih, sekeda benih nya labuh ba jalai raya lalu kena indik kaki mensia, lalu burung makai leka benih nya.

    22 September 2018 - Hari Enam ba Minggu Ke Dua Puluh Empat Musim Selama

    Bacha Ke Satu:

    1 Korint 15: 35 - 37, 42 - 49

    Menyadi:
    Tang sekeda orang deka nanya, “Baka ni ku orang ke udah mati diangkatka idup baru? Baka ni ku gaya tubuh sida lebuh sida diangkatka idup baru?”

    Beli! Utai ti ditanam enda ulih idup enti iya enda dulu mati.

    Lalu utai ti ditanam nya ukai tubuh ti deka datai, tang leka aja, nemuka utai nya gandum, tauka utai bukai.

    Baka nya mega pasal pengangkat ari mati. Utai ti ditanam  nya tubuh ti nemu mati, tang tubuh ti diangkatka idup baru enda nemu mati agi.

    Lebuh iya ditanam, iya nadai dibasa, tang iya diangkatka dalam mulia. Iya lemi lebuh iya ditanam, tang lebuh iya diangkatka idup baru, iya bisi kuasa.

    Lebuh iya ditanam, iya endang tubuh dunya, tang lebuh iya diangkatka idup baru, iya nyadi tubuh roh. Enti tubuh dunya amat bisi, tubuh roh mega bisi.

    Munyi ti ditulis, “Mensia ti keterubah, iya nya Adam, nyadi mensia ke idup”, tang Adam ti penudi nya Roh ti meri pengidup.

    Tang ukai tubuh roh ke dulu datai, tang tubuh dunya, udah nya baru tubuh roh.

    Mensia ti keterubah, ke digaga ari amau, datai ari dunya, tang mensia ti kedua nya datai ari serega.

    Semua orang ke digaga ari amau, sebaka enggau iya ke digaga ari amau, tang orang serega sebaka tubuh enggau orang ke datai ari serega.

    Baka kitai ke sebaka gamal enggau mensia ti digaga ari amau, baka nya mega kitai deka sebaka gamal enggau Orang ke datai ari serega.

    Masmur Entara:

    Masmur 56: 9C - 11, 12 - 13

    Saut (peda 14c): Aku deka bejalai di mua Allah Taala, dalam penampak ti manchar ngagai orang ke idup.

    Ke Satu
    Aku nemu Allah Taala setanah enggau aku, Iya nya TUHAN ti bempu semaya ti dipuji aku. Aku manggaika pengarap aku ba TUHAN, lalu aku enda takut. Nama utai ti ulih dikereja mensia ngagai aku?

    Saut: Aku deka bejalai di mua Allah Taala, dalam penampak ti manchar ngagai orang ke idup.

    Ke Dua
    O Allah Taala, aku deka meri Nuan utai ti udah disemaya aku. Aku deka meri Nuan piring terima kasih aku, laban Nuan udah ngelepaska semengat aku ari pemati, lalu udah nagang aku alah. Nya alai aku bejalai di mua Allah Taala, dalam penampak ti manchar ngagai orang ke idup.

    Saut: Aku deka bejalai di mua Allah Taala, dalam penampak ti manchar ngagai orang ke idup.

    Alleluia (peda Luke 8: 15)

    Alleluia, alleluia
    Beberekat meh orang ke ninga pesan, 
    lalu ngingatka iya dalam ati ti manah sereta ngasi, lalu sida bebuah enggau ati ti liat sereta tan.
    Alleluia.

    Bacha Injil:

    Luke 8: 4 - 15

    Lebuh mayuh amat orang begempuru, lalu orang ari mayuh bengkah nengeri datai ngagai Jesus, Iya bejaku ngena jaku sempama: “Orang siku mansang naburka benih. Lebuh iya naburka benih, sekeda benih nya labuh ba jalai raya lalu kena indik kaki mensia, lalu burung makai leka benih nya.

    Sekeda labuh ba batu, lalu lebuh iya tumbuh, iya layu, laban iya nadai ai.

    Sekeda labuh ba madang duri. Duri nya tumbuh sama enggau leka benih nya, lalu ngalahka iya.

    Lalu sekeda labuh ba tanah ti ami, lalu tumbuh, lalu bebuah seratus kali lipat.”
    Lebuh Iya udah nyebut nya, Iya lalu ngangau, “Awakka orang ke bisi pending, ninga.”

    Sida murid Iya lalu nanya ngagai Iya reti jaku sempama nya,

    Ku Iya, “Kita udah diberi penemu pasal misteri Perintah Allah Taala, tang ngagai sida ti bukai, Aku bejaku ngena jaku sempama, ngambika ‘sida merening, tang enda meda; mending, tang enda mereti.’

    “Tu reti sempama nya: benih nya jaku Allah Taala.

    Benih ti labuh ba jalai raya nya orang ke ninga. Udah nya Sitan datai lalu ngerampas pesan nya ari ati sida, ngambika sida enda arap lalu enda diselamatka.

    Benih ti labuh ba batu nya orang ke ninga pesan nya, lalu nerima iya enggau ati ti gaga. Tang sida nadai urat. Sida arap enda lama, lalu lebuh penguji datai, sida badu agi arap.

    Benih ti labuh ba madang duri nya orang ke ninga, tang lebuh sida mupuk ari endur nya, sida alah laban pengirau, pengaya, enggau pengelantang dunya, lalu buah sida enda mansau.

    Tang benih ti labuh ba tanah ti ami nya orang ke ninga pesan, lalu ngingatka iya dalam ati ti manah sereta ngasi, lalu sida bebuah enggau ati ti liat sereta tan.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads