28 September 2018 - Hari Lima ba Minggu Ke Dua Puluh Lima Musim Selama - Berita Iban Online

Header Ads

  • Baru Nyadi

    28 September 2018 - Hari Lima ba Minggu Ke Dua Puluh Lima Musim Selama

    Lebuh Jesus benung besampi kediri, lalu semina sida murid Iya aja bisi semak Iya, Iya nanya sida, “Sapa Aku tu ku orang?”
    28 September 2018 - Hari Lima ba Minggu Ke Dua Puluh Lima Musim Selama

    Bacha Ke Satu:

    Pengajar 3: 1 - 11

    Semua utai ti nyadi di dunya ti endang nyadi ba maya ti diletak Allah Taala.

    Iya ngeletak maya ada, enggau maya mati,maya betanam, enggau maya ngetau, maya bebunuh, enggau maya nyuman, maya ngeruntuh, enggau maya niri enggau negi.

    Iya ngeletak maya sinu, enggau maya gaga, maya ngulit, enggau maya betanda, maya beleman, enggau maya enda beleman, maya besium, enggau maya enda besium.

    Iya ngeletak maya tetemuka utai, enggau maya ngelenyauka utai, maya besimpanka utai, enggau maya bebuaika utai, maya nyarik, enggau maya nyait, maya enda bemunyi enggau maya bejaku.

    Iya ngeletak maya rinduka orang, enggau maya begedi, maya beperang, enggau maya bebaik.

    Nama penguntung ulih kitai ari semua pengawa kitai?

    Aku nemu pemerat utai ti udah ditepanka Allah Taala ba kitai.

    Iya udah ngeletak maya ti ngena ke semua utai. Iya udah meri kitai ati ti keran deka nemu utai ti deka nyadi jemah ila, tang Iya nadai kala ngasuh kitai puas ati nemu utai ti dikereja Iya.

    Masmur Entara:

    Masmur 144: 1A & 2ABC, 3 - 4

    Saut (peda 1a): Pujika TUHAN ti nyaga aku!

    Ke Satu
    Pujika TUHAN ti nyaga aku! Iya nyadi penyaga enggau pengelepas aku, ti dikarapka aku meri aku pengelikun.

    Saut: Pujika TUHAN ti nyaga aku!

    Ke Dua
    O TUHAN, sapa mensia alai Nuan deka ibuhka sida? Sapa anak mensia, alai Nuan deka ibuhka sida? Kami tu baka kesuh seput. Umur kami semina sekejap aja, baka ayuk.

    Saut: Pujika TUHAN ti nyaga aku!

    Alleluia (peda Mark 10: 45)

    Alleluia, alleluia
    Anak Mensia udah datai deka mela
    lalu nyerahka nyawa Diri kena nebus orang mayuh.
    Alleluia.

    Bacha Injil:

    Luke 9: 18 - 22

    Nyadi sekali, lebuh Jesus benung besampi kediri, lalu semina sida murid Iya aja bisi semak Iya, Iya nanya sida, “Sapa Aku tu ku orang?”

    Ku sida nyaut, “Sekeda ngumbai Nuan John Pemaptisa. Sekeda ngumbai Nuan Elijah. Lalu sekeda ti bukai ngumbai Nuan siku ari sida nabi ke dulu kelia, ke udah angkat idup baru.”

    Iya lalu bejaku ngagai sida, “Tang sapa Aku tu ku kita?” 

    Peter lalu nyaut, “Nuan tu Kristus Allah Taala.”

    Iya lalu berat-rat enda nyagi sida madahka nya ngagai orang, ku Iya, 

    “Anak Mensia enda tau enda balat diperinsa, lalu ditulak sida tuai bansa, sida tuai imam, enggau sida pengajar Adat, lalu dibunuh, lalu ba hari ti ketiga diangkatka idup baru.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads