29 September 2018 - Hari Enam ba Minggu Ke Dua Puluh Lima Musim Selama - Berita Iban Online

Header Ads

  • Baru Nyadi

    29 September 2018 - Hari Enam ba Minggu Ke Dua Puluh Lima Musim Selama

    29 September 2018 - Hari Enam ba Minggu Ke Dua Puluh Lima Musim Selama (Feast of Saints Michael, Gabriel, and Raphael, archangels)

    Bacha Ke Satu:

    Daniel 7: 9 - 10, 13 - 14

    Lebuh aku benung nengkila, mayuh kerusi diraja lalu diengkahka ba endur nya. 

    Iya ke idup belama iya duduk ba siti ari kerusi diraja nya. Gari Iya burak baka seleju, lalu buk Iya baka bulu bedus ti tulin. Kerusi diraja Iya baka kerita ti beapi-api, lalu kaki kerita nya mau laban api.
    Api lalu pansut ari kerusi diraja nya.

    Beribu-ribu iku orang bekereja ke Iya, lalu bejuta-juta iku orang bediri di mua Iya. Pengawa bechara lalu belabuh, lalu mayuh bengkah bup dibuka.

    Dalam genera malam nya, aku tepedaka utai ti baka gamal anak mensia, datai dalam mua hari, lalu mansang ngagai Iya ke idup belama iya, lalu diserahka ngagai Iya.

    Iya diberi kuasa, basa enggau mulia, ngambika orang ari semua menua, bansa, enggau jaku betuaika Iya magang.

    Kuasa Iya deka meruan belama iya, lalu perintah Iya enda nemu abis.

    Tauka:

    Pemandang 12: 7 - 12AB

    Perang lalu nyadi di serega. Mikael enggau bala melikat iya beperang ngelaban naga nya, lalu naga nya enggau bala melikat iya beperang ngelaban Mikael enggau bala melikat iya.

    Tang naga enggau bala melikat iya alah, lalu sida nadai agi endur di serega.

    Naga ti besai nya, iya nya ular ti tuai, ti dikumbai Antu tauka Sitan ke nipu semua dunya, lalu dibuai ari serega. Iya enggau semua bala melikat iya dibuai ke baruh ngagai dunya.

    Aku lalu ninga nyawa ti inggar bejaku di serega, “Diatu pengelepas, kuasa enggau Perintah Allah Taala kitai, enggau kuasa Kristus Iya, udah datai, laban iya ke bedawaka bala menyadi kitai di mua Allah Taala kitai siang malam, udah dibuai ke baruh.

    Lalu sida udah ngalahka iya ngena darah Anak Domba, enggau ngena jaku saksi sida, laban sida enda sayauka nyawa diri datai ke mati.

    Nya alai, rami gaga ati meh kita serega, enggau semua kita ke diau dia!

    Masmur Entara:

    Masmur 138: 1 - 2AB, 2CDE - 3, 4 - 5

    Saut (peda 1b): Aku belagu muji Nuan di mua bala melikat.

    Ke Satu
    Aku meri terima kasih ngagai Nuan, O TUHAN, enggau pengabis ati aku. Aku belagu muji Nuan di mua bala petara. Aku meremi ngadap ngagai Rumah Nuan ti kudus, lalu meri terima kasih ngagai nama Nuan.

    Saut: Aku belagu muji Nuan di mua bala melikat.

    Ke Dua
    Ketegal pengerindu enggau penetap ati Nuan ti meruan belama iya, laban Nuan udah mandangka Diri enggau pesan Nuan endang tinggi ari semua. Nuan nyaut aku, lebuh aku ngangauka Nuan. Ngena pengering Nuan, Nuan ngeringka aku.

    Saut: Aku belagu muji Nuan di mua bala melikat.

    Ke Tiga
    Semua raja di dunya deka muji Nuan, O TUHAN, laban sida udah ninga semaya Nuan, lalu sida deka belagu ngenang utai ti dikereja Nuan, laban mulia Nuan amat besai.

    Saut: Aku belagu muji Nuan di mua bala melikat.

    Alleluia (peda Masmur 103: 21)

    Alleluia, alleluia
    Puji meh TUHAN, semua kita melikat ti di serega, kita ke nembiak Iya, ti ngereja peneka Iya!
    Alleluia.

    Bacha Injil:

    John 1: 47 - 51

    Lebuh Jesus meda Natanel mansang ngagai Iya, Iya lalu bejakuka pasal Natanel, “Tu baru orang Israel ke bendar, ke nadai nemu ngelakar!”

    Natanel lalu nanya Iya, “Baka ni ku Nuan ngelala aku?”  

    Disaut Jesus, “Aku endang udah meda nuan di baruh kayu ara nya tadi, sebedau Philip ngangauka nuan.”

    Natanel lalu nyaut Iya, “Pengajar, Nuan amat Anak Allah Taala! Nuan tu meh Raja orang Israel!”

    Disaut Jesus, “Kati nuan arap laban Aku udah madahka Diri meda nuan di baruh kayu ara nya tadi? Nuan deka meda utai ti besai agi ari nya!”

    Lalu ku Iya bejaku ngagai Natanel, “Enggau bendar Aku madah ngagai kita: kita deka meda langit tebuka, lalu meda bala melikat Allah Taala nurun-niki ngagai Anak Mensia.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads